Alaksandr Łukašenka, 17 vieraśnia. Skrynšot ź videa
Alaksandr Kłaskoŭski raić nie pierabolšvać značeńnia hučnych zakonaŭ, jakija siońnia pryniała rasijskaja Dziaržduma.
Jon nahadvaje, što jany byli pryniatyja Dumaj u druhim i trecim čytańni, a ŭ pieršym čytańni nižniaja pałata rasijskaha parłamienta razhladała ich jašče ŭletku, tak što asabliva novaha ŭ ich ničoha niama.
Na dumku Kłaskoŭskaha, za hetymi zakonami staić žadańnie zakrucić hajki: «Vidavočnyja prablemy z dyscyplinaj i matyvacyjaj tych, chto siońnia ŭdzielničaje ŭ bajavych dziejańniach va Ukrainie i kaho mohuć zaŭtra tudy pasłać.
Usie hetyja zachady skiravanyja na toje, kab zastrašyć ludziej, kali chočaš ty ci nie chočaš, ale musiš iści na hetuju vajnu, i niama čaho zdavacca ŭ pałon, bo za heta taksama ŭstanaŭlivajecca kryminalnaja adkaznaść. Karaciej, heta žadańnie bizunom matyvavać vajakaŭ, ciapierašnich i budučych, jakija, vidać, nie nadta chočuć achviaravać žyćciom dziela impierskich intaresaŭ».
Što da terminovaha pryznačeńnia refierendumaŭ na akupavanych terytoryjach, palitołah miarkuje, što jano moža być vyklikanaje chutkim ukrainskim kontrnastupam.
Kreml, kaža Kłaskoŭski, choča ŭvieści akupavanyja ŭkrainskija ziemli ŭ skład Rasii, kab potym kazać, što ruskija, maŭlaŭ, abaraniajuć śviatyja rubiažy Ajčyny, i raźviazać sabie ruki: «Adna reč, kali heta «śpiecapieracyja» na ŭkrainskaj terytoryi, i inšaja — kali heta nibyta abarona rasijskich ziamiel. Tady ŭžo možna kazać, što my možam skinuć na vas jadziernuju bombu, bo heta naša ziamla, a vy — ahresary».
Analityk kaža, što praviadzieńnie refierendumaŭ — nie inicyjatyva lidaraŭ maryjanietkavych utvareńniaŭ na terytoryi Ukrainy, hetyja ludzi całkam kiravanyja Kramlom i ciapier prosta atrymali admašku na hałasavańnie.
Pryniataje rašeńnie abvastraje situacyju, bo naturalna, što ŭkraincy nastrojenyja advajavać svaje ziemli, miž tym jak paśla «refierendumaŭ» praciah ich nastupu budzie ŭsprymacca ŭ Maskvie bolš žorstka — jak napad na terytoryju Rasijskaj Fiederacyi.
Praz hetyja kroki Kramla, ličyć Kłaskoŭski, Łukašenku robicca ŭsio bolš dyskamfortna. Toj, miarkuje ekśpiert, užo daŭno adčuŭ, što tak zvanaja śpiecapieracyja nie idzie pavodle płana i što kroki Pucina buduć baluča adhukacca i Rasii, i Biełarusi, ale vyskačyć z hetaj kalainy Łukašenka nie moža, bo jon apynuŭsia ŭ fatalnaj zaležnaści ad Kramla.
Chacia Łukašenku i treba razbłakavać kamunikacyju z Zachadam, ale ž jon znachodzicca pad pilnym nahladam Maskvy, bolš za toje — baicca vypuścić palitviaźniaŭ, kab nie raschistać situacyju ŭnutry Biełarusi. Skazać Pucinu, kab toj vyvodziŭ svaje vojski ź Biełarusi, Łukašenka taksama nie moža.
Alaksandr Kłaskoŭski
Tamu, miarkuje palityčny analityk, Łukašenka vymušany dekłaravać sajuźnickuju viernaść Kramlu. Naprykład, padčas siońniašniaj narady ź dziaržsakratarom Rady biaśpieki Valfovičam jon kazaŭ: treba adkryta napisać u novaj redakcyi Kancepcyi nacyjanalnaj biaśpieki, što Biełaruś maje faktyčna adny ŭzbrojenyja siły z Rasijaj. Kłaskoŭski nazyvaje hetaje pryznańnie vielmi krasamoŭnym, jakoje paćviardžaje mierkavańnie analitykaŭ ab tym, što vajskovy suvierenitet Biełarusi stračany. Ale pry hetym analityk źviartaje ŭvahu na toje, što Łukašenka pa-raniejšamu sprabuje adkrucicca ad adpraŭki biełaruskich vojskaŭ va Ukrainu. Tamu jon demanizuje NATA i Polšču, ale heta, pa mierkavańni Kłaskoŭskaha, admazka: maŭlaŭ, my abaraniajem vas ad Zachadu.
«Siońniašnija kroki Kramla — heta dla Łukašenki jašče i novy simptom, što jon ulip z saŭdziełam u ahresii. Pakolki situacyja va Ukrainie budzie abvastracca, Łukašenku mała nie zdasca, i jon nie viedaje, što rabić. Varta adznačyć jašče i jaho pavyšanuju tryvožnaść, jakaja vyjaviłasia ŭ siońniašniaj frazie pra toje, što «śviadomyja — heta vorahi».
Voś vam i falšyvaść tezy pra narodnaje adzinstva. Narod dla Łukašenki — heta jaho pamahatyja i tyja, chto jaho padtrymlivaje, a astatnija — heta vorahi», — padsumoŭvaje analityk.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čamu Kreml vyrašyŭ «nieadkładna» anieksavać ukrainskija terytoryi — tłumačeńnie «Mieduzy»
«Refierendumy» ŭ «ŁNR», «DNR» i Chiersonie projduć užo na hetym tydni
Łukašenka patrabuje praciahu represij: «Śviadomyja» — heta vorahi
