Ihar Kizim. Fota: Fejsbuk
Ech, pieravialisia «šcirlicy» ŭ biełaruskim KDB.
Heta ja pra film «Darohi dadomu», pakazany ŭčora na ANT Biełarusi pra tak zvanuju «śpiecapieracyju» KDB pa viartańni biełaruskich dalnabojščykaŭ dadomu. Dzie «acenka situacyi», «analityka», «razvažańni», «płanavańnie apieracyi», «vyzvaleńnie» i, narešcie «atrymańnie uznaharod»?
Nastolki prymityŭna ŭsio padajecca, što z usiaho pakazanaha vidavočnym i praŭdzivym vyhladaje tolki «acenka situacyi» i «atrymańnie ŭznaharod».
Choć treba addać naležnaje: «zrežysiravany» i źniaty film niadrenna — sa śpiecefiektami, zachaplalnym «siužetam», padobnymi na realnaść «pastanoŭkami» i h. d. U cełym, «błokbastar».
Ale składvajecca ŭražańnie, što film chutčej nie pra «vyzvaleńnie», a pra toje, jakija «strašnyja i biaźlitasnyja» ukraincy, jakoje nibyta «pradažnaje SBU», i ŭ cełym pra toje, što ŭsio va Ukrainie «drenna».
Tamu ŭ filmie lohka prahladajucca antyŭkrainskija prapahandysckija štampy, manipulacyi faktami, «paŭpraŭda», padmiena paniaćciaŭ i h. d.
A samaje hałoŭnaje — navat nie stavicca pytańnie, čamu biełaruskija dalnabojniki paśla 24 lutaha apynulisia ŭ takoj situacyi. Čamu naohuł da biełarusaŭ, jakija zaŭsiody byli samymi žadanymi i blizkimi va Ukrainie haściami, paśla 24 lutaha rezka źmianiłasia staŭleńnie (chaču vieryć, nienadoŭha).
Adkaz taki — tamu, što 24 lutaha, mienavita z terytoryi Biełarusi pačałosia poŭnamaštabnaje ŭvarvańnie rasijskich vojskaŭ va Ukrainu, tamu što z terytoryi Biełarusi lacieli rasijskija samaloty i rakiety, jakija zabivali ŭkraincaŭ i razburali ŭkrainskija harady i vioski. Viadoma ž, «hvałt» — heta zaŭsiody drenna, jak i lubaja vajna. Ale nie Ukraina pačała vajnu i nie z ukrainskaj terytoryi pajšli vojski na susiedniuju krainu.
Tamu, kali ŭsie «na niervach» i «na emocyjach», dziejańni ludziej pa abaronie svajoj ziamli mohuć być i «žorstkija», i, na žal, ad hetaha časam pakutujuć nievinavatyja ludzi (kali tolki nie kazać pra tak zvanuju «kalektyŭnuju adkaznaść» krainy-ahresara).
Zaraz pa sutnaści tak zvanaj apieracyi.
Naohuł niezrazumieła, čamu KDB prypisvaje sabie ŭsie «pośpiechi», bo biełaruskija dypłamaty zrabili nie mienš (kali nie bolš), kab viarnuć biełaruskich hramadzian dadomu ŭ tym liku z dapamohaj ambasady Ukrainy ŭ Biełarusi (pasolstva RB było evakujavana z Ukrainy, choć mahło b, jak mnohija inšyja, pieramiaścicca z Kijeva, u jakim sapraŭdy stanaviłasia niebiaśpiečna zastavacca, u inšy horad Ukrainy i praciahvać akazvać dapamohu svaim hramadzianam na miescy). Pra heta, darečy, i pres-sakratar MZS RB Anatol Hłaz zhadvaŭ u adnym ź viačernich efiraŭ na ANT.
Tak, sapraŭdy, byli ciažkaści, asabliva z kiroŭcami ŭ Malinie, i tam byli «niervy». Ale pa inšych hrupach i ludziach viałasia praca i ich nichto asabliva nie źbiraŭsia trymać.
