Fota AP
Čaho chacieli?
Z boku Ukrainy adkaz na hetaje pytańnie adnosna prosty: zadača minimum — adbić rasijskuju ahresiju, zachavaŭšy dziaržaŭnaść i terytaryjalnuju cełasnaść pa stanie chacia b na 23 lutaha 2022 hoda, zadača maksimum — viarnuć Danbas i Krym.
Nie mienš važna dla Ukrainy ŭ ciapierašnich realijach minimizavać straty, źbierahčy ekanamičny patencyjał i ŭlicca ŭ jeŭrapiejskuju palityka-ekanamičnuju sistemu.
Z metami Rasii ŭsio idzie składaniej. Palitra čakańniaŭ prychilnikaŭ abvieščanaj Pucinym «śpiecyjalnaj vajskovaj apieracyi» vielmi malaŭničaja.
Fota AP
Sam Pucin abaznačyŭ metami ŭvarvańnia va Ukrainu jaje «demilitaryzacyju» i «denacyfikacyju», a taksama vyzvaleńnie žycharoŭ samaabvieščanych DNR i ŁNR ad «hienacydu».
Praź piać dzion paśla rasijskaha ŭvarvańnia va Ukrainu ministr abarony Siarhiej Šajhu abaznačyŭ jašče adnu metu: abaranić Rasiju ad vajennaj pahrozy, stvoranaj krainami Zachadu.
Pa miery ŭśviedamleńnia taho, što «śpiecyjalnuju vajennuju apieracyju» chutka skončyć nie atrymajecca, jaje mety i zadačy, jakija dekłarujucca rasijskimi ŭładami i prapahandystami, mianialisia, ale nie va ŭsich antahanistaŭ Ukrainy byli adnolkavyja. Tak, były kamandujučy ŭzbrojenymi siłami samaabvieščanaj DNR Ihar Hirkin (Strałkoŭ), jaki adznačyŭsia ŭ 2014 hodzie ŭvarvańniem na čale atrada bajevikoŭ u Danbas, ličyć hałoŭnaj zadačaj tak zvanaj śpiecapieracyi razhrom ukrainskich uzbrojenych sił i nie maje ničoha suprać likvidacyi ŭkrainskaj dziaržaŭnaści.
Ale nie ŭsie prychilniki abvieščanaj Pucinym «śpiecapieracyi» takija radykalnyja, jak Hirkin. Adny vystupajuć za farmavańnie ŭ Kijevie maryjanietkavaha ŭrada, inšyja — za prabićcio suchaputnaha kalidora ŭ anieksavany Krym, trecija — za dałučeńnie da Rasii šerahu abłaściej Ukrainy. Naprykład, pryznačanyja Maskvoj akupacyjnyja ŭłady Chiersona to źbirajucca prasić Pucina prosta dałučyć rehijon da Rasii, to kažuć pra refierendum pa ŭvachodžańni ŭ skład RF.
Na bryfinhu minabarony Rasii, pryśviečanym vynikam pieršaha miesiaca bajavych dziejańniaŭ, pradstaŭniki viedamstva zajavili, što mety «pieršaha etapu śpiecapieracyi» vykananyja: moc ukrainskaj armii padarvanaja, vajennaja infrastruktura i technika praciŭnika źniščanyja. Na druhim etapie, pa zajavach minabarony, Rasija zasiarodzicca na ŭstalavańni poŭnaha kantrolu nad Danbasam.
Nieŭzabavie paśla hetaj zajavy rasijskija vojski adstupili z-pad Kijeva, Čarnihava, Charkava i Sum, zasiarodziŭšy namahańni na zachopie Danbasa.
Situacyja na frantach
Paŭnočny zachad — poŭnač
Fota AP
Niahledziačy na advod rasijskich vojskaŭ, USU vymušanyja trymać značnyja siły na poŭnačy — ad polskaj miažy da Dniapra, a taksama ŭ Čarnihaŭskaj i Sumskaj abłaściach — dla adbićcia mahčymaha paŭtornaha nastupu.
