Ad kalcavoj u rajonie Navinak da ST «Kalazieja» — 18 kiłamietraŭ i prykładna stolki ž chvilin jazdy na aŭtamabili. Nasieleny punkt znachodzicca ŭ Biełaruckim sielsaviecie, što na zachodniaj uskrainie Łahojskaha rajona. Za piać kiłamietraŭ ad tavarystva možna znajści i papularnaje miesca adpačynku minčan − vadaschovišča na race Viača.
Da ŭjezdu ŭ pasiołak viadzie dobraja daroha. Treba prajechać niekalki sadovych tavarystvaŭ (u adnym, darečy, jość nievialikaja kramka), «instahramnyja» pali i treba źviarnuć naleva da leciščaŭ. Vidać, što novaja asfaltavaja kroška ad asnoŭnaj darohi da varot źjaviłasia zusim niadaŭna.
Da najbližejšaha aŭtobusnaha prypynku ad «Kalaziei» − mietraŭ 500. Tut niekalki raz na dzień chodziać aŭtobusy i maršrutka.
Terytoryja tavarystva abharodžanaja płotam. Pobač z uvachodam raźmiaściłasia pryhožaja kampazicyja z kamianioŭ. Tut ža niepadalok — śmiećcievaja placoŭka.
Usie darohi ŭnutry pasiołka — hruntavyja. Dzie-nidzie jany vyhladajuć prystojna, ale ŭ niekatorych prajezdach u doždž možna i zachrasnuć.
Pasiołak składajecca ź niekalkich paralelnych vulic i 281 učastka. Jość hatovyja damy, ale mnohija katedžy — u pracesie ŭźviadzieńnia.
U tavarystva jość svoj sajt. ST «Kalazieja» było zarehistravanaje ŭ 2010 hodzie. Jano stvarałasia dla supracoŭnikaŭ Vialikaha teatra opiery i baleta, a taksama rabotnikaŭ inšych arhanizacyj, jakija ŭdzielničajuć u asvajeńni terytoryi. U adkrytych krynicach možna znajści i proźviščy ŭłaśnikaŭ učastkaŭ. Siarod ich — zasłužanyja artysty, viadučyja salisty opiernaha teatra, muzykanty Dziaržaŭnaj fiłarmonii. Uvohule, kali vybrać hetaje tavarystva miescam dla žyćcia, jość šaniec sustreć na ranišniaj prahułcy zorku ajčynnaj opiery abo baleta.
Z kamunikacyj u pasiołku prysutničaje elektryčnaść (try fazy 380) i centralny padziemny vodapravod. Taksama členy tavarystva abmiarkoŭvajuć pytańnie stvareńnia kaapieratyva dla praviadzieńnia hazu.
Jak i bolšaść novych sadovych tavarystvaŭ, «Kalazieja» bolš padobnaja na dobry katedžny pasiołak — vialikija ŭčastki, šyrokija darohi, damy. Ciapier tut možna znajści ŭsie vidy sučasnaha domabudavańnia — damy z brusa, «karkaśniki», katedžy z błokaŭ.
Miarkujučy pa fatahrafijach u sacsietkach, tavarystva «Kalazieja» dastatkova družnaje i aktyŭnaje — tut rehularna pravodziacca subotniki i inšyja mierapryjemstvy.
Što tyčycca členskich uznosaŭ, to jany składajuć 48 rubloŭ u kvartał. Akramia rehularnych, u tavarystvie jość i metavyja ŭznosy — da prykładu, na padsypku daroh i inšyja patreby. U hetym hodzie jany vyznačanyja ŭ pamiery 600 rubloŭ. Taksama ŭ tavarystva vialikija płany pa asvajeńni terytoryi — u centry pasiołka ŭ budučyni moža źjavicca zona adpačynku.
Što tut pradajecca?
Praz Realt.by u sadovym tavarystvie «Kalazieja» pradajecca kala 15 abjektaŭ. Jość ziamielnyja ŭčastki pad budaŭnictva, jość «skrynki», jakija pryjdziecca davodzić da rozumu, jość damy, całkam hatovyja da pražyvańnia.
Samy niedarahi varyjant — učastak pobač ź lesam, biez pabudoŭ, ale z padviedzienymi kamunikacyjami. Za nadzieł płoščaj 10 sotak prosiać 12 tysiač dalaraŭ. Taksama ŭ prodažy jość učastki koštam ad 15 da 33 tysiač dalaraŭ (apošni — 20 sotak).
Ź niedabudavanych katedžaŭ — jość voś taki dom płoščaj 310 «kvadrataŭ». Jon pradajecca za 29,9 tysiačy dalaraŭ.
Dla tych, kaho zadavalniaje siezonny adpačynak, jość dača z kaminam i vychadam da lesu. Vada ŭ domie tolki chałodnaja, tualet na vulicy. Košt — 45 tysiač dalaraŭ.
Nievialiki adnapaviarchovy dom (88 «kvadrataŭ») z usimi vyhodami dla pražyvańnia kruhły hod prapanujecca za 92 tysiačy dalaraŭ.
A voś hetaja ŭtulnaja dača ŭ styli «Pravans» kaštuje 99 tysiač dalaraŭ.
Z bolš źmiaščalnaha — dom płoščaj 145 «kvadrataŭ» 2020 hoda pabudovy. U katedžy vialikaja haścioŭnia, 4 spalni, 2 sanvuzła, amal usie vokny — u padłohu, jość łaźnia. Terytoryja ŭčastka — 20 sotak, haspadarčy błok, navies dla parkoŭki dvuch aŭtamabilaŭ. Košt — 190 tysiač dalaraŭ.
