Biełaruś i Jeŭrasajuz
Padčas vajny Biełaruś u vačach Jeŭrasajuza kančatkova pierastała ŭsprymacca jak kraina ź niezaležnaj palitykaj.
«Biełaruś idzie davažkaj da Rasii. I heta łahična, bo va ŭmovach vajny niemahčyma abstrahavacca ad taho, što Biełaruś z hledzišča mižnarodnaha prava źjaŭlajecca dziaržavaj-ahresaram», — kaža Arkadź Mošes.
Chacia, kaniečnie, Biełaruś — mižnarodna pryznanaja niezaležnaja dziaržava, «z farmalnym suvierenitetam». «I ŭ hetym płanie staŭleńnie da Biełarusi zaŭsiody budzie adroźnivacca ad staŭleńnia da «DNR» ci «ŁNR», niezaležna ad taho, što dalej adbudziecca ŭ rasijska-biełaruskich adnosinach».
U toj ža čas Mošes miarkuje, što Łukašenka kančatkova adrezaŭ siabie na ahladnuju budučyniu ad mahčymaści novaj «pierazahruzki», ad mahčymaści paŭtareńnia 2015 hoda, ad niejkich sprobaŭ znajści ź im ahulnuju movu.
Pavodle analityka, niama dakładnaha ŭjaŭleńnia pra toje, jakuju Biełaruś Zachad chacieŭ by bačyć paśla vajny i jak jon moh by hetaha dabicca. «Chacieŭ by Zachad bačyć Biełaruś čalcom jeŭrapiejskaj siamji narodaŭ, krainaj, jakaja ŭvachodzić u tuju ž katehoryju adnosin ź Jeŭrasajuzam, jak Ukraina, Małdova i Hruzija — my pakul hetaha nie viedajem. Tamu i niama stratehii, bo niama navat «idealnaha» bačańnia budučyni adnosin ź Biełaruśsiu».
Kali Rasija niejkim čynam pačnie ažyćciaŭlać dziejańni pa spynieńni suverenitetu Biełarusi i jaje pryniaćci ŭ skład Rasii, to Zachad, biezumoŭna, zrobić sproby niejak abaranić hety suverenitet. «Ale heta, badaj, usio, što možna na siońnia kankretna skazać».
«Biezumoŭna, Biełaruś nie ŭsprymajecca ŭ jakaści całkam samastojnaha subjekta padčas vajny Ukrainy z Rasijaj. Kali b u Łukašenki (a tym bolš u biełaruskaha naroda) byŭ realny vybar, Biełaruś nie dazvoliła b vykarystać svaju terytoryju dla ažyćciaŭleńnia hetaj ahresii», — kaža analityk.
Ukrainskaje zbožža i sankcyi
Pa toj ža pryčynie, Łukašenku nie ŭdasca skarystacca situacyjaj z ukrainskim chlebam i dabicca niejkaj admieny sankcyj, bo heta nie ŭsprymajecca jak samastojnaja pazicyja Łukašenki.
«Mienavita tamu, što Pucin z takim entuzijazmam padtrymaŭ pytańnie ab źniaćci sankcyj suprać Biełarusi ŭ abmien na transpartavańnie zbožža praź Biełaruś — stała zrazumieła, što heta ŭzhodnienaja pazicyja.
Što heta sproba dabicca chacia b maleńkaj treščyny ŭ brani jeŭrapiejskich sankcyj, kab potym takuju ž praceduru prymianić da Rasii. Tamu nijakaj samastojnaj pazicyi Minska tut niama».
Da taho ž, nie vidavočna, što ŭ šlachu praź Biełaruś jość niejki praktyčny sens. U bałtyjskija party ŭkrainskaje zbožža moža trapić abchodnym šlacham praz Polšču.
«Ekspart ukrainskaha zbožža — stratehičnaja prablema dla Ukrainy, ale heta nie hłabalnaja prablema dla suśvietnaj charčovaj biaśpieki. Tamu ja dumaju, što ŭsie hetyja sproby Minska dabicca źmiakčeńnia sankcyj ni da čaho nie pryviaduć — na takija «raźmieny» Zachad nie pojdzie».
Mošes miarkuje, što Łukašenka sprabuje znajści mahčymaści dla łaviravańnia, ale biezvynikova.
«Bolš za toje, siońnia jaho stanovišča jašče horšaje, čym było dva miesiacy tamu. Bo dva miesiacy tamu my hladzieli na sytuacyju ŭ śviatle advodu rasijskich vojskaŭ z terytoryi Biełarusi — a siońnia my bačym, što na poŭdni Biełarusi znoŭ adbyvajecca peŭnaja eskałacyja. Vučeńni, vajskovyja treniroŭki — ciažka pazbavicca ad uražańnia, što heta adbyvajecca nie ź inicyjatyvy Łukašenki. Chutčej za ŭsio, jamu padkazvajuć u Maskvie, što treba rabić, kab trymać ukraincaŭ u napružańni. Takim čynam, usio, što Łukašenka kaža, stračvaje sens na fonie taho, što jon robić. A robić jon pravakacyjnyja manieŭry dy inšaje», — kaža analityk.
Biełaruś i Rasija
Što tyčycca dałučeńnia Biełarusi da Rasii, jakoje ciapier, zdajecca, jak nikoli pahražaje krainie, to Mošes nie vieryć u heta, prynamsi pakul suvierennaj zastajecca Ukraina.
«Toje, što Biełaruś faktyčna stračvaje svoj suvierenitet usie hady, što Łukašenka va ŭładzie, — heta nie sakret. Ale niezrazumieła, što Rasija moža atrymać ad dałučeńnia Biełarusi. Voś kali vy zavajoŭvajecie, dałučajecie Ukrainu, to dałučeńnie Biełarusi stanovicca nieabchodnym u kantekście ŭmoŭnaha adnaŭleńnia SSSR.
Biez dałučeńnia Ukrainy ŭ dałučeńni Biełarusi niama nijakaha sensu. Heta nie vykliča takoha entuzijazmu, jak vyklikaŭ Krym. Źjaviacca tolki novyja prablemy. Častka nasielnictva Biełarusi budzie aktyŭna pratestavać. A jak biełarusy ŭmiejuć pratestavać — Kreml pabačyŭ dva hady tamu».
Pucin i biez dałučeńnia Biełarusi siońnia maje ad Łukašenki ŭsio, što choča, kaža analityk.
«Pa fakcie sajuz režymaŭ Łukašenki i Pucina dasiahnuŭ toj stupieni, kali Łukašenka ŭžo ničoha nie moža supraćpastavić cisku Maskvy. U hetym sensie Łukašenka jak byŭ idealnym kiraŭnikom Biełarusi dla Maskvy, tak i zastajecca. Łukašenka robić dla Maskvy ŭsio, što ad jaho patrabujuć. A prosić u adkaz vielmi mała, minimalnyja ekanamičnyja subsydyi. U paraŭnańni z vajnoj va Ukrainie toje, što prosić dla siabie biełaruski režym, — heta kapiejki», — kaža śpiecyjalist.
Forbryh: Rasija prajhraje, a asłablenaja Rasija budzie aznačać padzieńnie Łukašenki
Tomas Viencłava: Kazać, što impieryjalizm i ahresija ŭ ruskich u hienach abo «ŭ kulturnym kodzie» — heta rasizm
Cichanoŭskaja vystupiła ŭ Siejmie Łatvii: U Biełaruś viarnuŭsia stalinski teror
