«Para zamalovak z majoj letašniaj adsidki ŭ salihorskim izalatary, kab było zrazumieła, za što siadziać ciapier niepalityčnyja», — piša Pavieł Batujeŭ u Fejsbuku (pryvodzim hety dopis ź nievialikimi praŭkami).
Dzimon
Čałaviek paprasiŭ u baćki klučy ad mašyny. Baćka ŭ hety čas trochi nakaciŭ i na ranicu zabyŭsia, što pazyčyŭ klučy synu. Vyklikaŭ milicyjantaŭ i paviedamiŭ, što jahonuju mašynu ŭkrali. Dzimona ŭziali prosta na pracy, kudy jon pajechaŭ na baćkavaj mašynie. Kali jaho pryvieźli ŭ adździaleńnie, tudy pryjechaŭ baćka i skazaŭ, što sapraŭdy zabyŭsia, jak sam daŭ klučy ad mašyny synu i nijakich pretenzij u jaho da syna niama.
Ale Dzimon pravioŭ troje sutak u izalatary pa 108 artykule (padazreńni ŭ ździajśnieńni złačynstva, jakija niepasredna ŭźnikli). Možna zadać łahičnaje pytańnie: navošta? Adkaz — da jaho dvojčy prychodzili «apieratyŭniki», jakija prapanoŭvali pryznacca ŭ tym, što jon skraŭ mahnitołu ŭ mašynie (sprava — typovy visiak, ale, nu, a raptam). Praz 72 hadziny pajšoŭ na volu.
Antocha-minior
Trochi starejšy za 20 žychar Minska, jaki pryjechaŭ u Salihorsk rabić «zakładki» ad niejkaha narkašopa. Zatrymali razam z naparnikam. Ahułam mieli pad 100 hramaŭ chimičnaj substancyi. Paśpieŭ atrymać tolki adzin «zarobak». Artykuł 328 častka 3. Paśla zatrymańnia siłaviki prahladali padpiski ŭ Telehramie. To-bok čuvak užo, možna ličyć, siadzić na 8 hadoŭ, što vy jašče chočacie — nakinuć jamu 15 sutak?
Maksim
Heta moj absalutny top, za što možna prysieści. Adčyniajucca dźviery. Zachodzić čałaviek i adrazu:
— Zdarovieńka, ja Maksim — pa žyćci mužyk.
To-bok, čałaviek ź jaŭnym turemnym dośviedam. Pad čaj raspaviadaje svaju historyju. U jaho vośmaja ŭžo sudzimaść. Kaža:
— Ja u dzieda kalco s***dziŭ z tualeta.
Pakul maja fantazija malavała siamiejnuju relikviju z dyjamientami, Maks udakładniŭ, što havorka pra «pads*ačnik ad unitaza». Navošta jaho skraŭ, nie vielmi pamiataje, ale dzied vyklikaŭ milicyju i skazaŭ, što bačyŭ jak toj vynosiŭ «pads*ačnik» i prasiŭ hetaha nie rabić. A heta ŭžo nie kradziež, a hrabiež. Praz 72 hadziny čuvaku vydali pastanovy pra ŭzbudžeńnie spravy pa artykule 206 i ab nakiravańni ŭ žodzinskaje SIZA. Za «pads*ačnik». Čuvak maje ŭsie šancy stać na zonie lehiendaj».
