Sinim paznačanyja prykładnyja kirunki nastupu ci atak ukrainskaj armii. Čyrvonym — prykładnyja linii rasijskaj abarony na 24 vieraśnia.
«U rajonie Redkaduba Uzbrojenym siłam Ukrainy ŭdałosia pracisnuć druhuju liniju rasijskaj abarony. Ukrainskija farmavańni vyjšli na apieratyŭnuju prastoru na poŭnačy ad nasielenaha punkta, dzie adsutničaje sucelnaja linija abarony», — piša infarmavany rasijski frantavy błohier «Rybaŕ».
Pa infarmacyi Rybara, padmacavańni sa składu rasijskaj 20-j armii praviali kontrataku i adbili vioski Karpaŭka i Novaje, adnak ukraincy zamacavalisia ŭ Redkadubie i «vialikimi siłami motapiachoty» raźvivajuć nastup na poŭnač ad jaho ŭ kirunku darohi Baravaja—Svatava.
I rasijskija šavinistyčnyja błohiery, i kiraŭnik kałabaracyjnaj administracyi Daniecka Dzianis Pušylin śćviardžajuć, što «ŭkraincy majuć vialikuju pieravahu ŭ žyvoj sile i technicy», što moža aznačać padrychtoŭku hramadskaj dumki da apraŭdańnia adstupleńnia.
Adnačasova, paviedamlaje rasijski błohier WarGonzo, ukrainskija vojski nastupajuć z rajona pasiołka Dvurečnaja prykładna ŭzdoŭž rasijskaj miažy.
Ukraincy stvaryli šmatlikija płacdarmy na levym bierazie raki Askoł, u tym liku ŭ Kupiansku i Siańkovie, što daje im vialiki vybar kirunkaŭ nastupu, kančatkovaj metaj jaho bačycca Svatava. Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-y dzień vajny.
Vyzvaleńnie Svatava mieła b jak stratehičnyja, tak i maralnyja nastupstvy.
Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.
Zachop Svatava, važnaha čyhunačnaha centra, aznačaŭ by taksama apieratyŭnaje akružeńnie horada Liman pa vialikim kole. Liman trymaje vialikaja rasijskaja hrupoŭka.
U vyniku imklivaha nastupu 5—10 vieraśnia ŭkrainskaja armija vyzvaliła Bałakleju, Kupiansk, Izium i Vaŭčansk, a rasijskija złučeńni chaatyčna adstupili na levyja bierahi rek Daniec i Askoł. U vyniku rasijanam nie ŭdałosia stvaryć nadziejnaj linii abarony pa hetych rekach, jak jany spadziavalisia, ale i ŭkrainskaja armija nie zaniała z nalotu Liman i Svatava. Bai roznaj intensiŭnaści na podstupach da hetych haradkoŭ praciahvajucca ŭžo amal dva tydni.
Miarkujučy pa paviedamleńniach z dvuch bakoŭ, ukrainskija vojski prasunulisia na levym bierazie Danca i Askoła na 5—20 kiłamietraŭ u piaci-šaści kirunkach adnačasova. Ukrainski płacdarm na levym bierazie Sievierskaha Danca ŭ rajonie Śviatahorska i Iziuma razrośsia da bolš jak paŭtysiačy kvadratnych kiłamietraŭ.
Kamandavańnie Uzbrojenych sił Rasii kidaje ŭ boj reziervy z metaj skavać častki ŭkrainskich vojskaŭ i źnizić tempy ich prasoŭvańnia, vyjhraŭšy čas dla stvareńnia sucelnaj linii abarony i stabilizacyi situacyi na froncie. Vyhladaje, što hetych reziervaŭ mała.
