U Polščy zarehistravana bolš za 3700 kampanij ź biełaruskim kapitałam.

Mnohija biełaruskija zasnavalniki startapaŭ, kiraŭniki i ŭłaśniki kampanij pryniali rašeńnie ab «hieahrafičnaj dyviersifikacyi» svajho biznesu. Jany adkryvajuć ofisy i pradstaŭnictvy za miažoj i pieravodziać tudy svaich supracoŭnikaŭ.

U kastryčniku 2020 hodu Sajuz polskich pradprymalnikaŭ i pracadaŭcaŭ (ZPP) arhanizavaŭ kantaktny punkt dla inviestaraŭ ź Biełarusi, krychu paźniej byŭ zapuščany biaspłatny prajekt Belarus Business Center — «Biełaruski biznes-centr» (VVS).

Pavodle pradstaŭnika «Biełaruskaha biznes-centra», z pačatku 2022 hoda ŭ Polščy zarehistravali kala 500 kampanij, dzie adzin z zasnavalnikaŭ — fizičnaja albo jurydyčnaja asoba ź Biełarusi. A ŭsiaho ŭ Polščy zarehistravana 3709 kampanij ź biełaruskim kapitałam.

U Polščy pradkazalnaje biznes-asiarodździe i zakanadaŭstva, kankurentazdolny ŭzrovień padatkaabkładańnia, zatrat na rabočuju siłu i ofisy, kažuć pradstaŭniki Centra. Da taho ž tut jość vialikaja biełaruskaja dyjaspara, i rełakavanyja supracoŭniki mohuć adčuvać siabie kamfortna.

Usie pasłuhi ŭ ofisie VVS biaspłatnyja

22 vieraśnia ŭ centry Varšavy adkryŭsia Open Space dla biełaruskich kampanij.

Na ŭračystaj cyrymonii adkryćcia ofisu vystupiła kiraŭnica prahram USAID u Biełarusi Džena Tadžčman (Jenna Tajchman), jakaja paabiacała biełaruskim biznesmienam usiebakovuju padtrymku i dapamohu.

U čyrvonym — kiraŭnica prahram USAID u Biełarusi Džena Tadžčman

U čyrvonym — kiraŭnica prahram USAID u Biełarusi Džena Tadžčman

U novym ofisie jość abstalavanyja pracoŭnyja miescy, kanfierenc-zała, pieramoŭnyja, kuchnia.

Biełaruskija kampanii mohuć vykarystoŭvać hety ofis na pačatku svajoj dziejnaści ŭ Polščy.

Pavodle raźlikaŭ zasnavalnikaŭ, takaja dapamoha asabliva patrebnaja dla małoha i siaredniaha biznesu, jaki pracavaŭ na ekspart, na zachodnija rynki. Mnohija kampanii nie majuć finansavych mahčymaściaŭ, kab adrazu pieravieźci ŭsich supracoŭnikaŭ, tamu pierajazdžajuć pastupova: spačatku kiraŭniki pačynajuć z-za miažy inviestavać, šukajuć suajčyńnikaŭ u Polščy.

«Tut biełaruskamu biznesu hatovyja dapamahčy ŭ pytańniach padatkaabkładańnia, polskaha zakanadaŭstva, arendy ofisaŭ, rynku pracy i ŭ inšych važnych aśpiektach u pracesie rełakacyi.

Tut možna atrymać jurydyčnyja kansultacyi na ŭsich etapach adkryćcia i viadzieńnia biznesu, padtrymku ŭ kantaktach z orhanami ŭłady Polščy, mientarskuju padtrymku ad polskich ekśpiertaŭ, paŭdzielničać u šmatlikich sieminarach, vebinarach i treninhach. My chočam, kab hety ofis staŭ placoŭkaj, dzie možna znajści adnadumcaŭ, sustrecca ź inšymi biznesmienami», — kaža pradstaŭnik Biełaruskaha biznes-centra.

Usie pasłuhi ŭ ofisie «Biełaruskaha biznes-centra» biaspłatnyja.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?