Siońnia namiok na bieł-čyrvona-biełaje ŭ prodažy — tearetyčnaja nahoda skarhi aŭtarstva «nieabyjakavaha hramadzianina» i mahčymyja nastupstvy ŭ vyhladzie pazapłanavych pravierak. Kolki praciahnucca padobnyja štučnyja represii ŭ dačynieńni da nacyjanalnych simvałaŭ i koleraŭ — pakul nieviadoma.
Pahladzieli, dzie ciapier možna nabyć mierč Biełarusi za miažoj.
Symbal.by u anłajn-farmacie
Užo zhadany Symbal.by, akramia filijała ŭ Hruzii, adnaviŭ svaju pracu ŭ anłajn-režymie z dastaŭkaj pa ŭsim śviecie na płatformie Redbubble. Miechanizm zamovy prosty: vy vybirajecie ŭpadabany vami prynt, koler vyraba, pamier, kankretnaje miesca, dzie prynt budzie nadrukavany, i afarmlajecie dastaŭku ŭ lubuju kropku śvietu.
Skrynšot: redbubble.com
U najaŭnaści ŭsio samaje lubimaje i papularnaje — Pahonia, vieršnica, arnamienty, Kalinoŭski, Kupała, Jeva i šmat čaho inšaha.
Varta ŭličvać, što da koštu bajki ci cišotki, viadoma, dadaducca dastaŭka i padatki dla vašaj krainy, ale biez hetaha ŭžo nijak.
Eks-haradzienskaja krama z novym adrasam prapiski
Krama nacyjanalnych tavaraŭ i ramiesnych vyrabaŭ «Admietnaść» z 2018 hoda pracavała ŭ Harodni, ale spyniła svaju dziejnaść paśla vobšukach i kanfiskacyi tavaraŭ. Haspadyniu kramy Volhu Vieramiejenka ŭvohule sudzili za «pikietavańnie».
Ciapier siamiejny biznes asieŭ ŭ Polščy: dastaŭlajuć svaje tavary poštaj pa ŭsim śviecie.
TRSK ad baskietbalistki Kaciaryny Snycinaj
Adzieńnie ź biełaruskim nastrojem «pra duchoŭnuju suviaź z domam» vypuskajecca pad brendam TRSK, za jakim stajać baskietbalistka Kaciaryna Snycina i Alaksandra Puškina, dyrektarka pa kamunikacyjach partała «Zierkała». Pakul na sajcie dastupnaja pieršaja kalekcyja, pryśviečanaja temie rełakacyi, — taki ciopły napamin pra radzimu, kudy chočacca viarnucca.
Adsiul — prynty z nadpisam «Rełakant» (ci «Rełakantka»). Śvitšot «Try čarapachi» ci chudzi z paštovaj savoj, jakaja niasie z saboj kanvierty pieršaha kłasa — pramaja adsyłka da listavańnia z palitviaźniami.
Samy sardečny biełaruski brend
Brend, jaki ŭžo staŭ paznavalnym, dziakujučy ručnoj vyšyŭcy z čyrvonymi sercami, — 10motifs. «Pakolki biełarusy raźjechalisia pa ŭsim śviecie, mnie chaciełasia ich takim čynam abjadnać, identyfikavać», — tłumačyła svaju ideju z sercami dyzajnierka Alaksandra Žuk u intervju «Našaj Nivie».
Paśla pačatku vajny va Ukrainie ŭ palitry vyrabaŭ brendu źjavilisia taksama błakitnyja i žoŭtyja kolery jak vykazvańnie padtrymki i salidarnaści. A jašče raniej adna z kalekcyj była pryśviečanaja biełaruskam Maryi Kaleśnikavaj, Ninie Bahinskaj i Marynie Zołatavaj.
