3 miesiacy marnych sprob, a potym «nacisnuŭ na žal»
Biełarus Andrej žyvie ŭ Polščy, jaho maci źbirałasia pryjechać da jaho ŭ hości, ale joj było nialohka: try miesiacy žančyna nie mahła zarehistravacca na padaču dakumientaŭ. Ale 8 červienia heta atrymałasia zrabić.
— Bolš za try miesiacy maja mama biespaśpiachova sprabavała zarehistravacca praź vizavy centr — nakolki viedaju, praz sajt konsulstva ciapier nie zapisvajuć. U vyniku ja adpraviŭ niekalki elektronnych listoŭ u vizavy centr i va ŭsie konsulstvy z prośbaj zapisać jaje, źlohku cisnuŭ na žal: maŭlaŭ, daŭno nie bačylisia, a sam pryjechać nie mahu. Na niejki vynik nie asabliva raźličvaŭ, ale ŭsio ž pasprabavaŭ, — kaža Andrej.
U vyniku jaho maci patelefanavali ź vizavaha centra ŭ Homieli, chacia žančyna žyvie ŭ Hrodnie, i skazali, što jana zapisanaja na 8 červienia.
— Bližej, vidać, ničoha nie znajšłosia. Tym nie mienš, kali tak doŭha sprabuješ zapisacca, možna i ŭ Homiel źjeździć. Dakumienty padadzienyja, ciapier čakajem vizu, — adznačaje mužčyna.
U čarzie na padaču byŭ 578-m
Minčanin Alaksandr naohuł nie manitoryŭ padaču na turystyčny šenhien anłajn, a prosta pryjšoŭ da vizavaha centra Italii. Heta było prykładna na pačatku krasavika.
— Pryjšoŭ udakładnić, jak naohuł patrapić u vizavy centr, bo nikoli praź jaho nie padavaŭ: usie minułyja vizy afarmlaŭ praź vizavy centr Litvy, — tłumačyć mužčyna.
Akazałasia, što na padaču dakumientaŭ u vizavy centr jość žyvaja čarha, u jakuju minčanin i zapisaŭsia — staŭ 578-m.
— Pieršapačatkova mnie skazali, što treba adsočvać svaju čarhu ŭ vajbier-hrupie, kudy mianie adrazu i dadali vałanciory, i što prykładna praz dva tydni ja ŭžo zmahu padacca. Ale na praciahu niekalkich dzion ja zrazumieŭ, što pośpiechu čakać nie varta, bo z žyvoj čarhoj byli vialikija ciažkaści. I ja pačaŭ manitoryć sajt vizavaha centra, — uspaminaje jon.
13 krasavika Alaksandru paščaściła ŭbačyć padśvietlenyja akiency na 14 červienia, i jon adrazu ž zarehistravaŭsia.
— Atrymlivajecca, što pracedura i čakańnie zaniali dva miesiacy. Chacia na pačatku krasavika ja taksama telefanavaŭ u vizavy centr — dziaŭčyna z koł-centra skazała, što zapis u najlepšym vypadku budzie tolki na siaredzinu lipienia i što treba prosta manitoryć ich sajt na hetyja daty. Čysta vypadkova zabraniravaŭ na 14 červienia dvaich čałaviek, — kaža mužčyna.
Łajfchakam zapisu na italjanskuju vizu padzialiłasia i Ksienija.
— Biez prablem zapisałasia i atrymała vizu ŭ pasolstvie Italii — nie błytajcie ź vizavym centram. Zapis u pasolstva praz sajt, i jość dastupnyja daty, — adznačyła jana.
Za miesca ŭ čarzie — 850 rubloŭ
Jaŭhien aburajecca kaśmičnymi cenami tolki za miesca ŭ čarzie na padaču dakumientaŭ u Polšču.
— Ciapier, kab zajmieć miesca, naprykład, u čarzie na vizu ŭ Polšču, pierakupy prapanujuć pradać jaho za 850 rubloŭ. Maja susiedka źviazvałasia z adnoj z takich kampanij: heta tolki košt čarhi na padaču dakumientaŭ u vizavy centr. Jana chacieła praciahnuć dziciaci navučalnuju vizu, ‒ adznačaje jon.
Čytač Źmicier raspaviadaje pra nižejšyja košty ŭ čarzie na polski šenhien. Jon kaža, što niechta zachoplivaje miescy i potym pradaje ich pa 500 rubloŭ. Z-za hetaha Źmicier nijak nie moža złavić svabodnyja akiency i zarehistravacca.
Z padobnaj prablemaj dniami sutyknuŭsia i čytač Andrej. Jon sprabavaŭ padacca praz kampaniju, zapłaciŭšy za miesca ŭ čarzie.
— Biaruć šalonyja hrošy, nie havorać pra ryzyki, prymajuć lubyja dakumienty na padstavie taho, što ŭsio padychodzić, i adpraŭlajuć u pasolstvy tych krain, dzie niama čerhaŭ. A kali prychodzić admova, kažuć, što papiaredžvali klijentaŭ, chacia jany hetaha nie rabili», — narakaje małady čałaviek.
Fota: pixabay.com
Amal čatyry miesiacy čakaje pašparty ź vizavaha centra
Taćciana padała dakumient na brytanskuju vizu ŭ minski vizavy centr jašče ŭ lutym. Da hetaha času vizu žančynie nie vydali, jak i nie paviedamili terminy viartańnia pašparta.
— My padalisia 22 lutaha. Viza turystyčnaja, standartnaja, na šeść miesiacaŭ. Aficyjnyja terminy razhladu byli da šaści tydniaŭ. Siońnia ŭžo amal čatyry miesiacy, jak u nas niama adkazu ad vizavaha centra. Adziny sposab źviazacca z VC — praz complaints-formu, — adznačaje žančyna.
Pieršy raz jana zapoŭniła formu i źviarnulisia ŭ centr pa adkaz u krasaviku.
— Pastupiŭ standartny adkaz, što terminy razhladu ad ich nijak nie zaležać i pašpart na razhladzie ŭ pasolstvie. Druhi zapyt adpravili dniami — pakul adkazu niama. U fejsbuk-hrupie šmat inšych biełarusaŭ pišuć, što padalisia ŭ lutym i nie atrymali adkazu da hetaha času. Na sajcie gov.co.uk infarmacyja pra terminy razhladu dakumientaŭ nie źmianiłasia. Z ambasadaj možna źviazacca tolki praz brytanski numar pa vielmi darahoj płatnaj telefonnaj linii», — kaža Taćciana i nie viedaje, kali jana viernie svoj pašpart.
