Charkaŭskaja vobłaść, lipień 2022 hoda. Fota: AP / Jaŭhien Małaletka
Ukrainski kontrnastup u Charkaŭskaj vobłaści razhramiŭ rasijskija vojski, jakija tam bazavalisia. Jany śpiešna pakidajuć paŭdniovy ŭschod Charkaŭskaj vobłaści, kab paźbiehnuć akružeńnia vakoł Iziuma. Rasijskija vojski raniej asłabili paŭnočnuju voś Danbasa, pieradysłakavaŭšy padraździaleńni z hetaha rajona na poŭdzień Ukrainy, tym samym uskładnili sabie zadaču zapavolić ukrainski nastup abo, jak minimum, razharnuć siły prykryćcia dla adstupleńnia.
Ukrainskija vojski prarvali rasijskija linii ŭhłyb da 70 kiłamietraŭ u niekatorych miescach i zachapili bolš za 3000 kvadratnych kiłamietraŭ terytoryi za apošnija piać dzion z 6 vieraśnia — bolš terytoryi, čym rasijskija vojski zachapili z krasavika.
Ukrainskija vojski, chutčej za ŭsio, vyzvalać sam horad Izium u najbližejšyja 48 hadzin, kali jany jašče hetaha nie zrabili, robić vysnovu ISW.
Vyzvaleńnie Iziuma stała b samym značnym vajennym dasiahnieńniem Ukrainy z momantu pieramohi ŭ bitvie za Kijeŭ u sakaviku. Heta vyklučyła b prasoŭvańnie Rasii na paŭnočnym zachadzie Danieckaj vobłaści ŭzdoŭž šašy Je40, jakuju rasijskija vajskoŭcy sprabavali vykarystać dla abychodu ŭkrainskich pazicyj z fłanhu ŭzdoŭž linii Słaviansk — Kramatorsk.
Rasijskija vajskovyja karespandenty i błohiery taksama paviedamlali ab prablemach pry evakuacyi ź Iziuma — heta śviedčyć pra toje, što ŭkrainskija siły častkova zakryvajuć kacioł u niekatorych rajonach.
Ministerstva abarony Rasii abviaściła ab advodzie vojskaŭ ź linii Bałakleja — Izium 10 vieraśnia, iłžyva pradstaviŭšy adstupleńnie jak «pierahrupoŭku» sił dla padtrymki rasijskich namahańniaŭ u napramku Danieckaj vobłaści.
Abviaščeńnie ab vyvadzie vojskaŭ, piša ISW, jašče bolš adšturchnuła rasijskich vajennych błohieraŭ i nacyjanalistaŭ, jakija padtrymlivajuć hrandyjoznaje bačańnie Kramla ŭ zachopie ŭsioj Ukrainy. Rasijskija vajennyja błohiery asudzili Ministerstva abarony za toje, što jano zastavałasia cichim, vybraŭšy samaizalacyju, i za skažeńnie situacyjnaj daśviedčanaści ŭ Rasii.
Da abviaščeńnia ab vyvadzie vojskaŭ Minabarony Rasii apublikavała kadry rasijskich vajskovych kałon, jakija, jak paviedamlajecca, 9 vieraśnia ruchalisia dla ŭzmacnieńnia Charkaŭskaha kirunku. Mnohija rasijskija ŚMI i błohiery vykazali nadzieju, što hetyja padmacavańni stabilizujuć liniju frontu i adabjuć nastup ukrainskich vojskaŭ na Izium, niahledziačy na toje, što Minabarony Rasii nie zmahło spravicca ź situacyjaj.
«Rasijskija vajennyja błohiery, vierahodna, pryniali b zajavu Minabarony ab vyvadzie vojskaŭ, jak jany raniej pastupili z adstupleńniem rasijan z vostrava Źmiainy i inšymi taktyčnymi stratami, kali b rasijskaja infarmacyjnaja prastora nie była pieranasyčanaja kadrami ŭkrainskich pośpiechaŭ», — miarkuje ISW.
Rasijskija błohiery taksama raskrytykavali akupacyjnyja ŭłady za niazdolnaść arhanizavać evakuacyju ŭ Charkaŭskaj vobłaści. Niekatoryja błohiery adznačyli, što akupacyjnyja administracyi dezaryjentavanyja i im nie chapaje inicyjatyvy. Ukrainski kontrnastup faktyčna paralizuje akupacyjnaje kiraŭnictva, jakoje, vierahodna, baicca za svoj los.