Patencyjnuju pahrozu ŭjaŭlaje i armija susiedniaj Biełarusi, kiraŭnik jakoj, Alaksandr Łukašenka, demanstruje poŭnuju łajalnaść Kramlu: jon daŭ terytoryju krainy dla napadu na Ukrainu, a ciapier robić vajennyja manieŭry blizu ŭkrainskich miežaŭ.
Ale, jak ličać ekśpierty, uładam Biełarusi nie chočacca padzialać z Rasijaj adkaznaść za vajennuju ahresiju. Akramia taho, u vypadku ŭvarvańnia biełaruskaj armii va Ukrainu ryzyka jaje razhromu vysokaja, a heta nie abiacaje ničoha dobraha režymu Łukašenki.
Paŭnočny uschod — uschod
Rasijskija vojski kantralujuć paŭnočnuju, uschodniuju i paŭdniova-ŭschodniuju častki Charkaŭskaj vobłaści, a taksama amal usiu Łuhanskuju vobłaść, za vyklučeńniem pramzony ŭ Sievieradaniecku, susiedniaha Lisičanska i jašče niekalkich viosak.
Na podstupach da sievieradanieckaj ahłamieracyi ciapier iduć samyja žorstkija bai, rasijskaja armija sprabuje vybić ukrainskija vojski z zavoda «Azot» u Sievieradaniecku i akružyć Lisičansk z poŭdnia z dvuch kirunkaŭ. Ukrainskaja armija sprabuje kontratakavać z zachadu raźmieščanuju na ŭschod ad Charkava rasijskuju hrupoŭku, ale vialikaj pahrozy jaje dziejańni na dadzieny momant nie ŭjaŭlajuć.
Rajony Ukrainy pad kantrolem rasijskich vojsk
Paŭdniovy uschod
U adroźnieńnie ad Łuhanskaj vobłaści, jakaja amal całkam pierajšła pad kantrol rasijskich sił, situacyja vakoł Daniecka nie raduje rasijskaje kamandavańnie. Niahledziačy na šmatlikija ataki, ukrainskija vojski zachavali svaje pazicyi i ciapier amal bieśpierapynna viaduć ahoń pa abłasnym centry. Heta nanosić Rasii nie stolki vajenny, kolki imidžavy ŭron — voś tak abaranili Danbas!
Poŭdzień
Rasijskaje vojska kantraluje bolšuju častku Chiersonskaj vobłaści i častku Zaparožskaj — hetyja terytoryi byli zaniatyja ŭ pieršyja dni ŭvarvańnia. Na hetym učastku frontu inicyjatyvaj vałodaje ŭkrainskaje vojska. U apošnija dni pastupali paviedamleńni ab prasoŭvańni ŭkrainskich vojskaŭ u napramku Chiersona i navat ab vychadzie asobnych častak USU na ŭskrainu abłasnoha centra. Ukrainskija ŭłady hetuju infarmacyju nie paćviardžajuć, ale i nie abviarhajuć.
Ludskija straty
Ni Rasija, ni Ukraina nie raskryvajuć svaje bajavyja straty.
Pa danych Hienštaba Ukrainy, kolkaść zahinułych rasijskich vajskoŭcaŭ składaje 34430 čałaviek.
Da hetych ličbaŭ varta stavicca z aściarožnaściu — vajujučyja baki, jak praviła, zavyšajuć kolkaść strat praciŭnika.
Brytanskaja raźviedka aceńvała rasijskija bajavyja straty va Ukrainie na kaniec maja prykładna ŭ 15 tysiač čałaviek.
Apošni raz minabarony Rasii aficyjna adčytałasia ab stratach 25 sakavika, paviedamiŭšy pra hibiel 1351 vajskoŭca. Śpis strat, sabrany «Bi-bi-si» pry dapamozie kamandy vałancioraŭ, da pačatku červienia składaŭsia z 3052 zahinułych.
