Z momantu prychodu da ŭłady dziesiać hadoŭ tamu Si raspačaŭ šerah kampanij, meta jakich — padrychtavać Kitaj da supraćstajańnia z Zachadam. Si jasna daŭ zrazumieć, što jaho hałoŭnaja zadača — viartańnie Kitaja na zakonnaje, na jaho dumku, miesca, u jakaści hłabalnaha hulca, roŭnaha ZŠA. U vyniku jon pačaŭ bačyć mahčymaść sutyknieńnia z Zachadam jak usio bolš imaviernuju.
Palityčny kirunak
U palityčnym płanie Si rasstaviŭ viernych sabie kadraŭ na ŭsich uzroŭniach Kamunistyčnaj partyi i raspraviŭsia z apazicyjaj u takich miescach, jak Hankonh i Sińczian, umacavaŭšy svaje pazicyi i adsiejaŭšy zamiežny ŭpłyŭ.
Jamu treba było pierakanacca, što jon ćviorda kantraluje partyju, jakaja była raźjadnanaja mižusobicami elity, chabarnictvam i padziełam na frakcyi padčas kiravańnia jahonaha papiarednika. Si imknuŭsia zarekamiendavać siabie jak lidar, hatovy supraćstajać karupcyi, jaki źniščaŭ supiernikaŭ u hučnych rasśledavańniach, zamianiajučy ich łajalnymi kadrami.
Jon kiravaŭ ukaranieńniem pieradavych sistem nazirańnia, jakija achapili krainu kamierami sa skanavańniem tvaraŭ i sabrali vielizarnuju kolkaść danych. Pry Si była praviedzienaja kampanija masavaha internavańnia etničnaj mienšaści ŭjhuraŭ, u vyniku jakoj vializnaja kolkaść ludziej ŭ paŭnočna-zachodnim rehijonie Sińczian była źniavolenaja ci pierasielenaja ŭ kancentracyjnyja łahiery.
Fota: Pixabay
Vajenny kirunak
U vajennym płanie Si rearhanizavaŭ Narodna-vyzvalenčuju armiju, padvoiŭ jaje biudžet i pačaŭ pracu pa pašyreńni jadziernaha arsienała Kitaja.
Abvastryłasia rytoryka ŭ dačynieńni da Tajvania, što zrabiła vidavočnym žadańnie ŭziać kantrol nad vostravam, pry nieabchodnaści siłaj.
Pašyryłysia bajavyja vučeńni, a vajennyja vydatki pavialičylisia da 200 miljardaŭ dalaraŭ u minułym hodzie, što bolš čym udvaja pieravyšaje sumu, vydatkavanuju Kitajem dziesiać hadoŭ tamu. Značnaja častka namahańniaŭ Kitaja była nakiravana na hipierhukavyja rakiety, jadziernuju zbroju i avijanoscy.
Kab zaachvocić vajaŭničy duch, Si raspačaŭ šyrokuju nacyjanalistyčnuju kampaniju.
Hramadzian Kitaja rehularna papiaredžvajuć ab špijonach i zahadvajuć nie być vinavatymi ŭ «pakłanieńni» abo «klenčańni pierad Amierykaj». Takija zakliki pašyrylisia ŭ apošnija miesiacy ŭ dačynieńni da tych kitajcaŭ, chto prymaje anhlijskaje imia ci stavić pad sumnieŭ uvarvańnie Rasii va Ukrainu.
Fota: Pixabay
Ekanomika
Z ekanamičnaha punktu hledžańnia Si pieranakiravaŭ miljardy dalaraŭ na raspracoŭku ŭłasnych technałohij, u tym liku pieradavych paŭpravadnikoŭ, jakija jon doŭhi čas kuplaŭ z-za miažy. Jon uziaŭ pad kantrol pryvatny siektar i adnaviŭ dziaržaŭnyja hihanty dla kankurencyi na suśvietnaj arenie.
