Źniatyja rasijskija ściahi ŭ Vaŭčansku
Minabarony Rasii pryznała adstupleńnie. Jana paznačaje jak padkantrolnuju sabie tolki zonu pa levym baku raki Askoł, dzie vialikich haradoŭ niama. Heta aznačaje, što ŭkraincy za tydzień — ich nastup pačaŭsia 5 vieraśnia — vyzvalili kala 8400 kvadratnych kiłamietraŭ.
Rasijanie akupavali 18-tysiačny Vaŭčansk u pieršy dzień vajny. Horad znachodzicca za 77 km ad Charkava i za 2 km ad miažy z Rasijaj.
Raniej miascovyja žychary ŭźniali ŭkrainskija ściahi taksama ŭ pasiołku haradskoha typu z 5-tysiačnym nasielnictvam Kazačaja Łopań na poŭnačy Charkaŭščyny na samaj miažy z Rasijaj.
Heta taksama zdaryłasia paśla adychodu rasijskich čaściej. Kazačaja Łopań była pad akupacyjaj z sakavika hetaha hoda.
Pryčyny rasijskaha adstupleńnia tut niajasnyja, bo ŭkrainski nastup ad Kupianska ŭ kirunku Vaŭčanska adbyvajecca prykładna za 100 km adsiul na paŭdniovy ŭschod. Mahčyma, Rasii krytyčna brakuje siłaŭ, kab utrymać novy rubiež abarony pa Askole i Dancy, i Maskva vymušanaja pierakidvać tudy padmacavańni, ahalajučy inšyja kirunki ŭ spadziavańni, što ŭkrainskija vojski ŭsio adno nie buduć pierachodzić dziaržaŭnaj miažy.
Karty stanovišča na froncie chutka starejuć. Na hetaj Vaŭčansk byŭ paznačany jak usio jašče padkantrolny rasijskim vojskam.
Kinutaja na pierapravie rasijskaja vajskovaja technika. Charkaŭskaja vobłaść
Miarkujučy pa videa i fota z Charkaŭskaj vobłaści, ukrainskija vojski zachapili sotni adzinak techniki, u tym liku dziasiatki tankaŭ, kompleksy «Tor» i «Zaapark», samachodku «Akacyja» i haŭbicy «Msta».
Internet poŭnicca emacyjnymi videa, jak miascovyja žychary sustrakajuć ukrainskuju armiju z kvietkami i ściahami paśla paŭhadavoj akupacyi.
Pačali mianiacca i nastroi ŭ rasijskich sacyjalnych sietkach, i navat ton jašče niadaŭna fanaberystych prapahandystaŭ.
