Voś užo bolš čym dva hady Biełstat nie abnaŭlaje danyja pa naradžalnaści i śmiarotnaści biełarusaŭ. Tak supała, što publikavać hetuju statystyku pierastali ŭ pieryjad pandemii karanavirusa, kali biełaruskija čynoŭniki, u tym liku Alaksandr Łukašenka, admaŭlali surjozny ŭpłyŭ COVID-19, a da statystyčnych danych Ministerstva achovy zdaroŭja ŭ biełarusaŭ było niamała pytańniaŭ.
6 vieraśnia ŭ Biełstacie paviedamili, što infarmacyja pa naradžalnaści i śmiarotnaści nie padličanaja da hetaha času.
— Jašče danych niama. Pakul my nie možam skazać, kali ich možna čakać. Jak tolki [jany buduć hatovyja], infarmacyja adrazu źjavicca na sajcie, — adkazali ŭ Biełstacie.
— Heta niejak źviazana z pandemijaj?.
— Nie. Danyja jašče znachodziacca ŭ pracesie apracoŭki, — adkazali ŭ arhanizacyi.
Nahadajem, Biełstat nie publikuje danyja ab naradžalnaści i śmiarotnaści ŭ Biełarusi z maja 2020 hoda. Heta značyć, samyja śviežyja danyja pa hetych pakazčykach hramadskaści viadomyja tolki za 2019 hod.
Uletku 2020 hoda sa statystyki AAN vynikała, što ŭ Biełarusi śmiarotnaść pa vynikach pieršaha paŭhodździa pabiła piacihadovy rekord. Pamierłych naličvałasia 66,9 tysiačy, choć na praciahu papiarednich hadoŭ hety pakazčyk nie pieravyšaŭ 62,5 tysiačy. A ŭ červieni 2020-ha kolkaść śmierciaŭ na 3753 vypadki pieravysiła pakazčyk za toj ža miesiac 2019 hoda. Adrazu paśla taho, jak miedyja apublikavali hetuju infarmacyju, u bazie danych AAN jaje pierastali abnaŭlać. Heta moža śviedčyć pra toje, što Biełaruś bolš nie padavała arhanizacyi hetyja źviestki.
U listapadzie 2020 hoda ŭ Biełstacie tłumačyli, što statystyku da taho času nie apublikavali, tamu što «SAAZ pakul jašče nie raspracavała adzinuju mietadałohiju ŭliku kolkaści pamierłych ad nastupstvaŭ, źviazanych z pandemijaj COVID-19».
Praz bolš čym hod paśla adsutnaści danych pa śmiarotnaści ŭ statystyčnym kamitecie adkazvali, što danyja ŭsio jašče znachodziacca «ŭ pracesie raspracoŭki» i nie viedali, kali hetaja infarmacyja budzie hatovaja da publikacyi.
