Alfa-Bank pavialičyŭ limity na źniaćcie najaŭnych: pa dalarach — z 10 tysiač da 20 tysiač, pa jeŭra — z troch da dziesiaci tysiač u miesiac. «Biełaruskija i rasijskija rubli vydajucca adrazu ž pry najaŭnaści ŭ adździaleńni», — udakładniaje bank.
Technabank pavialičyŭ limity na vydaču najaŭnych dalaraŭ pa bankaŭskich kartkach — da 2000 dalaraŭ u sutki.
Biełhazprambank 9 červienia źniaŭ abmiežavańni na papaŭnieńnie valutnych rachunkaŭ, a taksama ŭkładaŭ u valucie praz ARIP.
MTBank padniaŭ limity na źniaćcie najaŭnaj valuty. «Na praciahu kalandarnaha miesiaca ź biahučych rachunkaŭ (u tym liku rachunkaŭ, dostup da jakich zabiaśpiečvajecca z dapamohaj bankaŭskaj płaciežnaj kartki) da 30 000 dalaraŭ i 15 000 jeŭra, — udakładniaje bank. — Na praciahu kalandarnaha miesiaca ŭ adździaleńni banka možna zamović usiu sumu całkam abo častkami ŭ miežach paznačanaha limitu».
Pierahladajuć staŭki pa ŭkładach
VTB Bank (Biełaruś) paviedamlaje, što źnižaje pracentnyja staŭki pa adzyŭnych i biezadzyŭnych depazitach fizičnych asob u dalarach. Havorka pra ŭkłady z terminami ad raźmiaščeńnia 95 dzion da 5 hadoŭ. «Źnižeńnie pamieru pracentnych stavak u zaležnaści ad terminu raźmiaščeńnia składaje ad 1,2 pracentnych punkta pry raźmiaščeńni depazitaŭ na 95 dzion da 0,4 pracentnych punkta pry raźmiaščeńni depazitaŭ na termin 3 hady i 5 hadoŭ», — udakładniaje bank.
Rašeńnie źnizić pracentnyja staŭki finustanova tłumačyć «dynamikaj rynkavych pracentnych stavak».
Biełahraprambank z 10 červienia źniziŭ pracentnyja staŭki pa terminovych biezadzyŭnych depazitach «Plus da stabilnaści». Novyja staŭki ŭ zaležnaści ad terminu raźmiaščeńnia hrošaj ciapier składajuć: biełaruskija rubli — da 22,2% hadavych, dalary i jeŭra — da 7%, rasijskija rubli — da 16,4%.
Z 10 červienia Alfa-Bank źniziŭ staŭki pa adzyŭnych rublovych układach «Alfa-Układ». Tak, staŭka pa depazicie terminam raźmiaščeńnia na 33 dni — 12,5%, 60 dzion — 13,5%. Taksama bank źniziŭ staŭku pa biezadzyŭnym rublovym depazicie «Alfa-układ» na 60 dzion — da 15%.
Zakryćcio «śpiačych» rachunkaŭ
Alfa-Bank 20 červienia zakryje «śpiačyja» rachunki jurydyčnych asob i indyvidualnych pradprymalnikaŭ. Havorka pra tyja rachunki, pa jakich apošnija šeść miesiacaŭ nie pieraličvali hrošy, a taksama pa ich nie pravodzili apieracyi (u hetym vypadku zakryjuć, kali rešta hrošaj mienš za adnu bazavuju vieličyniu — 32 rubli).
RRB Bank 8 červienia paviedamiŭ, što adnaviŭ mahčymaść rabić płaciažy ŭ internet-kramach i anłajn-servisach na terytoryi Biełarusi kartkami hetaha banka.
