Sustreča pradstaŭnikoŭ pałka Kalinoŭskaha ź Mižfrakcyjnym deputackim ab‘iadnańniem u Viarchoŭnaj Radzie Ukrainy «Demakratyčnaja Biełaruś». Kijeŭ, 19 kastryčnika. Fota: th-kanał pałka Kalinoŭskaha
Dvoje kalinoŭcaŭ — Jan «Trombli» Dziurbiejka i Siarhiej «Klešč» Dziohcieŭ — zastajucca ŭ pałonie. Abodva jany ŭklučanyja ŭ śpis na abmien vajennapałonnych. Ci niama dyskryminacyi ŭ dačynieńni biełarusaŭ pry vyrašeńni, kaho abmianiać?
«Ja nie dumaju, što moža być dyskryminacyja z našaha boku. Z rasijskaha boku moža być, — miarkuje deputat Viarchoŭnaj Rady ad kirujučaj partyi «Słuha naroda» Bahdan Jaromienka. — Vy ž razumiejecie, što jany mohuć paddobryvacca da Łukašenki».
Infarmacyi pra dvuch pałonienych biełarusaŭ u deputata niama. Deputaty rabili zapyt na pracoŭnym uzroŭni ŭ SBU, ale adkaz nie atrymali.
«Heta pytańnie, dzie my nie ličym mahčymym nastojvać. Ja vajskovymi pałonnymi zajmajusia daŭno, jašče budučy konsułam, ja razumieju ŭsiu dalikatnaść pytańnia — nie daj boh što [lišniaje] publična vyjdzie. My sprabujem praz vajskovaje viedamstva štości daviedacca.
Vy ž bačycie — kali zmahli z azoŭcami vyciahnuć inšych inšaziemcaŭ, ich vyciahnuli. Kali mohuć, ich vyciahvajuć. Ja nie dumaju, što ŭ nas jość niejkaje pieraduziataje staŭleńnie da biełarusaŭ. Jak vas možna inakš usprymać — vy takija, jak my».
Niadaŭna kalinoŭcy zajavili pra palityčnyja ambicyi. Palityčny sojm pałka ciapier pradstaŭleny 10 čałaviekami.
«Heta ŭ asnoŭnym chłopcy, jakija majuć bajavy dośvied i davier svaich pabracimaŭ. Kalektyvy ich vysunuli, u nas pravodziłsia nievialikija vybary. Ciapier hety orhan zaćviardžaje palityčnaje bačańnie — našych kantaktaŭ, kirunkaŭ», — tłumačyć namieśnik kamandzira pałka Vadzim Kabančuk.
Što da adnosin sa Śviatłanaj Cichanoŭskaj, to jon kaža, što ahresiŭnaj rytoryki da jaje ŭ ich niama. «Asobnym bajcam my nie zabaraniajem mieć ułasnyja dumki. Ale padkreślu — my nie šukajem sabie vorahaŭ, u nas ich chapaje».
Čamu ž palityčny błok pałka tady nie abjadnoŭvaje siły ź Cichanoŭskaj?
«My stvarylisia pa ŭłasnaj inicyjatyvie, za ŭłasnyja resursy. My nie bačyli zajaŭ [z taho boku] pa mabilizacyi ŭ našy šerahi, nie bačyli zajaŭ pra toje, što nam treba amunicyja. My rušym napierad i nie bačym prablemy, kab niejkija palityčnyja rečy vyrašać samim, praz svaich pradstaŭnikoŭ», — davodzić Kabančuk.
Na svabodnych vybarach u budučym, mahčyma, chtości z bajcoŭ i budzie ŭdzielničać. Ale najpierš połk bačyć dla siabie inšuju zadaču — stać padmurkam dla novaha sučasnaha biełaruskaha vojska.