Hetyja kroki mohuć dapamahčy Kitaju supraćstajać dalejšamu cisku z boku Vašynhtona, kali toj vyrašyć abmiežavać handal abo inšym čynam pasprabavać zapavolić rost Kitaja. U pačatku kastryčnika Ministerstva handlu ZŠA ŭzmacniła cisk novymi abmiežavańniami na ekspart pieradavych paŭpravadnikoŭ i abstalavańnia dla vytvorčaści čypaŭ.
Amierykanskija kampanii pierahladajuć svaje inviestycyjnyja płany ŭ Kitai, kaliści pierśpiektyŭnym dla ich rynku. Dypłamatyčnyja sustrečy vyradzilisia ŭ hutarki. Abodva baki ŭviali ŭzajemnyja sankcyi, u toj čas jak kitajskija kampanii vyklučyli z amierykanskich biržaŭ. U svaju čarhu kitajskim kampanijam zahadana bolš inviestavać u stratehičnyja haliny.
Si raspraviŭsia z pryvatnymi technałahičnymi kampanijami, jakija zajmajucca adukacyjnym repietytarstvam, sacyjalnymi sietkami i inšymi spažyvieckimi pasłuhami, za toje, što jany nie zmahli adekvatna słužyć dziaržaŭnym intaresam abo ŭ dastatkovaj stupieni abaraniać kanfidencyjnyja danyja karystalnikaŭ, jakija byccam mohuć być pieradadzieny ZŠA.
Kitaj sprabuje raźvić ułasnuju płaciežnuju sietku i vypuściŭ ličbavuju valutu, jakuju padtrymlivaje ŭrad. Heta pavinna ŭ kančatkovym vyniku dapamahčy Piekinu paźbiehnuć vykarystańnia dołara i abyści hłabalnuju finansavuju sistemu.
Fota: Pixabay
Prablemy na šlachu da «vialikaha adradžeńnia»
Si nie chavaŭ svaich płanaŭ zrabić Kitaj adnoj sa zvyšdziaržaŭ śvietu. Paśla ŭstupleńnia na pasadu ŭ 2012 hodzie jon pačaŭ vykładać svajo bačańnie pad nazvaj «Kitajskaja mara», jakoje hruntujecca na daŭnim žadańni razabracca z kryŭdami paśla krachu dynastyi Cyn i pieradačy kitajskaj terytoryi zachodnim dziaržavam u 19-m i pačatku 20-ha stahodździaŭ. Si nazvaŭ heta «vialikim adradžeńniem kitajskaj nacyi».
Mnohija z krokaŭ Si padvysili nacyjanalny honar kitajcaŭ. Jon rehularna paviedamlaje ab prykmietach uzmacnieńnia Kitaja i zaniapadu Zachadu. Ale jaho dziejańni taksama adšturchnuli ad siabie patencyjnych siabroŭ, abjadnali kankurentaŭ i nanieśli škodu mnohim z samych mocnych častak ekanomiki, asabliva praz žorstkija łakdaŭny z-za kavidu.
Na ekanamičnym froncie mnohija z krokaŭ pa dasiahnieńni bolšaj samadastatkovaści, u tym liku ŭ halinie paŭpravadnikoŭ, nie prynieśli ničoha. Žorstki padychod da kiravańnia ekanomikaj nadaŭ Piekinu bolš kantrolu, ale taksama zdušyŭ značnuju častku pradprymalnickaha duchu, jaki stymulavaŭ rost Kitaja i byŭ krynicaj pracoŭnych miescaŭ. Uzrovień biespracoŭja siarod moładzi ŭ haradach blizki da svajho histaryčnaha maksimumu: amal kožny piaty čałaviek va ŭzroście ad 16 da 24 hadoŭ nie maje pracy.
Mnohija ekśpierty daŭno prahnazavali, što ekanomika Kitaja budzie zapavolvacca pa miery raźvićcia, a doŭhaterminovyja pierśpiektyvy mohuć być jašče horšymi, pakolki nasielnictva Kitaja, pa prahnozach mnohich demohrafaŭ, skarocicca ŭ hetym hodzie ŭpieršyniu za niekalki pakaleńniaŭ.
