«Raniej karystalisia papularnaściu abjekty da 15 tysiač dalaraŭ, a ciapier — da 10 tysiač»

Niekalki miesiacaŭ zapar na rynku zaharadnaj nieruchomaści pavialičvajecca kolkaść prapanoŭ. Červień nie staŭ vyklučeńniem.

— My sa ździŭleńniem vyjavili, što kala 18-20% (dastatkova vialikaja dola) — heta abjekty, jakija pradajucca pa davieranaści. Vialikaja vierahodnaść, što heta abjekty tych ludziej, jakija pakinuli krainu, — adznačaje mieniedžar adździeła zaharadnaj nieruchomaści ahienctva «Tvaja stalica» Łarysa Samusienkava. — Dla paraŭnańnia, na rynku kvater pa davieranaści pradajecca kala 12%.

Sprava ŭ tym, što kvateru zvyčajna pradajuć u tym vypadku, kali sapraŭdy nie źbirajucca viartacca. A zaharadnuju nieruchomaściu pradajuć jak «najmienšuju ź bied».

Časta abjekty, jakija pradajucca pa davieranaści, vystaŭlajucca pa cenach krychu nižej za rynak. I tamu hetyja damy i dačy chutka znachodziać pakupnikoŭ.

 

Siarod tendencyj červienia Łarysa nazyvaje pamianšeńnie biudžetu na kuplu damoŭ i leciščaŭ.

— Kali letaś kala 60-70% abjektaŭ, što karystalisia popytam, byli da 15 tysiač dalaraŭ, to ciapier hetaja suma źniziłasia da 10 tysiač.

U minułym hodzie ludzi dastatkova aktyŭna vykarystoŭvali kredyty: paśla stresavaha 2020 hoda 2021-y zdavaŭsia aptymistyčnym. U hetym siezonie pakupniki kažuć, što nie paciahnuć kredyt: dachody stali mienšyja. Najbolš zapatrabavany ciapier biudžetny siehmient — dačy i ščytavyja domiki koštam da 5-7 tysiač dalaraŭ. Na druhim miescy — abjekty krychu daražejšyja i z vyhodami — da 10-12 tysiač dalaraŭ. Kamfortnaja alternatyva kvatery ź viasny da kanca vosieni. Niahledziačy na toje, što ŭ nas adčynili miežy, košt pa-raniejšamu vysoki i ludzi razumiejuć, što ŭ najbližejšyja hady buduć adpačyvać na radzimie.

Pavodle danych ahienctva «Tvaja stalica», samyja papularnyja napramki — Łahojski, Miadzielski i Rakaŭski.

«Za dva adpačynki ŭ Turcyi možna kupić daču pad Minskam»

— Ź siaredziny maja popyt jak na zaharadnuju nieruchomaść, tak i na kvatery značna vyras. I hetamu jość dźvie pryčyny, — kamientuje namieśnik dyrektara ahienctva «Avanhard Nieruchomaść» Alaksandr Łazaraŭ. — Pa-pieršaje, viasnoj ludzi źniali valutnyja nazapašvańni i ciapier chacieli b ich ukłaści ŭ nieruchomaść, ale ŭ kvaterach jany mohuć nie mieć patreby. Darečy, u nas ciapier jość niekalki inviestycyjnych ździełak z zaharadnaj nieruchomaściu. Ludzi kuplajuć niedarahi ŭčastak z prostym domikam: «Niachaj jon u nas budzie, a potym vyrašym, što tam pabudavać». Raniej takich ździełak ja nie zhadaju — zvyčajna ludzi kuplali ziamlu, kab adrazu budavacca.

Druhaja pryčyna rostu cikavaści da zaharadnaj nieruchomaści — padaražeńnie adpačynku za miažoj i składanaści ź vizami.

— Takim mierkavańniem dzielacca klijenty: naprykład, adpačynak u Turcyi dla siamji z dvuma dziećmi ŭ niadrennym hateli ciapier abydziecca ŭ 3-4 tysiačy jeŭra. Atrymlivajecca, što za dva takija vodpuski možna kupić pad Minskam niedarahuju daču.

