Pavodle hienierała Załužnaha, vajna ŭžo daŭno nie źjaŭlajecca łakalnym kanfliktam siaredniaj intensiŭnaści. Jana praciahvajecca miesiacami, i kanflikt nijak nie ŭkładvajecca ŭ kancepcyju «blickryhu», jakuju spadziavalisia realizavać rasijanie. Jak havorycca ŭ artykule, vajna pieraniasiecca i na 2023 hod.
Čaho možna čakać ad rasijan?
Załužny bačyć apieratyŭnyja pierśpiektyvy dla praciŭnika na Iziumskim i Bachmuckim kirunkach. Kancavoj metaj hetaha rasijanie bačać vychad na miežy Danieckaj vobłaści. Jašče bolš pryvablivaj dla rasijan moža vyhladać pierśpiektyva prasoŭvańnia na Zaparožskim kirunku. Heta stvaraje niepasrednuju pahrozu dla Zaparožža i Dniapra, što pryviadzie da straty kantrolu ŭkraincami nad značnaj častkaj terytoryi Levabiarežnaj Ukrainy.
Nie vyklučaje ŭ svaim artykule Załužny i toje, što rasijanie zachočuć znoŭ pasprabavać zachapić Kijeŭ i znoŭ vykarystać dla hetaha biełaruskuju terytoryju.
Ale najbolš mahčymaściaŭ adkryvaje dalejšaje prasoŭvańnie ŭ Paŭdniovabuhskim kirunku z apieratyŭnaha płacdarma na pravym bierazie Dniapra. Tady ŭ rasijan uźniknuć pierśpiektyvy avałodańnia Mikałajevam i Adesaj, a taksama źjavicca pahroza dla Kryvoha Roha.
Čamu Krym klučavy faktar, ale nie adziny?
Załužny adznačaje, što Krym byŭ i zastajecca asnovaj dla linij kamunikacyj na paŭdniovym stratehičnym fłanhu rasijskaj ahresii. U Krymie — hałoŭnaja baza Čarnamorskaha fłotu Rasii i sietka aeradromaŭ.
Ale ŭ 2023 hodzie, miarkuje Załužny, situacyja budzie inšaj. Pazicyi ŭkraincaŭ buduć vyznačacca pavodle taho, dzie budzie prachodzić linija sudakranańnia.
Linii sutyknieńnia majuć niavyhadnuju kanfihuracyju dla ŭkraincaŭ na Iziumskim i Bachmuckim kirunkach. Istotnyja ŭklinieńni rasijan skoŭvajuć luby apieratyŭny manieŭr ukrainskich vojskaŭ. Nie lepšaj vyhladaje i situacyja na poŭdni i ŭschodzie.
Što treba dla kontrudaraŭ USU?
Adziny sposab źmieny stratehičnaj situacyi — naniasieńnie niekalkich kontrudaraŭ. Ale jakaja terytoryja budzie centralnaj u hetym płanie?
Pry ŭmovie, kali takim centram pryciahnieńnia vyznačać kantrol nad Krymam, to ŭkraincam spatrebicca šmat resursaŭ, hrašovych vydatkaŭ, času i novaj sučasnaj zachodniaj zbroi.
Ale navat kali rasijanie i straciać Krym u vyniku kontrudaraŭ, ništo nie zmoža istotna pieraškodzić im pierabazavacca ŭ Novarasijsk. I pahroza rakietnych udaraŭ i vykarystańnia avijacyi dla ŭkraincaŭ zachavajecca.
Tamu Załužny prapanuje vyznačyć inšy centr ciažkaści dla rasijan.
Supraćstajańnie Rasii i Ukrainy vyznačajecca dyspraporcyjaj u zdolnaściach. US Ukrainy, u najlepšym vypadku, mohuć nanosić udary sastarełymi srodkami paražeńnia tolki na hłybiniu apieratyŭnaha tyłu praciŭnika. U toj čas jak rasijanie zdolnyja biespakarana nanosić kropkavyja ŭdary pa celach na ŭsioj hłybini terytoryi Ukrainy.
Ale jak rasijan pazbavić takoj pieravahi? Rašeńnie Załužny bačyć u pastaŭkach sajuźnikami Ukrainy sistem uzbrajeńnia abo bojeprypasaŭ z adpaviednaj dalokaściu dziejańnia. Tolki ŭ hetym vypadku možna abmiarkoŭvać upłyŭ na realny centr ciažkaści Rasii ŭ hetaj vajnie.
Rasija maje vielizarnuju terytoryju. Dziakujučy hetamu, rasijanie nie tak baluča ŭsprymajuć straty, niaŭdačy, a hałoŭnaje — košt hetaj vajny. Na dumku Załužnaha, rasijanie tady rasčarujucca ŭ vajnie, kali buduć «zblizku» adčuvać jaje nastupstvy.
Što źjaŭlajecca krynicaj upeŭnienaści i hatoŭnaści dla kiraŭnictva Rasii i rasijskaha hramadstva padtrymlivać vajnu suprać Ukrainy i ščyra vieryć u pravilnaść jaje zaviaršeńnia? Na dumku Załužnaha, mienavita adčuvańnie biespakaranaści, jakoje farmujecca dziakujučy vialikaj adlehłaści i prastoram Rasii.
A voś pieraasnaščeńnie US Ukrainy sistemami ŭzbrajeńnia adpaviednaj dalokaści dziejańnia mohuć źmianić situacyju i zrabić pierałom u vajnie.
Pra dapamohu sajuźnikaŭ Ukrainy
Załužny piša, što isnujuć dva istotnyja faktary, jakija ŭpłyvajuć na dapamohu sajuźnikaŭ Ukrainie.
Pieršy — niapravilnaje ŭjaŭleńnie pra maštaby rasijska-ŭkrainskaj vajny. Sajuźnikam ciažka ŭjavić sabie ŭ realnaści bajavyja dziejańni ŭ styli Druhoj suśvietnaj vajny.
Druhim faktaram źjaŭlajecca niepasrednaja pahroza prymianieńnia taktyčnaj jadziernaj zbroi. Bajavyja dziejańni na terytoryi Ukrainy ŭžo prademanstravali, nakolki Rasija hrebuje pytańniami suśvietnaj jadziernaj biaśpieki. Nielha ihnaravać pahrozu, jakaja źjavicca dla ŭsioj Jeŭropy. Nielha taksama całkam vyklučać imaviernaść pramoha ŭciahvańnia viadučych krain śvietu ŭ «abmiežavany» jadzierny kanflikt.
«Lubyja sproby praktyčnych krokaŭ pa ŭžyvańni taktyčnaj jadziernaj zbroi pavinny być spynienyja z vykarystańniem usiaho arsienała srodkaŭ, jakija jość u rasparadžeńni krain śvietu. Bo, pačynajučy z hetaha momantu, Rasija ŭžo nie tolki stanie pahrozaj dla mirnaha suisnavańnia Ukrainy, inšych jaje susiedziaŭ i šerahu jeŭrapiejskich krain, ale i dziaržavaj-terarystkaj sapraŭdy suśvietnaha maštabu», — havorycca ŭ artykule.
