Natalla Vasilevič. Z asabistaha archiva
Vychad z-pad kiraŭnictva Maskoŭskaha patryjarchata adbyŭsia, i jon nosić nie taktyčny, a stratehičny charaktar. U rašeńni Sabora jość słova «poŭnaj niezaležnaści». Dasiul niezaležnaść była niapoŭnaj.
Čarhovym dokazam taho, što UPC imkniecca mienavita da aŭtakiefalii, jość punkt pra toje, što jana dumaje pra zapačatkavańnie ułasnaha miravareńnia. Heta značyć samastojna vyrablać śviatoje mira, jakoje vykarystoŭvajecca ŭ tajemstvie mirapamazańnia, jakoje ŭ Pravasłaŭnaj carkvie adbyvajecca razam z chryščeńniem. A heta adzin z atrybutaŭ i simvałaŭ niezaležnaści Pravasłaŭnaj carkvy.
Kali kamientavać zajavu UPC, što stasunki z RPC Carkva nie rvie — to ź joj nie parvaŭ navat Kanstancinopalski patryjarchat. Navat Pravasłaŭnaja carkva Ukrainy (najbolšaja Pravasłaŭnaja carkva krainy, jakaja maje pryznańnie Kanstancinopalskaha patryjarchata) parvała tolki paru dzion tamu, kali pryniała rašeńnie pierastać paminać patryjarcha Kiryła ŭ dyptychach, to-bok vyklučyła jahonaje imia z paminańnia na nabaženstvach.
U kananičnym pravie jość roznyja interpretacyi taho, što jość aŭtakiefalnaj Carkvoj. Sama PCU taksama źjaŭlajecca aŭtakiefalnaj u pracesie stanaŭleńnia.
Ale na prykładzie niadaŭniaha abviaščeńnia aŭtakiefalii Achrydskaj archijepiskapii (niadaŭna Pravasłaŭnaja carkva Paŭnočnaj Makiedonii atrymała pryznańnie niezaležnaści ŭ Kanstancinopali) bačna, što heta hnutkaja sistema.
UPC budzie imknucca da aŭtakiefalii, ale šlachi pryznańnia pakul niajasnyja. Mnohaje budzie zaležyć ad pazicyi inšych pamiesnych cerkvaŭ, a taksama taho, pra što UPC zmoža damovicca z PCU. Mahčyma, budzie niejki pierachodny stan.
U niejkaj pierśpiektyvie mahčymaje abjadnańnie PCU i UPC — forma i terminy buduć zaležać ad roznych udzielnikaŭ pracesu pieramovaŭ.
Prosta zaraz hetaha nie adbudziecca pa dźviuch pryčynach. Pa-pieršaje, pradstaŭniki cerkvaŭ doŭha klali adzin adnaho jak najhoršych vorahaŭ. Šmat niehatyvu i nianaviści nakapiłasia, stvaryłasia takoje napružańnie. Pa-druhoje, niajasna, pavodle jakoj madeli abjadnoŭvać struktury, bo nichto nie choča zhubić upłyŭ i resursy pry abjadnańni.
Ale ŭ śviecie taksama jość precedenty suisnavańnia dźviuch aŭtakiefalnych cerkvaŭ — jurysdykcyi ŭ dyjaspary. Jość estonskaja madel suisnavańnia dźviuch paralelnych jurysdykcyj. U cełym hetaje pytańnie da kanca ŭ pravasłaŭi nie ŭrehulavanaje. Heta jak by anamalija, ale na praktycy takoje zdarajecca.
Čytajcie taksama:
Sabor UPC MP abviaściŭ demarš patryjarchu i zajaviŭ pra samastojnaść Carkvy