Ale «na vajnie, jak na vajnie». Kožnaje viedamstva maje svoj «intares» i ŭsio, što źviazana z pytańniami biaśpieki, padčas vajny stanavicca hałoŭnym. Heta, viadoma ž, zaciahvała praces.
Choć, naprykład, ź biełarusami ŭ Čarnaŭcach naš konsuł mieŭ pastajanny kantakt pa telefonie, jak i ź ich svajakami ŭ Biełarusi i z pradstaŭnikami Mintransa.
A kali vyvozili cieły dvuch zahinułych ad rakietnaha ŭdaru (zrazumieła, adkul prylacieła rakieta) biełarusaŭ u Koraścieni, to hetym zajmalisia nie tolki ŭkrainskija i biełaruskija konsuły i pradstaŭniki Mintransa, ale i polskija kalehi.
Pra KDB tut naohuł havorka nie išła. Kali nie ličyć taho, što paśla viartańnia vałanciory, jakija pryvieźli cieły ŭ Mazyr, tut ža byli vyklikanyja «dla dačy pakazańniaŭ».
I, narešcie, «apahiej» apieracyi — sustreča na Varšaŭskim moście. Tut praŭda «spracavała» KDB.
Navat mnie asabista telefanavali i «papiaredžvali», što kali što, to… heta, ułasna, sutnaść «apieracyi», pra paśpiachovaje praviadzieńnie jakoj publična kazali 7 krasavika.
Tolki ci «paśpiachovaja» jana? Atrymałasia, tak. Ukrainskija pradstaŭniki aŭtapieravozčykaŭ viali pieramovy z rasijskimi ab uzajemnym abmienie kiroŭcaŭ, jakija apynulisia ŭ Rasii (ukrainskija) i va Ukrainie (rasijskija). Była dasiahnutaja damoŭlenaść ab tym, što miescam «abmienu» budzie pamiežny pierachod u Breście. Aŭtobus z ukraincami pryjedzie tudy praź Biełaruś, a z rasijskimi z Ukrainy — praz Polšču.
I tut pačałasia «śpiecapieracyja».
Kali rasijanie pierasiekli miažu i apynulisia ŭ Biełarusi, biełaruskija pamiežniki nie vypuścili ŭkrainskich i pastavili ŭmovu, što vypuściać ich tolki ŭ «abmien na svaich». Pasialili ich u asobnym vahonie i vystavili achovu vakoł. Heta značyć, faktyčna ŭziali ŭ zakładniki ŭkrainskich kiroŭcaŭ.
Samim heta pryjšło ŭ hałavu abo sumiesna z rasijanami — heta ŭžo niavažna.
Važna toje, što było jašče raz pakazana, što terytoryja Biełarusi niebiaśpiečnaja dla ŭkraincaŭ (darečy, da pytańnia ab mahčymym miescy mirnych pieramovaŭ).
Bo kali b abmien adbyvaŭsia, naprykład, na miažy Rasii z Łatvijaj, to takoj situacyi nie ŭźnikła b.
Viadoma, usio zaviaršyłasia (choć i z zatrymkaj, jakoj mahło b, darečy, i nie być), i dobra, što ŭsie viarnulisia ŭ siemji. Z KDB abo biez KDB, heta ŭsio adno zdaryłasia b. Ale ci varty hety film taho, kab, «ukidvajučy» ŭ infarmacyjnuju prastoru Biełarusi jašče adnu porcyju antyŭkrainskaj prapahandy, u čarhovy raz biespaśpiachova sprabavać stvaryć z ukraincaŭ «vobraz voraha» ŭ biełaruskim hramadstvie. Chacia kali dziela ŭznaharod…
Čytajcie taksama:
ANT vydała zbor uzoraŭ dla analizu DNK za prykmiety zabojstva biełaruskich dalnabojščykaŭ
