Fota: FSB
U pres-relizie FSB było skazana, što «ŭ chodzie zatrymańnia pry sprobie padryvu naftapravoda niejtralizavanyja dvoje hramadzian Rasijskaj Fiederacyi, jakija akazali ŭzbrojeny supraciŭ».
Rasijanie, jakija rychtavali terakt, pavodle śćviardžeńnia śpiecsłužby, uvachodzili ŭ skład pravaradykalnaj hrupoŭki «Restrukt», stvoranaj Marcinkievičam, viadomym pad mianuškaj Ciasak. U 2020 hodzie Marcinkievič pamior, znachodziačysia ŭ źniavoleńni.
Pavodle viersii FSB, «arhanizacyju dyviersijna-terarystyčnaha akta pad kantrolem ukrainskich śpiecsłužbaŭ ažyćciaŭlali čalcy «Restrukta» hramadzianin Rasii Andrej Čujankoŭ 1986 hoda naradžeńnia, jaki ciapier udzielničaje ŭ bajavych dziejańniach va Ukrainie ŭ składzie nacbataljona «Urahan», i hramadzianin Ukrainy Juryj Ionaŭ 1988 hoda naradžeńnia, jaki źjaŭlajecca vajskoŭcam pałka «Azoŭ».
Z pres-relizu FSB da kanca było niezrazumieła, byli dvoje zabitych u Vałhahradskaj vobłaści mužčyn Čujankovym i Ionavym, ci nie.
«Ja starajusia nie ŭstupać u kanfrantacyju z Rasijskaj Fiederacyjaj»
Davoli chutka vyśvietliłasia, što jak minimum Čujankoŭ dakładna žyvy i znachodzicca ŭ Kijevie. Ruskaj słužbie «Bi-bi-si» jon zajaviŭ, što «dyviersij» u Vałhahradskaj vobłaści nie arhanizoŭvaŭ, u bataljonie «Urahan» nie znachodzicca, a jaho mierkavany (pa viersii FSB) zmoŭščyk Ionaŭ zahinuŭ pry bambiožcy Maryupala jašče ŭ sakaviku hetaha hoda.
«Mnie pačali dasyłać niejkija spasyłki [na publikacyi z pres-relizam FSB], — raspavioŭ Čujankoŭ. — Słova «ździviŭsia» tut nie vielmi padychodzić. Ja starajusia nie ŭstupać u kanfrantacyju z Rasijskaj Fiederacyjaj, bo ŭ mianie i tak chapaje ź joj prablem, i kali mnie pačali dasyłać hetyja naviny, ja trochi afihieŭ. U pieršapačatkovych spasyłkach tam nie fihuravała majo proźvišča, tak što ja padumaŭ, što heta žurnalisty prosta čamuści ŭziali maju fatahrafiju dla niejkaha videašerahu: «Restrukt», Marcinkievič, usio na śviecie … Takoje časam zdarajecca, da hetaha ja ŭžo pryvyk. Ale potym majo proźvišča pačało milhać usio čaściej, pačali publikavać danyja majoj siamji, i heta było ŭžo strašna, tamu što ludzi, nie datyčnyja ni da čaho, padvierhlisia niejkamu bulinhu i abrazam. Tak što emocyj było šmat».
Čujankoŭ kaža, što źjechaŭ z Rasii jašče ŭ kastryčniku 2020 hoda — praź Biełaruś va Ukrainu, dzie paprasiŭ palityčny prytułak.
«Z kastryčnika 2020 hoda ja tut. Źjechaŭ ja nie prosta tak. Ja palityčny aktyvist, majho siabra i tavaryša Maksima Marcinkieviča zakatavali», — śćviardžaje jon.
Surazmoŭca «Bi-bi-si» admaŭlaje, što braŭ udzieł u bajavych dziejańniach u składzie ŭkrainskaha bataljona «Urahan» abo luboha inšaha vajenizavanaha padraździaleńnia. Pra isnavańnie takoha bataljona ŚMI raniej taksama nikoli nie paviedamlali.
«Tut jość taki piersanaž z Rasii z pazyŭnym «Urahan». Mahčyma, jany heta ŭsio niejak źviazali — vykazaŭ mierkavańnie Čujankoŭ. — Usia hetaja historyja napoŭnienaja dziŭnym tumanam niapeŭnaści, tak što, mnie składana jaje kamientavać. Z «Azovam» ja taksama nie źviazany. U mianie jość znajomyja vieterany ATA, znajomyja vieterany «Azova», ale jak sa strukturaj ja ź imi nijak nie ŭzajemadziejničaŭ».
Čujankoŭ, ź jaho słoŭ, z pačatku rasijskaha ŭvarvańnia va Ukrainu razam sa svaimi znajomymi zajmaŭsia vałanciorskaj dziejnaściu, prajšoŭ kursy taktyčnaj miedycyny i dapamahaŭ pracavać z paranienymi, ale niepasredna kambatantam nie byŭ i ŭ bajavych dziejańniach udziełu nie braŭ:
«Kali za aknom pačynajuć vybuchać snarady, ahulny nastroj stanovicca niapeŭnym, kožny mužčyna pavinien siabie niejak prajaŭlać. I ja, jak i bolšaść ludziej śviadomych, staŭ šukać, kudy mnie prymianić siabie».
«Hety čałaviek zahinuŭ u Maryŭpali»
«Asobnaja niejkaja chochma», — skazaŭ Čujankoŭ, adkazvajučy na pytańnie pra toje, adkul u pres-relizie FSB mahło źjavicca proźvišča Ionava, jakoha śpiecsłužba nazvała jaho saŭdzielnikam.
«Hety čałaviek zahinuŭ u Maryupali na samym pačatku vajny — u sakaviku 2022 hoda. My ź im zavočna viedali adzin adnaho. Ale ja nie pryhadvaju, kab my ź im razmaŭlali. Tearetyčna, heta mahło być u dalokim minułym, ale ja takoha nie pamiataju», — paviedamiŭ jon «Bi-bi-si».
Dvoje vajskoŭcaŭ «Azova» skazali «Bi-bi-si», što Ionaŭ sapraŭdy zahinuŭ niekalki miesiacaŭ tamu ŭ vyniku adnoj z bambardzirovak Maryupala, pakul jaho šturmavali rasijskija vojski.
Čujankoŭ vysunuŭ viersiju, što FSB choča dyskredytavać «usio, što źviazana z rasijskim nacyjanalizmam», nazyvajučy ich proźviščy.
