Fota: Apple TV+
Jość piać siaścior pa proźviščy Harvi.
Starejšaja ź ich, Jeva, uziała na ciabie maciarynskuju rolu paśla śmierci baćkoŭ.
Druhaja, Ursuła, pracuje miedsiastroj, haduje troje dziaciej i pavodzić siabie razumna, za vyklučeńniem svajho ramana z vykładčykam fatahrafii.
Treciaja siastra — Bibi, žorstka bieskampramisnaja asoba, Beka — žančyna bieź jaŭnych met u žyćci, a Hrejs — adzinaja, chto choć trochi apłakvaje svajho pamierłaha muža Džona Poła, piša Guardian.
I krychu paźniej nam tłumačać, čamu nikomu nie škada Džona Poła: heta byŭ pamiešany na kantroli mužčyna, jaki na praciahu doŭhich hadoŭ šluba padtočvaŭ jaje siły i nie davaŭ joj raźvivacca, a potym jašče i pierakinuŭ svaje namahańni na dačku-padletka. Na paminkach hość kaža Jevie, što škaduje ab jaje stracie, taja ž adkazvaje, što prosta rada skančeńniu pakut. «Jon byŭ chvory?» — pytajecca ździŭleny hość. «Nie», — adkazvaje starejšaja ź siaścior.
Siostry nie razumiejuć, što adbyvajecca z Džonam Połam, i nie viedajuć, što ź im rabić. Paśla tradycyjnaha kaladnaha kupańnia ŭsioj siamjoj (kudy Džon Poł nie puściŭ Hrejs) žančyny dzielacca na plažy fantazijami pra toje, jak pazbavicca ad mužčyny. Paźniej siostry pieratvarajuć fantazii ŭ teoryju, a teoryju — u praktyku. Roznyja sproby zabić tyrana nie pryvodziać da vyniku, ale, hledziačy pa najaŭnaści trupa i pa pavodzinach siaścior, u niejki momant jany ŭsio-taki dabilisia pośpiechu ŭ svajoj spravie.
Na žal dla siaścior, nie tolki hledačam jany zdajucca padazronymi. Strachavy ahient i jaho svodny brat nie žadajuć vypłočvać vielizarnuju strachoŭku za žyćcio Džona Poła, bo hetaja vypłata zrobić ź ich ahienctva bankrotaŭ, i pačynajuć samastojna rasśledavać śmierć muža Hrejs.
Chtości paličyć hety sieryjał zanadta zmročnym, chtości — zanadta śmiešnym, bo centralnaja tema «Zmovy siaścior Harvi» — siamiejny hvałt, i nie ŭsie prymuć tak šmat žartaŭ u hetaj historyi. Ale ŭ sieryjale hałoŭnaje nie heta: našmat važniej mocnaja suviaź pamiž siostrami, chacia vielmi časta jana i supravadžajecca žartami adna nad adnoj i svarkami.
Mahčyma, što sieryjał atrymaŭsia b macniejšy, kali b Džona Poła zrabili mienš žorstkim. Što jon tolki nie robić: publična prynižaje Jevy za jaje biaspłodnaść, kryŭdzić syna Ursuły ź sindromam Daŭna, kali toj sprabuje jaho abniać, šantažuje Ursułu za jaje raman — i heta nie ŭvieś śpis. Časam praz usio heta Džon Poł zdajecca ledźvie nie stereatypnym złydniem.
Niahledziačy na heta, «Zmova siaścior Harvi» — dobry sieryjał. Jon pravilna strukturavany, dziejańnie adbyvajecca ŭ idealnym tempie, a akciory hrajuć całkam pravilna. Hety tvor vydatna dapoŭnić śpis papularnych sieryjałaŭ pra žančyn i ad žančyn (u tym liku ad žančyn-režysiorak). I pryniasie palohku tym, chto pieražyvaje ŭ siamji toje ž samaje, što i Hrejs.
Rejtynh sieryjała na mižnarodnym resursie IMDB: 7,6/10
«Budzie baleć» — ščyry i emacyjny sieryjał pra miedycynu. Vielmi dobry
Što pahladzieć. «Tehieran» — papularny špijonski sieryjał, jaki vy mahli prapuścić
«Žančyna pry hrošach» — lohkaja, jarkaja i kranalnaja kamiedyja pra padmanutuju žonku miljardera