Pra straty ŭkrainskaha boku dakładnaj infarmacyi taksama niama. Kiraŭnik ukrainskaj delehacyi na pieramovach z Rasijaj David Arachamija padčas niadaŭniaha vizitu ŭ Vašynhton zajaviŭ, što ŭ Danbasie štodnia hinuć ad 200 da 500 čałaviek za dzień.
Prezident Ukrainy Uładzimir Zialenski 1 červienia kazaŭ, što kraina štodnia hublaje «ad 60 da 100 sałdat zabitymi i kala 500 čałaviek paranienymi ŭ bai».
10 červienia daradca kiraŭnika ofisa prezidenta Ukrainy Michaił Padalak aceńvaŭ štodzionnyja straty ŭkrainskich sił u 100-200 vajskoŭcaŭ zabitymi. Kolkaść zahinułych hramadzianskich asob na hety momant nie ŭstanoŭlenaja.
AAN maje paćvierdžanyja danyja pra 4634 zahinułych i 5769 paranienych mirnych žycharoŭ, ale ŭ arhanizacyi ŭpeŭnienyja, što hetyja ličby našmat bolšyja.
Biežancy i škoda ŭkrainskaj ekanomicy
Pa danych Upraŭleńnia viarchoŭnaha kamisara AAN pa spravach biežancaŭ, z 24 lutaha pa 16 červienia 7,7 młn čałaviek pakinuła Ukrainu, bolšaść ź ich — 7,1 młn čałaviek — vyjechali ŭ krainy Jeŭrasajuza. Viarnulisia ŭ krainu amal 2,6 młn čałaviek. Ale heta nie poŭnaja statystyka — u jaje ŭvajšli tolki tyja ludzi, chto aficyjna pierasiek miažu. Da taho ž jana nie ŭličvaje ŭnutranyja pieramiaščeńni, źviazanyja z vajennymi dziejańniami.
Tak, pa padlikach Mižnarodnaj arhanizacyi pa mihracyi (MAM), amal 14 miljonaŭ ukraincaŭ byli vymušanyja pakinuć svaje damy, miljony ludziej stracili pracu. Pa miery prasoŭvańnia rasijskich vojskaŭ va ŭschodnich abłaściach Ukrainy hetyja ličby praciahvajuć raści. U AAN zajaŭlajuć, što na siońniašni dzień u terminovaj humanitarnaj dapamozie i abaronie majuć patrebu prynamsi 15,7 młn žycharoŭ Ukrainy.
«Na poŭnačy Ukrainy ŭžo mnohija ludzi viarnulisia ŭ rodnyja miaściny. U pryvatnaści, u Kijevie kolkaść takich repatryjantaŭ nabližajecca da miljona čałaviek, — kaža namieśnik kiraŭnika misii MAMva Ukrainie Styvien Rodžiers. — Pry hetym 33% žycharoŭ centralnaha rehijona i 21% nasielnictva poŭnačy krainy, jakija ŭžo viarnulisia, vyjavili svaju majomaść źniščanaj».
Što ž tyčycca vajskovych vydatkaŭ Ukrainy, to, pavodle acenak ahienctva ZŠA pa mižnarodnym raźvićci (USAID), jany składajuć 5-6 młrd dalaraŭ štomiesiac.
Kiraŭnik USAID Samanta Paŭer nazyvaje hetyja vydatki ašałamlalnymi — pa jaje słovach, navat tych 7,5 młrd dalaraŭ, jakija administracyja ZŠA rychtujecca vyłučyć u jakaści dapamohi Ukrainie, nie chopić, kab pakryć vyklikanyja vajnoj vydatki.
«My viedajem, što hetych hrošaj nie chopić, my viedajem, što ŭ dalejšym spatrebicca jašče vialikaja pramaja biudžetnaja padtrymka», — zajaviła jana.
A što ŭ Rasii?
Paśla napadu na Ukrainu suprać Rasii ŭviali žorstkija sankcyi. Kraina apynułasia faktyčna adrezanaj ad suśvietnaj finansavaj sistemy, pazbaviłasia zachodnich technałohij i prefierencyj u handli, straciła častku hramadzianskaj avijacyi i pałovu nazapašanych reziervaŭ.
