DTZ na pierachodzie
7 śniežnia kala 17:30 kiroŭca aŭtamabila Ford jechaŭ pa praśpiekcie Niezaležnaści z boku vulicy Kalinoŭskaha ŭ napramku vulicy Filimonava. Napieradzie byŭ rehulavany piešachodny pierachod, śviatłafor pracavaŭ. Mašynam zahareŭsia čyrvony, ale kiroŭca nie tarmaziŭ. Paźniej na sudzie jon nie zmoh heta rastłumačyć.
«Ja nie razumieju, što adbyłosia. Nie mahu ničoha patłumačyć: nie tamu, što nie chaču, ja prosta sam hetaha nie viedaju. Ja ničoha nie ŭžyvaŭ, uvaha nie adciahvałasia, ja nie karystaŭsia telefonam, siastra na pasažyrskim miescy naohuł maŭčała», — kazaŭ jon.
Prajeznuju častku pa pierachodzie pierasiakali ludzi, u tym liku Maryna z dvuma dziećmi: trochhadovuju Naściu jana viezła ŭ kalascy, a šaścihadovy Sienia išoŭ pobač. Taksama na pierachod vyjechaŭ viełasipiedyst — Pavieł.
«Bačyŭ zialony sihnał piešachodnaha pierachodu, jon užo doŭha hareŭ — siekund 5 dakładna. Ja pahladzieŭ naleva, bačyŭ mašynu, jakaja nabližałasia, ale była jašče ŭdalečyni. Na supraćlehłym baku mašyny stajali. Adpaviedna, ja pajechaŭ», — raspaviadaŭ jon u sudzie.
Toje, što adbyłosia dalej, vidać na zapisie kamiery videanazirańnia.
«My išli pa znajomym pierachodzie, hareŭ zialony, pobač byli ludzi, ja bačyła mašyny na inšym baku. Toje, što hety aŭtamabil nie źbirajecca spyniacca, ja zrazumieła tolki ŭ toj momant, kali jon urezaŭsia ŭ vazok. Jana prosta vypyrchnuła ŭ mianie z ruk z takim dziŭnym šołacham… Pamiataju, ja stajała i zusim nie razumieła, što adbyvajecca, dzie maje dzieci? Naścia była ŭ kalascy, Sienia išoŭ sa mnoj pobač, trymaŭsia za kalasku. Ja zakryčała «Sienia, Sienia, ty dzie?»A jon stajaŭ pobač sa mnoj i kryčaŭ: «Mama, ja tut». Vakoł byli ludzi», — pryhadvaje Maryna.
Vysnovy śledstva
U vyniku DTZ ciažkija cialesnyja paškodžańni byli pryčynienyja trochhadovaj Naści, a taksama viełasipiedystu Paŭłu.
Kiroŭcu Ford vystavili abvinavačvańnie pa č. 2 art. 317 Kryminalnaha kodeksa («parušeńnie praviłaŭ darožnaha ruchu asobaj, jakaja kiravała transpartnym srodkam, što paciahnuła pa nieaściarožnaści pryčynieńnie ciažkaha cialesnaha paškodžańnia»). Śledstva vyjaviła, što kiroŭca ruchaŭsia pa praśpiekcie ź pieravyšeńniem chutkaści (kala 68 km/h pry dazvolenaj 60 km/h), taksama ŭ aŭtamabila byli niaspraŭnaści chadavoj častki i znošanaja huma.
«Kiroŭca prajaviŭ złačynnuju niadbajnaść, nie źniziŭ chutkaść ruchu, kab sastupić darohu piešachodam, nie spyniŭsia pierad stop-linijaj, vyjechaŭ na rehulavany piešachodny pierachod, dzie ździejśniŭ najezd na piešachodaŭ, jakija pierasiakali prajeznuju častku, dzicia ŭ dziciačym vazku i viełasipiedysta», — ahučyŭ u sudzie dziaržaŭny abvinavaŭca.
Chadajnictva
U sudzie kiroŭca pryznaŭ vinu całkam. Jon dadaŭ, što hłyboka raskajvajecca ŭ zroblenym, a taksama skazaŭ, što chacieŭ by prosta zastacca na voli.
Charakterna, što Maryna, mama paciarpiełaj dziaŭčynki, chadajničała ŭ sudzie ab pryznačeńni abvinavačanamu pakarańnia, nie źviazanaha z pazbaŭleńniem voli.
«Ja ničoha nie patrabuju ad jaho. Dzieci pavinny raści z baćkam, jon narmalny čałaviek. Jon nie byŭ abdołbanym, nie byŭ pjanym. Ja dumaju, ciapier jon budzie jeździć vielmi akuratna, kali naohuł budzie jeździć», — dadała jana.
Pavieł — inšy paciarpieły — taksama zajaviŭ, što nie maje da kiroŭcy pretenzij. Baki paviedamili, što kiroŭca kampiensavaŭ pryčynienuju škodu.
Prysud
U paniadziełak, 13 červienia, sud abviaściŭ pryniataje rašeńnie.
Kiroŭca pryznany vinavatym u złačynstvie, jamu pryznačana pakarańnie ŭ vyhladzie abmiežavańnia voli z nakiravańniem u vypraŭlenčuju ŭstanovu adkrytaha typu na termin 2 hady 6 miesiacaŭ z pazbaŭleńniem prava zajmacca dziejnaściu, źviazanaj z kiravańniem transpartnymi srodkami, na 5 hadoŭ.
