Chacieli pahutaryć «z-za zajavy nieabyjakavaha hramadzianina»

Akazałasia, u toj dzień Aleha Bihiezu zatrymlivali druhi raz. Da hetaha siłaviki prychodzili da jaho jašče 30 maja. Jak raspaviadaje jaho žonka Aksana, supracoŭniki milicyi pryjšli da ich dadomu z žadańniem «parazmaŭlać z Aleham Anatolevičam» z-za zajavy nieabyjakavaha hramadzianina nakont kamientaryjaŭ». Razmaŭlać pry žančynie admovilisia, spasłaŭšysia na toje, što «razmova budzie karotkaj».

— Vyjšli za dźviery, ale praktyčna adrazu viarnulisia pa zabyty telefon muža. Apošniaje, što ja čuła: «Telehramam karystajeciesia?». Adzin z supracoŭnikaŭ viarnuŭsia chvilin praź dziesiać i skazaŭ sabrać dla muža leki z epikryzam (u Aleha mihalnaja arytmija i kamiani ŭ nyrkach). Na pytańnie, kolki lekaŭ davać, skazaŭ «šmat».

Paśla zatrymańnia žonka Aksana stała šukać Alehu advakata. Ale kali znajšła, jurystka skazała, što sudy ciapier prachodziać nastolki chutka, što jany navat nie paśpiejuć padpisać damovu. Tak i vyjšła — surazmoŭnica ŭspaminaje, što na sudovaje pasiadžeńnie nie paśpieła.

— Kala 17 hadzin mnie paviedamili, što Aleh asudžany na 10 sutak pa art. 19.11. Jamu navat dali patelefanavać. Muž skazaŭ, što jaho asudzili za repost z «Našaj Nivy» dačce, tekst byŭ pra kampjutarnuju hulniu, — raspaviadaje Aksana. — Alehu prapanoŭvali zapisać «pakajannaje videa», ale jon nikoli nie išoŭ na kampramis z sumleńniem. Navat prapanavaŭ im novuju farmuloŭku: «Raskajvajusia. Ale vinu nie pryznaju». Admovilisia.

Apisvajučy ŭmovy, u jakich utrymlivaŭsia jaje muž, Aksana adznačaje: jon sychodziŭ u kurtcy i majcy, ale kurtku zabrali ŭ CIP. Jak i tyja rečy, jakija jana pieradała.

— Pryblizna na čaćviortyja sutki jon užo zachvareŭ. Tam chvareli ŭsie. Tempieratura i simptomy byli, jak pry kavidzie. Jon pieradaŭ, kab ja pryniesła leki pa śpisie. Patelefanavali mnie praź dzień. A pieradadzienyja leki (ja adniesła ich u toj ža dzień ranicaj) da jaho dachodzili 3-5 dzion — raspaviadaje žančyna.

«U adzinočnym karcary znachodziłasia 12 čałaviek»

Praź dziesiać dzion Aksana čakała svajho muža ŭ CIP — jaho pavinny byli adpuścić u 11.30. Ale na spravie vyjšła nie tak. Kala 13 hadzin mužčyna patelefanavaŭ z telefona supracoŭnika i skazaŭ nie čakać — jon na dopycie ŭ SK i zatrymany na troje sutak pa padazreńni ŭ ździajśnieńni kryminalnaha złačynstva.

Sam dopyt žančyna apisvaje sa słoŭ muža jak «farmalny»: pytalisia, adkul daviedaŭsia pra «Bajpoł», što čytaŭ tam, što hladzieŭ.

— Aleha dla adbyćcia hetych sutak źmiaścili ŭ IČU ŭ adzinočny karcar, dzie znachodziłasia 12 čałaviek. Navat nie było miesca prysieści na bietonny poł, — raspaviadaje žančyna. — Pra ježu jon nie kazaŭ, ale samaje pakutlivaje było — abychodzicca biez vadkaści. Za troje sutak im tolki adzin raz dali harbatu, astatni čas — vada z-pad krana. U karcary było šmat pažyłych ludziej, a miedsiastra prychodziła navat nie kožny dzień. Heta pry tym, što mnohija majuć patrebu ŭ žyćciova nieabchodnych lekach.

Ciapier Aleh Bihieza znachodzicca na voli — u niadzielu 12 červienia jaho vypuścili pad padpisku ab niavyjeździe.

Ciapier mužčyna lečycca ad imaviernaha karanavirusa i adnaŭlajecca paśla aryštu. Pry hetym kryminalnaja sprava raspačataja, i da suda zastałosia niekalki miesiacaŭ, ale raspaviadać padrabiaznaści pra artykuł i abvinavačvańni Aksana nie moža. Adzinaje ŭdakładnieńnie — pa joj dakładna pahražaje abmiežavańnie abo pazbaŭleńnie svabody. A z paviedamleńnia siłavikoŭ možna vykazać zdahadku, što pryčyna kryminalnaj spravy — paviedamleńni ŭ bocie «Bajpoła».

«Aleh — čałaviek, jakomu škada času na son»

Svajho muža Volha apisvaje jak vielmi intelektualnaha čałavieka, ź jakim možna pahavaryć na lubuju temu. Aleh surjozna zachaplajecca astranomijaj, astranamičnymi zdymkami, praciahvaje vyvučać fiziku.

— Muž nie tracić nivodnaj chviliny darma, zaŭsiody niešta čytaje. Vydatna raźbirajecca ŭ muzycy, lubić ihrać na ŭdarnaj ustanoŭcy. Niekalki hadoŭ tamu viarnuŭsia da šachmat, dasiahnuŭ vielmi vysokich vynikaŭ. Aleh — čałaviek, jakomu škada času na son, bo ŭ hety čas nielha niešta vyvučać. Jašče jon lubić katoŭ: u nas ich dva, z prytułku i z vulicy. Dachod u muža vielmi ścipły, jon jeździć na stareńkim «Volva».

Pra pohlady muža žančyna kaža koratka: jon racyjanalny čałaviek, a jaho palityčnaja pazicyja «nie apazicyjnaja, a adzina pravilnaja».

A voś infarmacyja pra miedcentr «Biełmiedtechnałohii», jakuju apublikavali siłaviki, na spravie nie zusim dakładnaja, udakładniaje Aksana.

— Aleh sapraŭdy tam pracavaŭ, i kiravaŭ im amal 20 hadoŭ. Daktary, łabaranty i miedsiostry z paŭsłova razumieli adzin adnaho. Ale ŭ 2016 hodzie manitorynh nibyta znajšoŭ parušeńni, i licenziju adklikali.

Z tych časoŭ centr spyniŭ isnavańnie, u firmie ciapier paŭtara čałavieka. Pra heta Aleh nieadnarazova kazaŭ supracoŭnikam HUBAZiKa, ale im čamuści zachaciełasia pradstavić niasłušnuju infarmacyju.

Клас
6
Панылы сорам
3
Ха-ха
1
Ого
3
Сумна
15
Абуральна
60