«Biełavija» nie mieła dačynieńnia da pasadki samalota Ryanair, ale była za heta pakaranaja.
Abmiežavańni avijacyjnaj mabilnaści praz sankcyi na «Biełavija» ŭdaryli pa reputacyi łukašenkaŭskaha režymu, pasłali sihnał mižnarodnamu biznesu, ale adnačasova jany abrezali złučeńni miž Biełaruśsiu i jeŭrapiejskim kantynientam.
Z vajnoj situacyja jašče ŭskładniłasia. Ciapier «Biełavija» pad sankcyjami dvojčy: za Ryanair i za napad na Ukrainu.
Pry hetym, treba razumieć, što dla nacyj, jakija zmahajucca za svaju niezaležnaść (Biełaruś), nacyjanalnaja avijakampanija — važny atrybut dziaržaŭnaha suvierenitetu va ŭsich sensach: palityčnym, ekanamičnym, humanitarnym, kamunikacyjnym, a taksama ŭ sensie mabilnaści ludziej.
Stratehična było b niapravilna, kab kampanija pamierła, bo Łukašenki nie viečnyja, a «Biełavija» była da ich i budzie paśla ich — hłabalna ludzi buduć lotać ŭsio čaściej i bolš.
Demakratyčnyja siły mahli b padniać pytańnie razbłakavańnia pasažyrskich palotaŭ ź Minska ŭ ES uzamien za niejkija kroki Minska, chacia i ciažka sabie ŭjavić takoje, pakul łukašysty robiać toje, što robiać.
Ale «Biełavija» heta tolki častka prablemy.
Mnohija naziralniki ŭžo paraŭnoŭvajuć najaŭnuju hieapalityčnuju situacyju z razłomam kryhi, kali dźvie pałovy razychodziacca ŭ roznyja baki. Krytyčna važna zachoŭvać mastočki pamiž hetymi kryhami.
Ciapier usie siły łukašenkaŭskaj i pucinskaj dziaržavy skiravanyja na toje, kab demanizavać Zachad, spynić kantakty, pabudavać alternatyŭnuju realnaść dla prostaha čałavieka, apuścić zasłonu.
U drybinskich i chojnickich rajonkach cełyja razvaroty advodziać pad apisańnie, jak kiepska žyviecca na Zachadzie.
Ludzi pavinny mieć mahčymaść žyŭcom bačyć, jakaja prorva ŭ jakaści žyćcia isnuje pamiž «Ruskim śvietam» i raźvitym.
Kali adnaŭleńnie pavietranaha ruchu niemahčymaje na siońnia, to čamu b nie adnavić chacia b pasažyrskaje čyhunačnaje złučeńnie? Heta zdymie supiarečnaść: čamu tavary čyhunkaj jeździać, a ludzi — nie? Kaho hetym pakarali?
Adnaŭleńnie pasažyrskaha ruchu miž Minskam i Varšavaj, Minskaj i Vilniaj, Minskam i Bierlinam mahło b dapamahčy ludziam vyjazdžać i viartacca. Pasažyrski ruch — heta win-win, choć štości ŭzajemavyhadnaje navat u situacyi chałodnaj vajny.
pa tualetnuju papieru?