— Biessensoŭna abaraniać Pucina ad adčuvańnia, što jon prajhraje. Jon zrazumieje heta sam i sam budzie kiravacca instynktam samazachavańnia.
— Rasijanie nie zahnanyja ŭ kut. Rasijskaja armija nie zahnanaja ŭ kut. Heta siły ŭvarvańnia. Pry parazie čaści prosta adstupiać praź miažu ŭ Rasiju.
— Pucin kiruje ŭ virtualnaj realnaści, dzie zaŭsiody jość šlach da adstupleńnia. Jaho nielha zahnać u kut va Ukrainie, tamu što Ukraina — heta realnaje miesca.
— Ludziam ź inšych hramadstvaŭ ciažka zrazumieć, što Pucin — dyktatar, jaki kantraluje ŚMI svajoj krainy. Jon kiruje, źmianiajučy paradak dnia ŭ ŚMI.
— Pucin pastajanna mianiaje paradak dnia svaich ŚMI. Paśla papiaredniaha ŭvarvańnia RF va Ukrainu jahonyja ŚMI raptam pieraklučylisia na Siryju, i rasijanie pieraklučylisia śledam.
— U lutym hetaha hoda rasijskija ŚMI imhnienna pieraklučylisia z mesedžu «što vy, jakoje ŭvarvańnie, heta ŭsio fejki» na mesedž «uvarvańnie było niepaźbiežnym, u nas nie było inšaha vybaru». Rasijanie pieraklučylisia śledam.
— U vypadku realnaha paražeńnia Pucin prosta abvieścić pra svaju pieramohu pa telebačańni, i rasijanie pavierać jamu ci zrobiać vyhlad, što pavieryli. Dla hetaha jamu nie patrebna naša dapamoha.
— Biessensoŭna stvarać «šlachi dla adstupleńnia» ŭ realnym śviecie, kali ŭsio, što treba Pucinu, — heta adzin šlach u virtualnym śviecie, jaki jon całkam kantraluje. Z razmoŭ pra «šlachi adstupleńnia» rasijskija kiraŭniki prosta śmiajucca.
— Biezumoŭna, Pucin moža pamylicca i zaciahnuć z abviaščeńniem pieramohi. U hetym vypadku jon stracić uładu. My nie zdolnyja zastrachavać jaho ad takoj pamyłki, dy i nie varta.
— Ułada Pucina nad ŚMI budzie absalutnaj da taho momantu, pakul jana nie skončycca. Niama intervału, na jakim našy dziejańni ŭ realnym śviecie buduć mieć značeńnie. Albo ŭ stvoranych nami «šlachach adstupleńnia» nie budzie patreby, albo ŭ ich nie budzie sensu.
— Hrateskam było b prasić ukraincaŭ prymać vajennyja rašeńni z ulikam zručnaści ich dla interpretacyi rasijskimi telepradziusarami, jakija ŭ lubym vypadku nie kirujucca realnym śvietam.
— Niapravilnaje razumieńnie łohiki Maskvy z-za kliše ab «zahnanym u kut» i «šlachach adstupleńnia» zaciahnie vajnu, bo adciahnie ŭvahu ad prostaj nieabchodnaści nanieści Rasii parazu.
— Ukraina — heta zusim inšaja historyja. Zialenski, u adroźnieńnie ad Pucina, abrany demakratyčnym šlacham, adčuvaje adkaznaść za svoj narod i kiruje ŭ śviecie, dzie inšyja ludzi majuć značeńnie.
— Va Ukrainie jość ŚMI, jakimi ŭrad nie kiruje. Zialenski nie moža prosta źmianić paradak dnia. Jon pavinien źviartać uvahu na ludziej dla pryniaćcia luboha važnaha rašeńnia.
— U adroźnieńnie ad Pucina, Zialenski pavinien pierakanać svoj narod pakłaści kaniec hetaj vajnie. Tamu jamu patrebna dapamoha jak dla pieramohi ŭ vajnie, tak i dla taho, kab raskazać ukraincam, što budzie dalej.
— U adroźnieńnie ad rasijskich sałdat, ukraincam niama kudy adstupać. Jany nie mohuć prosta adstupić dadomu. Vajna viadziecca ŭ ich krainie. Potym jany viernucca ŭ svaje damy i buduć ich adnaŭlać.
— Spynieńnie vajny aznačaje bolš dumać pra ŭkrainski narod i jaho budučyniu i mienš turbavacca nakont prablemy, što rabić Pucinu, bo hetaj prablemy nasamreč nie isnuje.
Cimaci Snajder
Čytajcie taksama: Snajder: «Vy navat nie jamka na darozie, kali darohi niama»
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
