Biełaruskaja dziaržprapahanda pacichu pryrastaje novymi tvarami. Chtości idzie pracavać za niebłahija hrošy, chtości — kab adčuć siabie zorkaj, jakuju pakazali pa TB. Ale niekatorym ščyra padabajecca žyćcio ŭ sučasnaj łukašenkaŭskaj sistemie. Novaja televiadučaja ANT Maryna Karaman jakraz z takich viernikaŭ.
Viadučaja pakul što atrymała nievialiki dziesiacichvilinny prajekt pad nazvaj «Vsio poniatno s Marinoj Karaman». Čakajecca, što tematykaj stanuć «resursy i finansy», hledačam buduć tłumačyć, «jak usio na samaj spravie».
Ale rodnaja kraina čamuści nie vielmi zacikaviła aŭtaraŭ, debiut pryśviacili Ukrainie.
U pieršym vypusku Karaman raskazvaje pra prablemu z ukrainskim zierniem. Kali koratka, to jana tłumačyć, što prablema nie takaja i vialikaja, a kali i jość — heta chitry płan Zachada, u vyniku jakoha Ukrainu čakaje hoład.
Rytoryka adpaviednaja.
Karaman razvažaje: Jeŭrasajuz abmiarkoŭvaje hoład, «kab ścierci z pamiaci svaich hramadzian šmatmiesiačnyja łakdaŭny», paśla jakich nibyta pačalisia prablemy z charčavańniem. Jana kaža: «Jeŭropa — brazhotka na chvaście ZŠA», a antyrasijskija i antybiełaruskija sankcyi «vymatali jeŭrapiejcaŭ».
Rasiju ž, pa słovach viadučaj, «pryznačyli złodziejem», kab pieraklučyć uvahu hramadzian ES ad prablemy patencyjnaha hoładu.
Pra vajnu Karaman nie kaža ani słova. A toje, što adbyvajecca va Ukrainie, jana nazyvaje «abstavinami ŭ krainie i na rubiažach».
Ale chto takaja spadarynia Karaman? Raskazvajem.
Marynie Karaman 39 hadoŭ. Jana vyrasła pad Minskam, paśla vučyłasia ŭ kamiercyjnym Instytucie sučasnych viedaŭ, śpiecyjalnaść — žurnalistyka ŭ drukavanych ŚMI.
Karaman — proźvišča Maryny ad pieršaha šlubu. Padčas vučoby ŭ instytucie Maryna paznajomiłasia z turkam Miechmietam Karamanam. Maładziony ažanilisia, u ich naradziłasia dačka. Ale paźniej Maryna i Miechmiet raźvialisia, pry hetym zachavaŭšy dobryja adnosiny. Siońnia Maryna znoŭ zamužam, ale ŭžo za biełarusam.
«Paśla vučoby jana pastajanna pracavała niedzie ŭ žurnalistycy: niejki čas była na STB, probavałasia na ANT.
Na maju dumku, Maryna — vielmi dziełavy čałaviek. Metanakiravany, umieje dabivacca svajho», — zhadvaje jaje byłaja adnahrupnica.
Taksama Karaman pisała dla profilnaha časopisa «Industryja pryhažości», była tam ahladalnikam. Vučyłasia i sama na bjuci-majstra.
Paśla Karaman uładkavałasia na Novaje radyjo (zasnavalnik radyjostancyi — praŭładnaja Fiederacyja prafsajuzaŭ).
Na radyjo Maryna čytała naviny.
«Jana svojeasablivy čałaviek, u niečym navat bieskampramisny i zvadlivy. Niekatorym było niaprosta ź joju ŭžyvacca.
Na radyjo jana prosta začytvała naviny, aŭtarskaj pieradačy ŭ jaje nie było. Ale ŭ Maryny była svaja źjedlivaja maniera padačy, joj vielmi padabałasia pry luboj mahčymaści pakpić.
I ciapier ja nie ździŭleny, što Maryna trapiła na ANT. U jaje zaŭsiody była takaja pazicyja, — zhadvaje rabotnik «Novaha radyjo». —
Karaman — typovy pradstaŭnik ščyrych «viernikaŭ» u Łukašenku.
U 2020 hodzie jašče da vybaraŭ, kali tolki pačynałasia pandemija karanavirusa, Maryna vielmi skieptyčna staviłasia da masak, antysieptykaŭ i ŭsiaho astatniaha. Jana kazała: maski — heta łuchta, karanavirusa nie isnuje.
Viedaju, što kalehi šmat dyskutavali ź joju, kali pieradvybarčaja kampanija była ŭ razhary. I Karaman zaŭsiody była nastrojenaja vielmi praŭładna. Adnamu z kalehaŭ raskazvała: kali vybieruć Babaryku, Biełaruś čakaje historyja, jak z Krymam, pryjduć «zialonyja čałaviečki», staniem akruhaj Rasii.
Taksama jana ŭletku 2020-ha niejak adpaliła ŭ svaim instahramie: pakinuła vielmi rezki kamientar ci dopis u padtrymku dziejučaj ułady.
Paśla hetaha navat byŭ schod na radyjostancyi. I ŭsich rabotnikaŭ tady pieraściarahli, što nie treba zališniaj aktyŭnaści ŭ sacsietkach.
Paśla Maryna padčyściła svaju stužku».
Dopisy ŭ sacsietkach zaŭsiody byli słabaściu Maryny Karaman.
Jašče ŭ 2015 hodzie paračka jaje pastoŭ u fejsbuku vyklikała, miakka kažučy, ździŭleńnie. Na toj momant Maryna pracavała na STB. Ciapier hetyja dopisy jana vydaliła, ale ž internet usio pamiataje.
Voś mierkavańnie Karaman pra Śviatłanu Aleksijevič:
A voś škadavańnie pra Stalina:
A voś i pra akupacyju Kryma Rasijaj:
Raskazvała Maryna i pra toje, jak stała prytrymlivacca praŭładnych pohladaŭ:
Chamavatyja maniery lohka spałučajucca ŭ novaj televiadučaj ź vieraj u Boha. Praŭda, pra Boha ŭ Karaman taksama atrymlivajecca krychu pa-chamsku:
Byvała Maryna i za miažoj, niejki čas žyła ŭ Turcyi, paśla niaredka jeździła tudy z dačkoj. Znajomyja raskazvajuć, što Turcyju Maryna asabliva nie lubiła.
Što ŭžo kazać pra «pamirajučuju» Łatviju. «Strašnaje vidovišča», na dumku Karaman:
Maryna Karaman ščyra lubić Biełaruś, heta fakt. I ščyra pryznaje: Biełaruś — heta vialiki dobraŭparadkavany kałhas. Vysnovy rabicie sami.
