Na dolu Ukrainy prypadaje kala 10% pastavak usioj suśvietnaj pšanicy, adnak z pačatkam vajny Rasija zabłakavała klučavyja ŭkrainskija party ŭ Čornym mory, praź jakija ažyćciaŭlajecca transparciroŭka. U schoviščach Adesy i inšych haradoŭ ekspartu na zachad čakajuć sotni tysiač ton zbožža.
«Nieabchodna adkryć hetyja party jak maha chutčej, bo havorka idzie nie tolki pra Ukrainu, ale i pra tych, chto maje patrebu pa ŭsim śviecie, chto znachodzicca na miažy hoładu, — skazaŭ kiraŭnik charčovaj prahramy AAN Devid Biśli na ekstranaj sustrečy pa pytańniach charčovaj biaśpieki ŭ Ńju-Jorku.
— Ja zaklikaju prezidenta Pucina adkryć party, kali ŭ jaho jość serca».
Hienieralny sakratar AAN Antoniu Huteryš, u svaju čarhu, zajaviŭ, što śviet čakajuć hady masavaha hoładu, kali situacyja nie budzie vyrašanaja.
Pavodle jaho słoŭ, jon pravodzić ekstrannyja pieramovy z pradstaŭnikami Rasii, Ukrainy, Turcyi, ZŠA i Jeŭrasajuza, ale, miarkujučy pa ŭsim, chutkaha rašeńnia nie budzie.
Huteryš taksama zajaviŭ, što praz sankcyi značna parušany ekspart rasijskich uhnajeńniaŭ, što taksama stanie adnym ź źvionaŭ charčovaha kryzisu.
Dziaržsakratar ZŠA Entani Blinkien, jaki staršynstvuje na charčovym samicie ŭ Ńju-Jorku, zaklikaŭ krainy sa značnymi zapasami zbožža i ŭhnajeńniaŭ dziejničać bolš aktyŭna ŭ hety składany dla ŭsiaho śvietu momant.
