Popyt na pasutačnuju arendu źviazvajuć z tym, što ŭ Biełaruś jedzie šmat rasijan. Z-za pavialičanaha popytu rastuć i ceny. A arendadaŭcy, jakija zdajuć kvatery ŭ subarendu, u kułuarach abmiarkoŭvajuć, što ŭłaśniki taksama padymuć ceny.
«Chtości choča źniać kvateru na miesiac, chtości na tydzień. Ja miarkuju, što heta čas, za jaki ludzi spadziavajucca kupić kvitki, kab palacieć u inšyja krainy, — niekalki dzion tamu raspaviadaŭ Realt adzin z arendadaŭcaŭ. — Čaściej za ŭsio heta siemji ź dziećmi, radziej byvajuć adzinokija mužčyny. Zrazumieć, što heta mienavita rasijanie, nie składana. Pa-pieršaje, jany niapravilna vymaŭlajuć nazvy našych viadomych vulic, a pa-druhoje, heta adrazu čuvać pa havorcy».
«Ceny, nazvanyja na sajtach, stracili svaju aktualnaść»
Kab źniać kvateru, Realt abtelefanavaŭ 15 randomnych kvater niedaloka ad centra. Tolki ŭ adnoj ź ich cana, źmieščanaja na sajcie, akazałasia aktualnaj. Prytym u nivodnuju z kvater zajechać praz paru dzion na tydzień nie atrymajecca.
U niekatorych, praŭda, prapanoŭvali zamianić na varyjant ź mienš zručnym raźmiaščeńniem, ale pa canie kvatery ŭ centry. Naprykład, zamiest kvatery na Haradskim vale za 67 dalaraŭ za sutki prapanavali varyjant na Łahojskim trakcie na 7 dalaraŭ tańniej. Na pytańnie, ci zaniataja kvatera ŭ centry, pa telefonie adkazali: «Nu, viadoma!».
«Ciapier ceny, jakija vy bačycie na sajtach, stracili svaju aktualnaść. Vielmi vialiki napłyŭ achvotnych, źniać niešta składana. Heta ŭsio pieratvarajecca ŭ kvest», — skazali pa adnym z numaroŭ.
Na tydzień zasialić tut nie zmohuć, ale jość varyjant — na dva dni. Cana zamiest 176 rubloŭ, paznačanych u abjavie, vyrastaje da 100 dalaraŭ (kala 250 rubloŭ).
Arendadaŭca, jaki zdaje bolš za 10 apartamientaŭ, skazaŭ, što ŭ jaho da kanca tydnia ŭsio zaniata. Prapanavali patelefanavać na nastupnym tydni, mahčyma źjavicca jaki-niebudź varyjant. Cana budzie — ad 160 rubloŭ. Na sajcie paznačana — ad 104 rubloŭ.
Za kvateru na Enhielsa z vydatnym ramontam na sajcie prosiać 130 dalaraŭ za sutki i abiacajuć źnižki pry braniravańni ad 5 dzion. Pa telefonie kažuć, što kvatera zaniataja, ale jość vierahodnaść, što vyzvalicca 30 vieraśnia. Ale cana na sajcie nieaktualnaja, ciapier ceny značna vyšejšyja. Budzie kaštavać 150 dalaraŭ, źnižak ciapier niama.
U kvatery z praściejšym ramontam na praśpiekcie Niezaležnaści sutki kaštujuć 90 dalaraŭ pry nazvanych na sajcie 70.
«Za 70 vy ciapier ničoha ŭ centry nie zdymiecie. Bačyli, što na rynku adbyvajecca?» — skazali pa telefonie.
