Kali ad Aleha pierastali prychodzić listy, žonka Marjana napisała hruntoŭny list kiraŭnictvu kałonii, adpraviła jaho pa pošcie i zapisałasia na 28 červienia na pryjom da načalnika papraŭčaj ustanovy. I choć napiaredadni, 27 červienia, list ad Aleha pryjšoŭ i žonka viedała pra toje, što Aleha ŭ druhi raz źmiaścili ŭ ŠIZA, svoj vizit jana nie admianiła, pajechała ŭ Mahiloŭ. Chacieła na ŭłasnyja vočy pahladzieć, dzie siadzić muž, pa-čałaviečy pahavaryć z kiraŭnictvam kałonii.
Jaje list načalnik kałonii jašče nie pračytaŭ — maŭlaŭ, ich prychodzić vielmi šmat, i spačatku listy čytajuć pamočniki.
«Asnoŭny moj pasył u liście byŭ — kab da Aleha stavilisia pa-čałaviečy. Jak «vučyłka», ja napisała charaktarystyku Alehu, što jon pavažany žurnalist, dobry siemjanin, prystojny čałaviek», — raskazała žonka.
Kali načalnik kałonii daviedaŭsia, što sprava tyčycca palitźniavolenaha, skazaŭ: «Usio zrazumieła».
Paklikaŭ jašče adnaho supracoŭnika, maładziejšaha — Marjana miarkuje, što heta byŭ kamandzir atrada, u jakim siadzić Aleh. Zapytaŭsia, ci padavaŭ źniavoleny Hruździłovič zajavu, kab jaho intaresy chtości pradstaŭlaŭ. Toj supracoŭnik adkazaŭ, što nie.
«Ja vam nijakaj infarmacyi davać nie budu. U vas niama zajavy ad muža, što vy možacie pradstaŭlać jaho intaresy. Pavinna być zajava, maŭlaŭ, adkul ja viedaju, jakija pamiž vami stasunki? Moža, drennyja, i jon nie choča?» — emacyjna zhadvaje Marjana razmovu z načalnikam kałonii.
Žonka sprabavała vyśvietlić, za što kankretna, za jakuju pravinu Aleh dva razy zapar traplaŭ u ŠIZA. Zapytałasia taksama, za što jaho pazbavili doŭhaha i karotkaha spatkańniaŭ i pieradačy, ci moža jana dasłać chacia b banderol ź vitaminami.
«Jon vielmi hruba adkazaŭ, što nijakaj infarmacyi mnie davać nie budzie. Maŭlaŭ, «niachaj jon vam sam paviedamić». Čałaviečaj razmovy nie atrymałasia», — kaža žonka Hruździłoviča.
3 sakavika Aleha Hruździłoviča asudzili na 1,5 hoda kałonii. Jaho abvinavacili ŭ troch epizodach udziełu ŭ masavych biesparadkach padčas pratestaŭ 2020 hoda, jon aśviatlaŭ akcyi jak žurnalist. Taksama Hruździłoviču vystavili isk na 56 tysiač rubloŭ.
