Ciapier pierasialencam z Ukrainy možna budzie afarmlać u Biełarusi piensii i dapamohi biez patreby padavać dakumienty, jakija śviedčyli b, što va Ukrainie ich jamu nie płaciać. Da ŭkaza Łukašenki ad 14 vieraśnia piensiju i dapamohi mahli pryznačyć tolki pry najaŭnaści takich dakumientaŭ.
Pry hetym udakładniajecca, što pytańnie ab pryznačeńni piensii moža być razhledžanaje tolki pry ŭmovie pastajannaha pražyvańnia ŭ Biełarusi (dazvoł na žycharstva — dla niehramadzian, identyfikacyjnaja karta hramadzianina abo biełaruski pašpart — dla hramadzian krainy).
Pry zachavańni pieraličanych umoŭ piensii i dapamohi pierasialencam z Ukrainy buduć pryznačacca pavodle tych ža samych normaŭ, što i biełarusam. Dla pryznačeńnia piensii im treba źviarnucca va ŭpraŭleńnie pa pracy, zaniataści i sacyjalnaj abaronie pa miescy rehistracyi. Za dapamohami taksama možna źviartacca pa miescy pracy (słužby) abo vučoby (pry dzionnaj formie atrymańnia adukacyi).
Taksama dla stymulacyi pracaŭładkavańnia pierasialencaŭ z Ukrainy spraščajecca paradak pryjomu ich na pracu. Tak, pry afarmleńni śpiecdakumienta ŭ orhanach unutranych spraŭ atrymlivać dazvoł na pracaŭładkavańnie ŭ kamitecie pa pracy, zaniataści i sacyjalnaj abaronie abłasnoha (Minskaha haradskoha) vykankamaŭ nie treba.
Akramia taho, ukraincaŭ biez dakumientaŭ ab adukacyi (navučańni), jakija paćviardžajuć kvalifikacyju (razrad) pa prafiesii rabočaha, mohuć prymać na pracu pa takoj prafiesii z nastupnym nakiravańniem ich na prafiesijnuju padrychtoŭku, pierapadrychtoŭku, pavyšeńnie kvalifikacyi.
Čytajcie taksama:
Łukašenka daŭ ukrainskim biežancam pravy, roŭnyja ź biełarusami
