Jak rastłumačyŭ dyrektar ŽKH Pieršamajskaha rajona Dźmitryj Dubaviec, Ukaz № 327 «Ab pavyšeńni enierhaefiektyŭnaści šmatkvaternych žyłych damoŭ» daje žycharam mahčymaść uciaplić dom za svoj košt, ale ź finansavaj padtrymkaj dziaržavy, jakaja składaje 50% koštu rabot.
Pry hetym dajecca rasterminoŭka: vypłaty ažyćciaŭlajucca na praciahu 10 hadoŭ kožny miesiac roŭnymi dolami.
Uličvajucca i mahčymyja žyćciovyja situacyi — dla sacyjalna ŭraźlivych i małazabiaśpiečanych hramadzian hety pieryjad moža być praciahnuty da 15 hadoŭ.
Takim čynam, žychary žadajuć uciaplić chatu. Jaki paradak dziejańniaŭ?
Zhodna z zhadanym ukazam №327 rašeńnie prymajecca ahulnym schodam udzielnikaŭ sumiesnaha domaŭładańnia, členaŭ tavarystva ŭłaśnikaŭ, arhanizacyi zabudoŭščykaŭ. Pry hetym jano ličycca pryniatym, kali na ahulnym schodzie za prahałasavali ŭłaśniki pamiaškańniaŭ, jakija vałodajuć bolš jak dźviuma tracinami hałasoŭ ad ich ahulnaj kolkaści.
Paśla takoje rašeńnie zjaŭlajecca abaviazkovym dla vykanańnia ŭsimi ŭłaśnikami.
— Da prykładu, uciapleńnie žyłoha doma na vuł. Kalinoŭskaha, 26, pačałosia mienavita paśla taho, jak u ŽKH Pieršamajskaha rajona pastupiŭ kalektyŭny zvarot jaho žycharoŭ, — raspaviadaje Dubaviec. Čakany ekanamičny efiekt ad ciepłavoj madernizacyi ŭ hetym domie — 152 Hkał u hod. Praściej kažučy, spažyvańnie ciapła pamienšycca na 36,4%, što, adpaviedna, pryviadzie i da źnižeńnia płaty za aciapleńnie.
Košt pytańnia
U košt ciepłavoj madernizacyi ŭvachodziać padrychtoŭka prajektna-kaštarysnaj dakumientacyi, budaŭniča-mantažnyja raboty, materyjały.
Ahulnaja suma dla žyłoha doma na vuł. Kalinoŭskaha, 26, skłała 186 689 rubloŭ, abo 41 rubiel na kožny kvadratny mietr kvatery.
Heta značyć dla ŭłaśnika typavoj kvatery hetaha doma płoščaj 49,6 m2 košt uciapleńnia skłała 2034 rubla. Z ulikam rasterminoŭki na 10 hadoŭ štomiesiac treba budzie apłočvać 8,5 rubla. Pry hetym pamier płaty fiksavany i pavialičvacca nie budzie.
