Jak paviedamlała ŭkrainskaje Minabarony, šeść rasijskich samalotaŭ Tu-22M3 vykanali puski 12 kryłatych rakiet Ch-22. Rubiež pusku — rajon horada Pietrykaŭ, niedaloka ad Mazyra, aryjencirovačna za 50—60 kiłamietrach ad dziaržaŭnaj miažy Ukrainy.

«Bambaviki ŭźlatali z aeraporta «Šajkoŭka» Kałužskaj vobłaści RF. Dalej praz terytoryju Kałužskaj i Smalenskaj abłaściej uvachodzili ŭ pavietranuju prastoru Biełarusi. Paśla pusku rakiet viartalisia ŭ aeraport «Šajkoŭka» na terytoryi RF. Udar nanosiŭsia pa Kijeŭskaj, Čarnihaŭskaj, Sumskaj abłaściach», — zajaviła Ministerstva abarony Ukrainy.

Biełaruski vajskovy ekśpiert Alaksandr Alesin miarkuje — samaloty stralali ź Biełarusi praz asablivaści bojeprypasaŭ.

Alaksandr Alesin

«Mahčyma, što kali stralali z terytoryi Biełarusi, to ŭžyvali bojeprypasy, adlehłaść jakich nie dazvalaje dasiahnuć abjektaŭ, kali b stralali z terytoryi Danbasa albo RF», — kaža Alesin.

Takuju viersiju nie vyklučaje i ŭkrainski vajskovy ahladalnik Ihar Leŭčanka:

«Rasija vykarystoŭvała staryja savieckija rakiety. U ich ciažkaja bojehałoŭka, ale vialikaje adchileńnie, heta staraja technika. Tamu isnuje mierkavańnie, što rasijanie vopytnym šlacham pryjšli da taho, što, kab takoj rakietaj trapić choć kudy, adlehłaść musić być nie bolšaja za 200—250 kiłamietraŭ. To-bok, kab trapić niedzie pa Kijevu, stralać treba amal ź miažy Biełaruś-Ukraina. 

Na karyść hetaj viersii kaža i situacyja na poŭdni: tam rasijskija bambaviki taksama pačali stralać z adlehłaści kala sta kiłamietraŭ, a raniej zapuski išli z 500—600 kiłamietraŭ. 

Heta moža śviedčyć taksama pra toje, što sučasnych rakiet u Rasii zastałosia nie tak mnoha i ich ekanomiać dla niejkich supiervažnych abjektaŭ.

Taksama Rasii vyhadna adnavić svaje dziejańni z pavietranaj prastory Biełarusi prosta dla demanstracyi i Łukašenku, i ŭsiamu śvietu, što nikudy toj nie padzieniecca. Čarhovy raz pakazać, što na subjektnaść Biełarusi ci jaje kiraŭnictva Rasija prosta nie źviartaje ŭvahi». 

Jak moža na heta adkazać Ukraina. Stralać pa terytoryi Biełarusi?

«Adkaz Ukrainy moža być simietryčnym i asimietryčnym, — razvažaje Alesin. — Simietryčny: vykarystać apieratyŭna-taktyčnyja kompleksy «Točka U», jakija majuć Uzbrojenyja siły Ukrainy. Ź ich dapamohaj pasprabavać udaryć pa važnych abjektach infrastruktury, jakija raźmieščanyja na adlehłaści prykładna 100 kiłamietraŭ ad miažy z Ukrainaj.

Ale takija rakiety mohuć być źbityja biełaruskaj supraćpavietranaj abaronaj ci padaŭlenyja rasijskimi zienitna-rakietnymi kompleksami «S-400». Ci paŭpłyvaje taki ŭdar na ŭstupleńnie Biełarusi ŭ vajnu, vyrašać užo Łukašenku». 

«Asimietryčny adkaz — heta sproba dyviersijna-raźviedvalnych hrup trapić na miesca dysłakacyi kompleksaŭ «Iskander» albo ŭ rajony aeradromaŭ i pasprabavać paškodzić albo kompleksy, albo samaloty, albo sistemy, jakija zabiaśpiečvajuć ich funkcyjanavańnie (składy bojeprypasaŭ, paliva i hetak dalej)», — kaža Alesin. 

Što tyčycca viersii z pravakacyjaj, kab Biełaruś uciahnuć u vajennyja dziejańni, to Biełaruś da hetych dziejańniaŭ nie hatovaja, ličyć ekśpiert. U nas prosta brakuje vojska. I asnoŭnyja biełaruskija siły ŭsio jašče raźmieščanyja na Zachadzie, na miežach z Polščaj, krainami Bałtyi. 

«Kab udzielničać u vajnie, Biełarusi treba mabilizavać zapaśnikoŭ, źniać techniku z zachoŭvańnia. Inakš toje buduć nikčemnyja šturchieli, — miarkuje Alaksandr Alesin. — Voś kali my ŭbačym, što Łukašenka mabilizuje vojska da ličby 150 tysiač — suprać siońniašnich 60—65 tysiač — voś tady možna budzie naściarožvacca».

Pra adkaz Ukrainy Ihar Leŭčanka kaža: źbić rasijskija samaloty, jakija stralajuć ź biełaruskaj pavietranaj prastory, ukraincy pakul nie mohuć.

Ihar Leŭčanka

«Abjektyŭna, naziemnyja srodki supraćpavietranaj abarony pracujuć na adlehłaść da 100 kiłamietraŭ,— padkreślivaje ukrainski analityk. — Rakiety kłasa «pavietra-pavietra» jość na Zachadzie, u teoryi Ukraina zmoža ich atrymać, tolki kali atrymaje amierykanskija bajavyja samaloty. A heta sprava nie vielmi dalokaha času, ale i nie vielmi blizkaha.

Jašče momant — samaloty, jakija abstrelvali Ukrainu, vylatali z rasijskich aeradromaŭ. Kali b jany padymalisia ź biełaruskich aeradromaŭ, tady b užo išła havorka pra paražeńnie sistemaj «Točka U» tych aeradromaŭ. Ale ciažka razvažać, čym by skončyłasia — rašeńnie adkazvać stralboj pa biełaruskich aeradromach budzie mieć palityčny charaktar i jaho prymać palityčnamu kiraŭnictvu Ukrainy».

Atrymlivajecca, rasijanie vynajšli idealnuju dla siabie taktyku — jany ź biełaruskaj pavietranaj prastory bjuć pa Kijevie, Sarnach, Koraścieni, a Ukrainie niama jak adkazvać? Bambić Biełaruś niemetazhodna, źniščyć avijacyju RF pakul niama mahčymaści.

«Tak, tut bambić biełaruskuju terytoryju niełahična. Ale takija dziejańni Rasii i pryviazvajuć usio bolš Łukašenku da Pucina, robiać ź jaho takoha ž vajennaha złačyncu», — miarkuje Ihar Leŭčanka.

«Kali kazać pra ŭkrainskich dyviersantaŭ na terytoryi Biełarusi, to ŭ vas ža isnuje svoj partyzanski ruch. Dniami pačała źjaŭlacca infarmacyja, što Biełaruś budzie pieradavać Rasii bojeprypasy, mahčyma, vajennuju techniku. Heta ž budzie iści pa čyhuncy — ja b nie vyklučaŭ dyviersij, ale chto ich budzie ažyćciaŭlać, skazać ciažka», — dapuskaje Leŭčanka.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?