Fota: AR
Ministerstva aśviety RF vypuściła zajavu, u jakoj śćviardžajecca, što infarmacyja pra zatrymańnie rasijskich nastaŭnikaŭ na vyzvalenych Ukrainaj terytoryjach nie adpaviadaje rečaisnaści.
«Usie jany znachodziacca tam, dzie situacyju kantralujuć rasijskija vajskoŭcy i vajskoŭcy Danieckaj i Łuhanskaj narodnych respublik. Vykładčyckuju dziejnaść u charkaŭskich škołach z 1 vieraśnia viaduć miascovyja piedahohi», — paviedamiła pres-słužba viedamstva.
U toj ža čas Śledčy kamitet RF raspačaŭ kryminalnuju spravu pa fakcie zatrymańnia piedahohaŭ na deakupavanych terytoryjach. Pa jakim artykule raspačataja sprava, nieviadoma.
«Piedahohi vykładali ŭ rehijanalnych škołach pa rasijskaj vučebnaj prahramie. Pradstaŭnikami kijeŭskaha režymu hetaja dziejnaść kvalifikavanaja jak złačynstva, arhanizavany ich kryminalny pieraśled», — havorycca ŭ paviedamleńni SK RF.
U siaredzinie žniŭnia ŚMI paviedamlali pra rekrucinh rasijskich nastaŭnikaŭ u škoły tak zvanych «ŁNR» i «DNR» i inšyja akupavanyja terytoryi. Školnyja nastaŭniki adtul taksama jeździli na kursy pierapadrychtoŭki ŭ Rasiju, kab vykładać pa rusifikavanych prahramach.
12 vieraśnia vice-premjer Ukrainy Iryna Vieraščuk paviedamiła pra zatrymańnie rasijskich piedahohaŭ na deakupavanych terytoryjach. Pavodle jaje, u vyzvalenych nasielenych punktach zatrymali rasijskich nastaŭnikaŭ, jakija pryjechali vučyć dziaciej pa rasijskich prahramach.
Vieraščuk adznačyła, što zatrymanym rasijanam budzie pradjaŭlenaje abvinavačańnie za «parušeńnie zakonaŭ i zvyčajaŭ vajny». Maksimalnaje pakarańnie — 12 hadoŭ pazbaŭleńnia voli. Pavodle jaje, adkaznaść paniasuć taksama i ŭkrainskija nastaŭniki, jakija pahadzilisia vykładać pa prahramie RF.
