Andrej Jarmolenka padčas matča z Uelsam 5 červienia 2022 hoda. Fota: AR

Andrej Jarmolenka padčas matča z Uelsam 5 červienia 2022 hoda. Fota: AR

«Chłopčyk sa 130-ha kiłamietra»

Budučaja lehienda ŭkrainskaj zbornaj, Jarmolenka naradziŭsia nie va Ukrainie, a ŭ Rasii. Jaho baćki, uradžency siała Smalanka ŭ Čarnihaŭskaj vobłaści, źjechali pracavać u Leninhrad, dzie i naradziŭsia Andrej. Tam jon pravioŭ rańniaje dziacinstva, paśla čaho siamja viarnułasia ŭ Čarnihaŭ, dzie Andrej i rabiŭ pačatkovyja kroki ŭ futbole.

Pieršym moładzievym kłubam Jarmolenki stała čarnihaŭskaja kamanda «Junactva», na darosłym ža ŭzroŭni jon raspačynaŭ ź inšaha čarnihaŭskaha kłuba — «Dziasny».

A potym było kijeŭskaje «Dynama» i dziŭnaja mianuška «chłopčyk sa 130-ha kiłamietra» — bo ad Čarnihava da Kijeva prykładna takaja adlehłaść. Jarmolenka nie adrazu zdoleŭ vystupać u asnoŭnym składzie «Dynama» i pieršyja dva hady hulaŭ za druhuju kamandu, ale ŭ vyniku zatrymaŭsia ŭ kłubie na 11 hadoŭ i zamacavaŭ za saboj svajo miesca na poli.

Hulaŭ u Hiermanii i Brytanii

Letam 2017 hoda talenavity ŭkrainiec padpisaŭ kantrakt z dortmundskaj «Barusijaj». Niahledziačy na traŭmy, Jarmolenka ŭdała pakazaŭ siabie ŭ niamieckaj Bundeślizie — pa viersii bujnoha niamieckaha vydańnia Bild, ukrainski futbalist staŭ lepšym navičkom Bundeślihi.

Užo praź siezon Jarmolenku vykupiŭ anhlijski «Viest Chem Junajted». Tam va ŭkrainca nie ŭsio atrymałasia: niadaŭna stała viadoma, što kłub nie budzie padaŭžać z hulcom kantrakt, jaki skančvajecca ŭ kancy hetaha miesiaca. Usio bačna pa statystycy — u apošnim siezonie Jarmolenka prysutničaŭ na poli ŭ pałovie matčaŭ i zabiŭ za ŭvieś siezon tolki adnojčy.

Andrej Jarmolenka paśla matča z Uelsam 5 červienia 2022 hoda. Fota: AR

Andrej Jarmolenka paśla matča z Uelsam 5 červienia 2022 hoda. Fota: AR

Zusim inšaja historyja — zbornaja Ukrainy, dzie Jarmolenka — kapitan i sapraŭdny lidar. U jaho aktyvie 45 hałoŭ za nacyjanalnuju kamandu, bolš za ŭsiu jaje historyju było tolki ŭ Andreja Šaŭčenki — 48. Jarmolenka taksama tolki čaćviorty hulec u historyi ŭkrainskaj nacyjanałki, jaki adyhraŭ za jaje bolš za 100 matčaŭ (108), z kamandaj jon udzielničaŭ u troch čempijanatach Jeŭropy (u 2012, 2016 i 2020 hadach).

Nie zastaŭsia abyjakavym da vajny

Padziei na Radzimie nikoli nie byli dla Jarmolenki pustym słovam. U pieršyja dni vajny Andrej byŭ vymušany ŭziać adpačynak u kamandzie i zaniacca siamiejnymi spravami, bo jaho žonka i dzieci apynulisia ŭ Kijevie pad bambardziroŭkami.

Kali futbalist pryjechaŭ u toj čas na treniroŭku, jon nie moh navat razmaŭlać ad śloz. Trenier adpuściŭ jaho z ukazańniem zrabić usio, kab rodnyja ŭkrainca apynulisia ŭ biaśpiecy.

Adrazu paśla pačatku vajny Jarmolenka źviazaŭsia z meram rodnaha horada i spytaŭ pra patreby vajennych, u jakich sprabuje im dapamahčy. Kapitan zbornaj taksama nie adnojčy vystaŭlaŭ roznyja pradmiety na dabračynnyja aŭkcyjony, hrošy ź jakich iduć na karyść Ukrainie. Siarod takich pradmietaŭ, naprykład, była futbołka z podpisam Jarmolenki, u jakoj jon vyjšaŭ na hulniu sa zbornaj Šatłandyi 1 červienia, i ŭznaharoda lepšamu hulcu matča, jakuju atrymaŭ tady hulec «Viest Chema».

Cikava, što heta daloka nie pieršy taki krok z boku Jarmolenki. Jašče vosieńniu 2014 hoda hulec vystaŭlaŭ na aŭkcyjon kłubnuju futbołku kiŭjeskaha «Dynama», kab dapamahčy sabrać hrošy na ŭkrainskuju armiju, jakaja tady zmahałasia na Danbasie ŭ ATA.

Źviartaŭsia da rasijskich futbalistaŭ

U pačatku sakavika ŭkrainiec zapisaŭ rolik, u jakim źviarnuŭsia da hulcoŭ rasijskaj zbornaj pa futbole. U videa kapitan ukrainskaj kamandy asudziŭ maŭčańnie rasijskich kaleh: «U nas u krainie zabivajuć ludziej, našych žonak, maci i dziaciej, ale vy ničoha nie kamientujecie. Skažycie, kali łaska, što vam budzie, kali vy ŭsie abjadnajeciesia i prosta pakažacie ludziam, što na samoj spravie adbyvajecca ŭ nas u krainie?»

Jarmolenka pryznavaŭsia, što zabivać hały jaho natchniajuć ukraincy: «Ja baču, jak ludzi zmahajucca. Ja skazaŭ sabie: vychodź, kolki jość sił. I zmahajsia, jak zmahajecca tvoj narod. Zabiej hoł, kab pakazać usim, jakija my mocnyja. Što b z nami ni zdarałasia, naš duch ničoha nie moža złamać».

Andrej Šaŭčenka: Siońniašni matč u Šatłandyi — nadzieja Ukrainy

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?