Fota: instahram «ČynČynaŭ»
Satyryčnyja videa nie prosta vyśmiejvali biełaruskuju realnaść sa śvietu dziaržaŭnych słužačych, a časam pradbačyli, što adbudziecca «ŭ nastupnaj sieryi»: čaho tolki vartyja vypuski, dzie čynoŭniki niezadavolenyja «alapavatymi chipstarštrase» z murałami — nie ŭ prykład šerym ścienam, ci «Dzień rabotnika kultury», adkul vyklučajuć usich «tak zvanych dziejačaŭ mastactva», akramia ŭłasna čynoŭnikaŭ (čym nie adsyłka da anansavanych pravak u Kodeksie ab kultury?).
Roŭna praz dva hady «ČynČyny» pierazapuskajuć svoj jutub-kanał i abiacajuć, što budzie vielmi cikava.
Napiaredadni vialikaha pierazapusku my raspytali kamandu prajekta, čym jany płanujuć radavać hledačoŭ u novym siezonie.
«Pieršy sieryjał u žanry palityčnaj satyry dla biełaruskaj aŭdytoryi»
U 2021 hodzie na jutub-kanale tvorcaŭ paśla virusnych chitoŭ «Ščučynščyna» (darečy, u klipa chutka nabiažyć miljon prahladaŭ) i «Dziekać i ciekać» u vykanańni Aleny ŽałudOk zdaryłasia vymušanaja paŭza: spačatku zdymać parodyi na realnaść stała niebiaśpiečna ŭ Biełarusi, tamu kamanda pierabrałasia va Ukrainu. Tam jany zamachnulisia na zdymki sieryjała pad nazvaj «Tut byŭ Lenin». Pa siužecie ŭ maleńki pravincyjny haradok Ščučynščynsk pavinny byli z płanavaj pravierkaj pryjechać čynoŭniki sa stalicy i zaŭvažyć, što na centralnaj płoščy niama pomnika Leninu.
Raskryćcio hetaha złačynnaha zdareńnia ŭ scenaryi Andreja Kašpierskaha, Michasia Zuja i Dźmitryja Jesianieviča pavinna było ŭmiaścicca ŭ šeść sieryj na 15-20 chvilin i stać pieršym sieryjałam u žanry palityčnaj satyry dla biełaruskaj aŭdytoryi. Ale va Ukrainie, dzie ŭsio i zdymałasia, pačałasia vajna i praca była pastaŭlenaja na paŭzu (darečy, u sieryjale pavinny byli pakazać historyju źjaŭleńnia Aleny ŽałudOk u mulcisuśviecie «ČynČynČeneł», jaje pieršyja kroki, ale tak ci inakš chutka tvorcy abiacajuć karotkamietražny błakbastar u stylistycy «Vostrava praklatych», u jakim budzie raskrytaja «strašennaja tajamnica Aleny ŽałudOk»).
«Ciapier «Tut byŭ Lenin» možna zaviaršyć tolki kali pieraźniać sieryjał amal z nula ŭ Polščy ci viarnucca ŭ Lvoŭ i daźniać prajekt z ukrainskaj kamandaj, jakaja razam z nami była apantanaja jaho idejaj. Ale dla hetaha spačatku pavinna skončycca vajna», — tłumačać udzielniki kamandy.
Mikałaj Siarhiejevič i Siarhiej Mikałajevič u vykanańni Dźmitryja Jesianieviča i Michasia Zuja.
«Hałoŭnaja ideja «ČynČyn», jak i raniej, — pakazać absurdnaść prapahandy, niedarečny biełaruski aficyjoz»
Za apošni hod kamanda vymušana mianiała miesca žycharstva dva razy, tamu pracavać nad prajektam rehularna ŭvohule było składana.
«Ale zaraz, zdajecca, usie členy kamandy bolš-mienš uładkavalisia na novych miescach i my viartajemsia. Na siońnia nas 10 čałaviek, plus da nas dałučajucca siabry, akciory, śpiecyjalisty ŭ vytvorčaści videa — z novymi idejami, technałohijami i vyklikami: śmiech i humar — našaja supiersiła, choć žartavać padčas vajny — kudy bolš składanaja zadača. Ale, ščyra kažučy, my vielmi sumavali, što šeryja pinžački čynoŭnikaŭ doŭha visieli ŭ našych šafach biez spravy».
Čaho ž čakać na «BiełDziaržJutubKanale»?
«Hałoŭnaja ideja «ČynČyn», jak i raniej, — pakazać aburdnaść prapahandy, niedarečny biełaruski aficyjoz. U nas heta atrymlivajecca, bo jašče ŭ Biełarusi Siarhieja Mikałajeviča i Mikałaja Siarhiejeviča prymali za sapraŭdnych čynoŭnikaŭ. A vykanaŭcu «Ščučynščyny» Alenu ŽałudOk — za sapraŭdnuju praŭładnuju moładzievuju aktyvistku (padajecca navat, što čynoŭniki natchniajucca «ČynČynami» i vykarystoŭvajuć našyja repliki i absurdnyja situacyi ŭ žyćci. A biełaruskija naviny časam vyhladajuć jak YouTube-kanał «ČynČyn»).
