Praz 20 hadoŭ BATE dy «Homiel» nanoŭ voźmucca spračacca za vałodańnie Kubkam krainy. Fota: fc_gomel / vk.com
Heta ž nie pieršaja sprečka kamand za Kubak?
Tak, dva dziesiacihodździ tamu BATE i «Homiel» užo sustrakalisia ŭ finale. Na tuju paru kłuby nikoli tak daloka pa turnirnaj sietcy nie prasoŭvalisia, tamu sprečka za debiutny trafiej vydałasia bieskampramisnaja: ź vielizarnaj kolkaściu niebiaśpiečnych momantaŭ, papadańniami ŭ belki dy dvuma hałami — adznačylisia palešuki Barel dy Karsakoŭ.
Paśla ž dvuboju jašče niekalki tydniaŭ pałała połymia sudziejskaha skandału, bo bos barysaŭčan Anatol Kapski abvinavaciŭ bryhadu Vadzima Žuka, samaha daskanałaha refiery krainy, u niekampietentnaści. Adnak skarhi ŭ sudziejski kamitet situacyju nie źmianili: traktoŭku epizodaŭ z admovaj BATE ŭ pryznačeńni pary pienalci ekśpiertnaja kamisija pryznała słušnaj. Jak i astatnija pamiežnyja rašeńni «ludziej u šerym». A kab usio ž taki źnizić hradus napružańnia vakoł situacyi hałoŭnaha arbitra dyskvalifikavali na niekalki miesiacaŭ.
«Homiel» i zaraz moh ździvić?
Biezumoŭna. Bo histaryčna kalektyŭ ź bierahoŭ Saža, badaj, samy niazručny dla barysaŭčan. Čatyry razy ściežki kamand pierakryžoŭvalisia ŭ kubkavym farmacie — i niaźmienna pieravaha zastavałasia za futbalistami z abłasnoha centru. Chaj sabie pa kolkaści trafiejaŭ «Homiel» sastupaŭ BATE (dva suprać piaci), adnak u hetym siezonie jon užo dakazaŭ, što zdolny skarać samych krutych apanientaŭ.
U 1/8-j finału padnačalenyja Uładzimira Niavinskaha vybili z turniru čempijonaŭ krainy, salihorski «Šachcior», a na nastupnaj stadyi raspravilisia z bronzavym pryzioram, minskim «Dynama». Viktoryja nad BATE nie tolki dakinie jašče adzin pryz u skarbonku družyny, ale i dapamoža sabrać kubkavy «rojał fłeš» z hrandaŭ.
Adnak BATE pierad finałam «valiŭ» narmalna?
Navat bolš, čym možna było čakać!
Paśla vaśmi turaŭ u Vyšejšaj lizie barysaŭčanie ŭpeŭniena ŭznačalvali tablicu i mieli ŭ pasivie ŭsiaho čatyry prapuščanyja hały — heta lepšaja abarona krainy! Da taho ž «žoŭta-błakitnyja» zastavalisia adzinymi ŭ respublicy, chto nie ciarpieŭ paraz na viasieńnim adrezku pieršynstva.
Dla paraŭnańnia, «Homiel» tolki dziasiaty pry ažno čatyroch pravałach i admoŭnaj (10:11) roźnicy zabitych dy prapuščanych miačoŭ.
Uvohule barysaŭčanie tolki adnojčy ŭ 2022-m sutykalisia z sapraŭdnymi futbolnymi prablemami. Haściavuju hulniu paŭfinału Kubka ŭ Horadni jany skončyli niaŭdała, 2:3.
Adnak u paŭtornaj sustrečy prademanstravali ŭvieś patencyjał, što sapraŭdy zakładzieny ŭ rostar, dy ažyćciavili valavy «kambek» 2:0. Tamu navat lidarstva ŭ sustrečy suboty ničoha nie harantuje futbalistam Uładzimira Niavinskaha.
Niavinski? Čakajcie, ale ja pamiataju jaho ŭ BATE!
Tak i jość, bos «Homla» jašče ŭ bytnaść futbalistam ciaham piaci siezonaŭ abaraniaŭ kolery barysaŭčan i dvojčy stanaviŭsia ŭ ich składzie čempijonam krainy. Paśla ž pierachodu na trenierskuju pracu z 2009 pa 2017 hady ŭ statusie asistenta dapamahaŭ Viktaru Hančarenku dy Alaksandru Jermakoviču.
Adpaviedna pry Niavinskim BATE daminavaŭ na nacyjanalnaj arenie i damahaŭsia samych hučnych pośpiechaŭ u Lizie čempijonaŭ, kali pieramahaŭ «Bavaryju», «Lil», «Romu» ci «Atletyk» Bilbaa. Zaraz ža Niavinski maje mahčymaść zvajavać pieršy trafiej u paŭnavartasnaj samastojnaj karjery.
U adroźnieńnie ad apanienta, 37-hadovy Alaksandr Michajłaŭ užo mieŭ, čym pachvalicca — chaj sabie śpiecyjalist tolki ŭzimku ačoliŭ BATE, a dahetul na vyšejšym uzroŭni nie pracavaŭ. Supierkubak krainy — 2022 barysaŭčanie zdabyli mienavita pad jaho kiraŭnictvam, kali ŭ sakaviku minimalna pierajhrali «Šachcior». Nadalej ža «žoŭta-błakitnyja» tolki dadavali ŭ hulniavym płanie, a tamu spraviadliva ŭsprymalisia jak favaryty pary.
