Sučasnyja Smart — heta elektrakary, na jakich pierasoŭvajucca zvyčajna ad doma da kramy. Ale historyja viedaje i sapraŭdnyja «zaradžanyja» Smart ForTwo. I heta nie jaki-niebudź pratatyp, a całkam sabie sieryjny Brabus. U Biełarusi sustreć «brabusaŭski» Smart nialohka, a miančuk sabraŭ jaho ŭłasnaručna.
Aleh kupiŭ Smart ForTwo 2009 hoda. Jak i ŭsie bienzinavyja Smart ForTwo druhoha pakaleńnia, mašyna była abstalavana 1-litrovym ruchavikom. Heta byŭ standartny atmaśfierny varyjant na 61 k. s. Zaraz ža ŭ ruchavym adsieku hetaha haradskoha aŭtamabila bjecca «serca» Brabus. Heta taksama 1-litrovy ruchavik, tolki addača jaho paśla dapracoŭki lehiendarnym atelje vyrasła da 98 k. s. Akramia taho, u Aleha mašyna trochi «prašytaja» da Stage 1, tamu addača 3-cylindravaha ruchavička krychu vyšej.
Kamuści try cylindry i abjom u 999 kuboŭ mohuć zdacca śmiešnymi dla «zaradžanaj» mašyny z takim hučnym łahatypam, jak Brabus, ale nie zabyvajciesia, što heta haradskaja małalitražka z masaj usiaho 795 kiłahramaŭ. Da sotni Smart ForTwo Brabus razhaniajecca za 8,9 siekundy. Dla paraŭnańnia: stokavy Smart z 61-silnym ruchavikom nabiraje 100 km/h prykładna za 17 siekund, a dyzielny — tak i naohuł za tracinu chviliny.
Aleh nabyŭ hetuju mašynu kala šaści hadoŭ tamu. U jaho jość druhaja mašyna — Mitsubishi Colt z ruchavikom mahutnaściu 350 k. s. i ciahaj 500 N·m. Na joj jon nie prosta jeździć pa spravach, ale i ŭdzielničaje ŭ spabornictvach.
Adnojčy ŭ Mitsubishi «źloh» ruchavik. Chłopiec zastaŭsia biez aŭto. Pačaŭ manitoryć rynak. Hrošaj było niašmat, i ŭ moj biudžet traplała adno «hnille» kštałtu starych Civic. Vyrašyŭ hladzieć na bolš novyja madeli — i źviarnuŭ uvahu na Smart. Mašyna Płastykavaja — značyć, nie ržavieje. Ekanamičnaja i zručnaja ŭ horadzie, — raspaviadaje Aleh.
Siońnia chłopiec užo nie pamiataje dakładna, kolki addaŭ za mašynu, ale prykładna heta było $4600—4800 pa kursie.
61 k. s. dla horada chapała. Ale paśla 350-silnaha Colt Alehu ciahi brakavała. U adzin momant u rabatyzavanaj skrynki pieradač Smart ForTwo vyjšła z ładu sčapleńnie.
Jon prykinuŭ, što na zamienu sčapleńnia i ramont treba budzie vydatkavać kala $ 500. A na razborcy ŭ adnych chłopcaŭ lažaŭ «brabusoŭski» ruchavik. Syšlisia na $ 1300 u ekvivalencie.
Za $1300 chłopiec atrymaŭ ruchavik z karobkaj pieradač i padramnikam. Adzinaje, čaho nie chapała, — heta vychłap. Ruchavik byŭ ź nievialikim prabieham i ŭ idealnym stanie. Amal usie pracy pa svapu Aleh rabiŭ sam ź siabrami. Dalaraŭ 200 pa kursie addaŭ za elektryku. U vyniku pieratvareńnie zvyčajnaha Smart ForTwo ŭ Brabus kaštavała prykładna $ 1500 u ekvivalencie (heta bieź źniešnich dapracovak).
Zaraz ad aryhinalnaha Brabus mašynu Aleha adroźnić amal niemahčyma. Akramia sałona, tut usio hetak ža, jak u sapraŭdnaha Brabus ForTwo. Chłopiec ustalavaŭ na mašynu aryhinalnaje abvažvańnie, ciuninh-padviesku, firmovyja kołavyja dyski. Akramia taho, na aŭtamabil ustanoŭlena rasšyreńnie, jakoje było tolki ŭ limitavanaj sieryi Brabus Ultimate. Aleh zajmajecca amatarskimi honkami, tamu, viadoma ž, pravieryŭ, za kolki jaho abnoŭlenaja mašyna prajazdžaje 402 mietry. Vynik — 17 siekund.
Smart z 100-silnym ruchavikom dazvalaje pierasoŭvacca nie tolki pa horadzie, naš hieroj jeździć na mašynie navat u Maskvu. Na mašynu ŭstanoŭlenyja 16-calevyja koły Brabus. Dyski davoli ciažkija, zatoje vyhladajuć vielmi pryhoža. Kaštavali takija koły 50 tys. rasijskich rubloŭ. Abvažvańnie abyšłosia ŭ $ 650 pa kursie (taksama kuplałasia ŭ Rasii). U Minsku mašynu pafarbavali i pryviali ŭ naležny vyhlad.
— Na stendzie razahnaŭ jaje da 193 km/h. Pa trasie trymać chutkaść 100—130 km/h možna biez składanaści z vysokim uzroŭniem kamfortu. Zrazumieła, što pa ŭstojlivaści na darozie Smart nielha paraŭnoŭvać z bujnym siedanam, ale mahutnaści ruchavika dla dynamiki chapaje. U pryncypie, mašyna zastajecca pieravažna haradskoj, — ličyć Aleh.