Što da koštaŭ na dačy, jakija karystajucca papularnaściu, pa nazirańniach Alaksandra, jość dva siehmienty.

Pieršy — heta «savieckija dačy» za 10-20 tysiač dalaraŭ da 20 km ad Minska. Heta zvyčajnyja ščytavyja damy staroj pabudovy, prydatnyja dla siezonnaha žyćcia. I druhi siehmient — sučasnyja. Heta karkasnyja ci błokavyja damy z sučasnym ramontam i cikavaj płaniroŭkaj. Takija abyducca ŭ 45-60 tysiač dołaraŭ.

Kali kazać nie tolki pra dačy, ale i pra zaharadnyja damy, Alaksandr adznačaje popyt va ŭsich cenavych katehoryjach. A pa adlehłaści pakupniki čaściej za ŭsio žadajuć nabyć dom nie dalej za 35 km ad Minska.

— U kampanii pradajucca abjekty ad 7 da 800 tysiač dalaraŭ, i ciapier da ŭsich jość cikavaść. Za apošni miesiac u nas zabrali šmat leciščaŭ i damoŭ, da jakich u sakaviku-krasaviku, kali jany pastupili, absalutna nie było cikavaści. Darečy, košty na ich zastalisia takimi ž. Adzinaje, što nie karystajecca popytam, — heta niedabudavanyja i zakansiervavanyja budynki ŭ dyjapazonie 50-100 tysiač dalaraŭ. Takija abjekty pradajucca tolki koštam — ich kuplajuć u tym vypadku, kali pastavić košt nižej za rynak.

Usiu zaharadnuju nieruchomaść Alaksandr dzielić na try hrupy.

Pieršaja — heta dačy da 20 km ad Minska — 10-20 tysiač dalaraŭ. Druhaja — hatovyja damy da 35 km ad Minska — ad 90-100 da 300 tysiač dalaraŭ. I treciaja — darahija katedžy — ad 300 da 700 tysiač. Biezumoŭna, jość abjekty i daražejšyja, ale popyt na ich vielmi abmiežavany.

— Da darahich katedžaŭ taksama zjaviłasia cikavaść: jość prahlady i prapanovy koštu. Naprykład, u mianie jość abjekt — katedž u Zialonaj Havani ź vidam na voziera i holf-pole. Jość katedž na Vańkoviča za 660 tysiač dalaraŭ. A voś da abjektaŭ za 300-400 tysiač dalaraŭ, ale ŭdalečyni ad Minska my cikavaści nie nazirajem.

«Raniej pakupniki razhladali varyjanty za 20 kiłamietraŭ ad Minska, ciapier hatovyja kupić dom za 50 kiłamietraŭ i dalej»

— Adna z pryčyn, ź jakoj źviazanaje pavieličeńnie kolkaści prapanoŭ na rynku, zaklučajecca ŭ tym, što mnohija ludzi zjechali ź Biełarusi. Havorka idzie nie tolki pra apošni vitok rełakacyi paśla lutaŭskich padziej, ale i pra tych, chto zjechaŭ hod ci dva tamu. Ciapier jany zrazumieli, što zastanucca za miažoj, pradajuć nieruchomaść.

Padobnuju situacyju my bačym i na rynku kvater, ale z damami i dačami situacyja bolš vidavočnaja, tamu što zaharadnaja nieruchomaść pradajecca daŭžej, — ličyć ahient pa apieracyjach z zaharadnaj nieruchomaściu ahienctva «Etaži» Śviatłana Nikiciuk.

Pa słovach Śviatłany, popyt ciapier skancentravany na niedarahich abjektach.

— Karystajucca papularnaściu tannyja dačy, niedarahija damy da 50 tysiač. Kali raniej žartavali, što za MKAD-2 žyćcio spyniajecca i asnoŭny popyt byŭ na damy da 20 kiłamietraŭ ad Minska, to ciapier pakupniki hatovyja razhladać i za 50 kiłamietraŭ, i dalej. Tamu ŭ pradaŭcoŭ niedarahich abjektaŭ udalečyni ad Minska zjaviłasia mahčymaść vyhadna zakryć ździełku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?