U novym siezonie my pačniem z prajekta «Na dyvan!», u jakim «ČynČyny» vyklikajuć na surjoznuju razmovu znakamitych biełarusaŭ, jakija źjechali ź Biełarusi, z metaj ideałahična prapracavać «biehłych» i dać im šaniec na pakajańnie. Dyjapazon haściej budzie šyrokim — ad Marharyty Laŭčuk da Malavanyča», — raskazvajuć tvorcy.
Taksama vosieńniu na jutubie rehularna buduć źjaŭlacca karotkija videa «Viarchoŭny Saviet Dnia», dzie «ČynČyny» buduć vučyć biełarusaŭ žyćciu i zabivać ideałahičnyja svai ŭ bahnistuju biełaruskuju hlebu — raskazvaje akcior Michaś Zuj. Razborki «na dyvanie» buduć vychodzić na kanale raz na tydzień, a «Viarchoŭny Saviet Dnia» — dva. «Kab biełarusy nie rassłablalisia», — žartujuć akciory.
Jutub — hałoŭnaja placoŭka «śpiecyjalistaŭ «BiełDziaržJutubKanała», ale sačyć za «Čyn-Čynami» možna i ŭ instahramie, i ŭ tyk-toku, i ŭ telehramie.
«U nas nie tak daŭno źjaviŭsia aficyjny «BiełDziaržTeleHramKanał», na jakim «ČynČyny» abmiarkoŭvajuć aktualnyja naviny ŭ niefarmalnaj abstanoŭcy, tak by mović, biez halštukaŭ (ale ŭ halštukach). My štodzień na suviazi z našaj audytoryjaj u sacyjalnych sietkach. «ČynČyny» hatovyja adkazvać na lubyja kamientary, viedajuć pra ŭsie łajki i zaŭvažajuć reakcyi», — udakładniaje Michaś Zuj.
«Pohladam čynoŭnikaŭ pahladzieć na Jeŭropu: naviedać Amsterdam, Paryž, Haahu»
Na hetym idei nie skanvajucca. Naprykład, u płanach kamandy — u budučyni źniać «travel movie» «ČynČyny na kołach».
«Pohladam čynoŭnikaŭ pahladzieć na Jeŭropu, naviedać Amsterdam, Paryž, Haahu. Taksama jość ideja źniać karotki sieryjał «Minskija siorfiery» — idealny, stvorany suśviet, u jaki ŭryvajecca žorstkaja rečaisnaść. A jašče ŭ nas nazapašvajucca muzyčnyja idei, jakija ŭ stanie ŭvasobić zorki kanała — śpiavak Alaksandryj, kulturołah Kłaŭdzija Ksanna Hieksavit i, biezumoŭna, Alena ŽałudOk».
Akciory i režysior kamandy za dva hady pieražyli vielmi šmat — jakim čynam heta paŭpłyvała na ich i ich piersanažaŭ?
«Byli momanty, asabliva adrazu paśla pačatku vajny, kali padavałasia, byccam, čas nastaŭ taki, što nie pažartuješ. Ale ž kanał i źjaviŭsia ŭ čas, nie vielmi prydatny dla žartaŭ. Jak i tady, zaraz my adčuli, što humar, vyśmiejvańnie absurdu i biazhłuździcy nadaje siły», — dzielacca ŭdzielniki kamandy. — Plus prapahanda robicca ŭsie absurniej. Tamu patreba ŭ tym, kab jaje vykryć, stanovicca jašče bolš nieabchodnaj.
Śmiech pazbaŭlaje ludziej strachu pierad sistemaj, dapamahaje stavicca krytyčna da aficyjnych ŚMI, šukać roznyja mierkavańni i dumki. My ličym, što humar daje navat bolš, čym sprečki, dyskusii i sieminary. Ën prynosić pazityŭny kalektyŭny vopyt. A heta zaraz nam vielmi nieabchodna».
Čytajcie taksama:
Strašny son rabotnikaŭ kultury — źmieny ŭ Kodeksie ab kultury, padpisanyja Łukašenkam
«Kali ja niešta i zrazumieŭ za piać hadoŭ u šlubie… Karaciej, my pastajanna pracujem nada mnoj». Piać hodnych stendapieraŭ, jakich vy, mahčyma, nie viedajecie
Litoŭski režysior pastaviŭ z represavanymi haradziencami śpiektakli pra Kurapaty i Maryupal i źniaŭsia ŭ sieryjale pra Akreścina — pahutaryli ź im