Mo jašče jakija cikavostki napiaredadni byli?
Dy kali łaska! Pačać chacia b z taho, što ŭ vypadku pieramohi «žoŭta-błakitnyja» zamacavalisia b u futbolnych letapisach jak kamanda, što ŭpieršyniu zatrymała trafiej na svajoj palicy try hady zapar. Tryumf nad «Homlem» paśla bresckaha «Dynama» dy «Isłačy» jašče i ahulnuju kolkaść kubkaŭ BATE pavialičvaŭ by. Šostaja ŭznaharoda — sapraŭdnaja histaryčnaja anamalija dla Biełarusi.
Novy vopyt čakaŭ i hałoŭnaha refiery sustrečy. Vital Sievaśćianik, jaki trojčy pryznavaŭsia lepšym arbitram Biełarusi, nikoli raniej nie absłuhoŭvaŭ finały. Chacia za plačyma sudździ ŭžo 278 dvubojaŭ — heta treci pakazčyk u historyi.
Dapamahali Sievaśćianiku Siarhiej Hidrevič i Siarhiej Firynovič — paplečniki, ź jakimi hałoŭny refiery pravioŭ u vyšejšaj lizie 104 matčy. Takich tryvałych i niaźmiennych bryhad taksama ŭ Biełarusi futbolnaj jašče nie było.
A akramia futboła štości za dušu čaplała?
Na žal, nie. Heta minułymi hadami fiederacyja futboła pieratvarała finał Kubka na sapraŭdnaje śviata biełaruščyny. Ładziŭsia finał konkursu «Mova, muzyka, futboł», dzie pretendenty na pieramohu nažyva śpiavali chity rodnym słovam sa sceny pierad stadyjonam.
Hurt «Navi» prezientavaŭ trek «Napierad, biełakryłyja!», jaki paśla peŭny čas byŭ himnam nacyjanalnaj zbornaj. Ładziŭ vystup hałoŭny pank krainy Jura Stylski. Zapuskalisia moładzievyja prajekty, jakija prasoŭvali ajčynnuju kulturu, pradavałasia atrybutyka z nacyjanalnym kałarytam. Zaprašalisia da aśviatleńnia futbolnaha śviata ŭsie ŚMI, niezaležna ad palityčnych pohladaŭ — naprykład, tyja ž «Našu Nivu» i «Biełsat» zaŭsiody pijarščyki ABFF vitali.
Adnak z prychodam da ŭłady Uładzimira Bazanava dy puła praŭładnych funkcyjanieraŭ kurs na biełarusizacyju zharnuli za ličanyja miesiacy. Kali na sajcie fiederacyi biełaruskaja mova źnikła całkam, a roliki z ahladami matčaŭ pačali padpisvacca pa-rusku, dzie ž tut vieści razmovu pra niešta maštabnaje? Były pałkoŭnik artyleryi pryvioŭ usio da vajennaha stanu «pusť biezobrazno, zato odnoobrazno» i kančatkova zabiŭ rastki fiederacyjnaha kreatyvu.
Tamu viečaram pierad hulnioj zaŭziatary zdoleli tolki niešta pierachapić na fudkorcie, pabačyć fotavystavu «30 hod Kubku Biełarusi» dy pasłuchać kavier-bend z «idieołohičieski pravilnym» repiertuaram.
Dyk a ŭ samoj hulni što hodnaha było?
Kali ščyra, pieršy tajm atrymaŭsia kamiernym dy mała vidoviščnym. Ad sumu zaŭziataraŭ vyratavaŭ Jakaŭ Filipavič, jaki pieratvaryŭ vuhłavy ŭ hoł. Astatnija bolš-mienš cikavyja momanty futbolny lud nazvaŭ by «padychodami». To-bok, ideja nastupalnaja pa sutnaści niebłahaja, a voś realizacyja kulhaje.
Zatoje paśla pierapynku chapiła i intryhi, i dramy, i navat piersanalnaj trahiedyi.
Apošniaja zdaryłasia badaj što z samym vopytnym hulcom viečara: Maksim Bardačoŭ «badnuŭ» miač va ŭłasny stvor paśla krosu Siarhieja Maćviejčyka ad broŭki. A praź piać chvilin užo sam Maćviejčyk prymaŭ vinšavańni ad partnioraŭ, chacia z tym ža impetam moh dziakavać kipieru BATE. Kudraviec nie apracavaŭ miač paśla strełu abaroncy z 25 mietraŭ — i, faktyčna, ułasnymi rukami pieratvaryŭ ličby na tabło na 1:2 na homielskuju karyść.
Hety lik i apynuŭsia finalnym, chacia naprykancy sustrečy barysaŭčanie pasprabavali ździejśnić navał. Adnak palešuki viktoryju nie addali, čym pierarvali hiehiemoniju supiernikaŭ u spabornictvie dy ŭpieršyniu za 11 hod zavajavali trafiej. U bonus da ŭznaharody «Homiel» taksama atrymaŭ prava pradstavić Biełaruś u Lizie Kanfierencyj — 2022/23. Pačynać chadu pa dystancyi futbalisty Niavinskaha buduć z druhoha kvalifikacyjnaha raŭnda.
