Fota: «Vajar»
Pa infarmacyi Paŭła Łatuški, u rasijan staić zadača stvaryć ahulnuju armiju tak zvanaj Sajuznaj dziaržavy.
«Padrychtoŭka da jaje stvareńnia ciahniecca ŭžo daloka nie pieršy dzień. Stvareńnie takoj armii — heta čarhovy vyklik dla našaj dziaržavy. Ciapier faktyčna adbyvajecca pastupovaja anieksija Biełarusi. Robiacca dziejańni, skiravanyja na toje, kab likvidavać našu niezaležnaść i suvierenitet», — kaža kiraŭnik NAU.
Raspaviadajučy pra rolu biełaruskaj armii ŭ hetaj vajnie, Pavieł Łatuška ličyć, što biełaruskamu vojsku ŭ pieršuju čarhu adviedziena rola tyłavoha zabieśpiačeńnia, jakoje jany ładziać nie tolki na terytoryi Biełarusi, ale i na akupavanych častkach Ukrainy.
«Jość infarmacyja, što vajskoŭcaŭ adnoj z vajskovych čaściej z-pad Minska nakiravali na akupavanuju častku terytoryi Ukrainy, dzie jany zajmajucca ramontam techniki. Mieściacca jany za 50 kiłamietraŭ ad linii sutyknieńnia ŭkrainskich i rasijskich vojskaŭ na Danbasie. U pieršuju čarhu ich matyvujuć hrašyma», — raskazaŭ «Našaj Nivie» Pavieł Łatuška.
Asnoŭnaj pryčynaj taho, čamu Łukašenka dahetul nie navažyŭsia paŭnavartasna ŭstupić u vajnu z Ukrainaj, Łatuška ličyć nastroi siarod vajskoŭcaŭ.
Pavieł Łatuška. Fota: Ofis Cichanoŭskaj
«Infarmacyja ad krynic z roznych siłavych struktur vyrazna demanstruje, što nastroi ŭ biełaruskim vojsku nie adnolkavyja. Pryčym navat u šerahach vyšejšaha kiraŭnictva siłavoha błoku i Ministerstva abarony.
Jość śviedčańni taho, što značnaja častka biełaruskaha vojska i aficeraŭ dakładna nie choča vajavać, tamu Łukašenka pačynaje vykarystoŭvać usio bolš ahresiŭnuju prapahandu», — dzielicca palityk.
Kab pierakanać vajskoŭcaŭ u tym, što Ukraina — vorah, zapuščana vielmi mocnaja prapahanda, nakiravanaja na toje, kab zrabić ź ich zombi, jakija pavierać, što ŭkraincy stvarajuć pahrozu dla Biełarusi, što treba ich atakavać.
«My bačym, jak idzie aktyŭnaje pramyvańnie mazhoŭ, zaraz adbyvajecca baraćba za rozum vajskoŭcaŭ, kab źmianić ich staŭleńnie da situacyi», — śćviardžaje Łatuška.
Aproč hetaha, Łatuška źviartaje ŭvahu na toje, što praz saŭdzieł Biełarusi ŭ ahresii suprać Ukrainy raście niezadavolenaść Łukašenkam siarod hramadstva. Kancepcyja «aby nie było vajny», jakaja hadami prasoŭvałasia Łukašenkam i vakoł jakoj była vybudavana stratehija vybaraŭ 2015 hoda, bolš nie pracuje.
«U hetaj stratehii źjaviłasia vialikaja ščylina, i jana pačała razburacca na vačach. Łukašenka vielmi napałochany hetym.
«Aby nie było vajny» ŭžo nie spracoŭvaje, bo vialikaja častka biełaruskaha hramadstva bačyć i razumieje, što mienavita z-za Łukašenki my stali suahresaram u vajnie suprać Ukrainy. Chtości z hetym publična nie pahadžajecca, niechta nie razumieje, ale vialikaja dola biełaruskaha hramadstva absalutna razumieje, što heta vina Łukašenki».
Praz heta, na dumku palityka, my vyjšli na novy etap infarmacyjnaj vajny.
«Z adnaho boku, my majem demakratyčnyja siły Biełarusi, niezaležnyja biełaruskija i ŭkrainskija ŚMI, jakija danosiać praŭdu, a z druhoha boku jość rasijskaja i łukašenkaŭskaja prapahanda».
Pavieł Łatuška ŭpeŭnieny, što sam Łukašenka taksama vyrazna razumieje, što ŭ biełaruskim hramadstvie niama adnaznačnaha ŭsprymańnia situacyi, što mienavita dziakujučy jamu niama albo nie budzie vajny. Tamu Łukašenka i vyrašyŭ nakiravać hienierałaŭ pa pradpryjemstvach i vajskovych čaściach.
Łatuška ŭpeŭnieny, što Łukašenka nie nakiroŭvaje svaich vajskoŭcaŭ va Ukrainu nie tamu, što suprać hetaha ci nie padtrymlivaje Pucina, a tolki tamu, što baicca stvaryć tryhier, jaki zmoža vyklikać supraciŭ z boku nasielnictva.
«Pry hetym jon zastajecca absalutnym sajuźnikam Pucina, ale zaraz jahonaja hałoŭnaja meta ŭ hetym sajuzie — zachavać uładu. Vyklučna tolki praź jahonyja aściarohi taho, što heta moža vyklikać unutranyja pratesty, jon nie idzie na hety krok i maksimalna adciahvaje čas», — upeŭnieny kiraŭnik NAU.
