Z vyklučeńniem Biełarusi z rehijanalnych łahistyčnych łancužkoŭ pryjdziecca pačakać. Takoje mierkavańnie vykazała analityk łukašenkaŭskaha «Biełaruskaha instytuta stratehičnych daśledavańniaŭ» («BISI») Volha Łazorkina, paviedamlaje BiełTA.
«Respublika Biełaruś źjaŭlajecca paŭnavartasnym členam suśvietnaj supolnaści. Da ciapierašniaha času adziny orhan, jaki maje prava ŭžyvać sankcyi, — AAN nie razhladaje hetaha pytańnia navat inicyjatyŭna», — adznačyła Łazorkina.
Jana źviarnuła ŭvahu, što dla Biełarusi pytańnie vybaru pamiž Zachadam i Uschodam nikoli nie stajała i nie staić. Jeŭrapiejski kantynient byŭ i zastajecca dla Biełarusi cyvilizacyjnym jakaram i centram kulturnaha pryciahnieńnia.
«Biełaruś maje nie tolki žadańnie zachavać svaje pazicyi ŭ rehijanalnym handli, ale i ŭłasnaść u ES. Uviadzieńnie sankcyj absalutna nie aznačaje, što my zakryvajem hetaje pytańnie i šukajem ščaścia za inšymi morami», — ličyć łukašenkaŭski analityk.
«My nikoli nie davali im (palakam i litoŭcam — zaŭv. Red.) padstavy. Što tyčycca biznes-supolnaści našych krain-susiedziaŭ, to ŭ nas jość dla ich cikavyja dziełavyja prapanovy, a nie zabarony i bankructva», — skazała Volha Łazorkina.
Heta istotna adroźnivajecca ad taho, što łukašenkaŭskija prapahandysty i palityčnyja kamientatary (u tym liku z «BISI») havaryli apošnim časam. Zvyčajna analityki hetaj struktury paśla 2020 hoda demanizavali Zachad, vykazvalisia pra jaho rezka niehatyŭna, tyražujučy absurdnyja kanśpirałahičnyja teoryi ŭ styli Ren-TV.
A što raniej kazali ŭ «BISI»?
Voś, naprykład, što jašče nie tak daŭno kazaŭ pra Zachad kiraŭnik «BISI» Alaksiej Aŭdonin. Typovaja naftalinavaja prapahanda.
«My viedajem, što jość tak zvanyja marskija dziaržavy. Jany pavodziać siabie, jak piraty, jakija žyvuć za košt inšych. Voś hetaja madel pryhniotu dobra pracavała na praciahu 300 abo 400 hadoŭ. U pieršuju čarhu za košt technałahičnaha ryŭka ŭ halinie ŭzbrajeńnia. Ciapier my bačym, što hetaj technałahičnaj roźnicy ŭzbrajeńniaŭ pamiž Zachadam i inšymi krainami ŭžo niama. Rasija vałodaje mahutnym rakietnym i zvyšhukavym uzbrajeńniem. Dakładna takoje samaje ŭzbrajeńnie jość u Kitaja. Naturalna, anhłasaksy chacieli b naviazać svaju madel śvietu».
Na jaho dumku, Kitaj, Rasija, Indyja i krainy Blizkaha Uschodu ŭśviedamlajuć, što anhłasaksy ŭsim nadakučyli.
Na Zachadzie dumajuć farmacyjami trochsothadovaj daŭniny, kazaŭ Aŭdonin.
«Ciapier pradstaŭniki tak zvanaha załatoha miljarda ŭśviedamlajuć, što chacieli b žyć na našaj płaniecie na praciahu, skažam, 500 i bolš hadoŭ. Jany ličać, što resursaŭ na ŭsich nie chopić. Paloty na Mars, jakija prasoŭvaŭ Iłan Mask, akazalisia ŭtopijaj», — skazaŭ Alaksiej Aŭdonin.
Aŭdonin taksama adznačyŭ, što ciapier u elit zastajecca adno vyjście — pazbaŭlacca ad lišnich ludziej. «Jany ličać, što stolki ludziej nie treba va ŭmovach aŭtamatyzacyi», — ličyć Aŭdonin.
«Załaty miljard» dumaje farmacyjami trochsothadovaj daŭniny, i jany nie majuć racyju. Ź imi ciapier Rasija i Kitaj viaduć baraćbu za nas usich», — padsumavaŭ Alaksiej Aŭdonin.
Varta adznačyć, što analityki «BISI» raniej nie byli zaŭvažanyja ŭ vykazvańniach, jakija adychodziać ad hienieralnaha kursu.
I padobnaja aściarožnaja źmiena rytoryki supała pa časie z vykazvańniami Łukašenki pra toje, što nie treba rvać adnosiny z Zachadam.
9 žniŭnia Łukašenka zajaviŭ, što ličyć nieabchodnym navat va ŭmovach sankcyj nie skidać z rachunkaŭ rynak Jeŭrasajuza.
«Nam ni ŭ jakim razie nielha skidać z rachunkaŭ rynak Jeŭrsajuza. Heta naš najbližejšy susied. My pałovu tam, pa-mojmu, pracavali pa eksparcie, — skazaŭ Alaksandr Łukašenka. — Ź imi treba pracavać. Šalenstva palitykaŭ užo adychodzić na zadni płan. Biznes jość biznes».
