Kadr ź sieryjała: Hulu
Dvaccać hadoŭ tamu hrupa akcioraŭ zdymałasia ŭ papularnym tady sitkomie «Krok naprava». Za čas, što prajšoŭ z taho pośpiechu, zorki sitkoma tak i nie zdoleli pabudavać dobruju karjeru, ale tut kampanija Hulu (hety sieryjał — svajho rodu šou pra samich siabie) prapanuje pierazapuścić «Krok naprava».
Adna sa scenarystak vyrašaje zaprasić u novy sieryjał akcioraŭ sa staroj viersii, ale vyśviatlaje, što nie ŭsie ź ich dobra ŭładkavalisia ŭ žyćci, niekaha navat abvinavačvajuć va ŭžyvańni narkotykaŭ i chulihanstvie. Usio ž taki jany viartajucca na zdymačnuju placoŭku, i ciapier ich zadača — nanava zvyknucca adzin z adnym i pasprabavać niejak źniać kamiedyju, što była b aktualnaja ŭ novym i takim chutkim śviecie.
«Pierazapusk» kruta kpić z televizijnaj industryi i jaje absurdu. Pieršy epizod sieryjała pačynajecca z taho, što Channa, byłaja scenarystka «Kroka naprava», pradstaŭlaje svaju ideju važnym bosam z Hulu, u toj čas jak jany hutarać pra toje, jak šmat sieryjałaŭ užo pierazapuścili. Navat hałoŭnaja mieniedžarka pa kamiedyjnych filmach pryznajecca, što jana ničoha nie razumieje ŭ kamiedyjach i apynułasia na svajoj pazicyi tolki praź sieryju źlićciaŭ kampanij.
Ale ž hałoŭnaje ŭ «Pierazapusku» — heta hulnia akcioraŭ, jakaja dazvalaje stvarać u sieryjale cikavyja siužetnyja linii. Šou nie sprabuje pretendavać na niešta hłybiejšaje, čym sitkom, chacia jość namioki, što ŭ mahčymym druhim siezonie takich momantaŭ budzie bolš. Tym nie mienš, i akciorski skład «Pierazapusku», i hieroi-akciory, što sprabujuć adradzić stary sitkom na ekranie, ihrajuć cudoŭna.
«Pierazapusk» časam moža padacca sieryjałam, jaki razryvajecca pamiž dvuma pryncypami: kłasičnym śvietam sitkomaŭ i žadańniem zrabić niešta novaje, śviežaje i sučasnaje. Ale ž u vyniku sieryjał znachodzić bałans, jaki spadabajecca i amataram bolš kłasičnych sitkomaŭ, i tym, kaho cikavić satyra.
Rejtynhi na vialikich suśvietnych resursach:
IMDB — 7,6/10
Rotten Tomatoes — 86%
Što pahladzieć. «Piasočny čałaviek» — adna z najlepšych fentezi-sah hetaha hoda
Što pahladzieć. «Klea» — sieryjał pra ahientku Štazi
Što pahladzieć. «Pacyjent» — zachaplalny i strašny tryler pra psichaterapiju