U asartymiencie brendu — i panamy, i sukienki, i lnianyja kaściumy, ale, kaniečnie, samymi «biełaruskimi» źjaŭlajucca tyja samyja futbołki i łonhślivy z čyrvonym sercam na biełym fonie, u jakich možna było zaŭvažyć i błohiera Mikitu Miełkaziorava, i muzykaŭ Naviband, i šmat kaho inšych.
Fota: instahram Naviband
Juvielirnyja vyraby BelaruskiCry
BelaruskiSry — jašče adzin brend, jaki ciesna asacyjujecca ź Biełaruśsiu i nastrojami ŭ krainie apošnija dva hady. Heta juvielirnyja vyraby — kułony i piarścionki sa srebra, jakija stvaraje biełaruska ŭ Hruzii Saša Kurkova — z konturam krainy ci ŭnikalnaj litaraj našaha ałfavita «Ŭ».
Pa zamovie kułony z konturam Biełarusi dyzajnierka Alaksandra dapaŭniaje dyjamientavaj ślazinkaj. «Hety kułon — jak simvaličnaja padtrymka adno adnaho. Znak, što Biełaruś zaŭsiody čakaje nas i što jana zaŭždy z nami» — napisana ŭ profili brendu.
Zakazy adpraŭlajucca pa ŭsim śviecie.
«Nieŭmiručyja» rečy
Śvitšoty i cišotki z dyzajnam Karaliny Palakovaj pryśviečanyja minskaj prastory i znakavym simvałam u joj. Naprykład, nadpisu «Bieśśmiertien» na Płoščy Pieramohi i vazami na praśpiekcie.
Ëść tut i reč-adsyłka da pratestaŭ-2020 — znakamity kałaž dyzajnierki «Vyjście» z fotazdymkam, jaki zafiksavaŭ adzin sa žnivieńskich maršaŭ.
Adzieńnie z volnaj Biełarusi «Žnivień»
Jašče adzin brend adzieńnia, jaki cikava abyhryvaje palityčnuju paviestku. Žnivień prezientavali prynty, pryśviečanyja hučnym padziejam ź Biełarusi: naprykład, pryhodam «Biełavii» ŭ suviazi z sankcyjami, zabaronie na bieł-čyrvona-bieły ściah.
Adzin ź ich dyzajnaŭ ušanoŭvaje biełaruskuju salidarnaść: «Biełarus biełarusu biełarus» — jość jak i torby, tak i cišotki ź im.
Afłajn i anłajn-kropki ŭ roznych haradach zamiežža
U haradach ź biełaruskaj dyjasparyaj taksama pakrysie adkryvajucca kropki, skancentravanyja na prodažy rečaŭ z nacyjanalnym kałarytam. Z užo pracujučych, naprykład, Sklep białoruskiej symboliki ŭ Biełastoku ci A2.print u Vilni — jak z hatovaj pradukcyjaj u najaŭnaści, tak i na zamovu.
Svoj punkt z adzieńniem «biełarusam ad biełarusaŭ» jość taksama ŭ Łodzi i Hruzii. Kropka raspaŭsiudu jość navat u Italii.
Zapasny pracoŭny varyjant
Pryjemna padtrymlivać svaich i svajo, ale, na krajni vypadak, nikoli nie padvodzić stary-dobry Aliexpress z vybaram ściahoŭ na luby hust ci «Amazon», dzie pa zapycie «ściah, Biełaruś» adkryvajucca dziasiatki prapanoŭ. Šyroki vybar biełaruskaj simvoliki znojdziecie i na Allegro.
Nichto nie admianiaŭ i pachody ŭ zamiežnyja drukarni, dzie dla vas realizujuć lubuju fantaziju i maru.
Čytajcie taksama:
Ukrainskaja dyzajnierka stvaryła dla Gucci kalekcyju vyšyvanak FOTA
«Śvitary raskupili za dzień». Biełaruskaja dyzajnierka raskazała pra biznes u Vilni i ŭkrainskuju kalekcyju
Čas raspranacca. 10 raznastajnych sukienak i lohkich kaściumaŭ ad biełaruskich dyzajnieraŭ
