Śviatkavańnie Novaha hoda ŭ sanatoryi «Narač». Fota: sannaroch.com.
Pavodle słoŭ Hienadzia Bałbatoŭskaha, dyrektara Respublikanskaha centra pa azdaraŭleńni i sanatorna-kurortnym lačeńni nasielnictva, na pieryjad navahodnich śviataŭ užo zabraniravana bolš za 60 % miescaŭ u biełaruskich zdraŭnicach, siarod jakich 45 % raskupili zamiežnyja hramadzianie (nie pytajcie, jakija).
«Naša Niva» pahladzieła, što cikavaha prapanujuć ajčynnyja sanatoryi na śviatočny pieryjad, ci sapraŭdy taki vialiki popyt i kolki kaštujuć karotkaterminovyja pucioŭki na kanikuły.
«Plisa». Biełaruskija zorki i šef-kuchary
U pryaziornym sanatoryi «Plisa», niahledziačy na jaho niebiudžetnaść, užo raspradadzienyja ŭsie numary ad 29 śniežnia pa 6 studzienia.
Da hetaha na zimovych vakacyjach tut abiacali stvaryć navahodniuju kazku, jakaja padoryć niezabyŭnyja emocyi. U samu noč Novaha hoda haściej čakaje hała-viačera sa stravami ad šef-kucharaŭ i pieśniami ad zorak biełaruskaj estrady. Chto z apošnich budzie śpiavać u sanatoryi, pakul nieviadoma. Tam adkazali, što prahrama vystupaŭ jašče ŭ raspracoŭcy, i afiša navahodniaha bankietu źjavicca paźniej.
Navahodnich ceńnikaŭ na sajcie sanatoryja nie zastałosia, ale ž my znajšli ich u adnoj z rasijskich turfirm — ad 5867 rasijskich rubloŭ, abo troški bolš jak 235 biełaruskija za sutki z čałavieka. Praŭda, nieviadoma, ci ŭvachodzić u canu košt bankietu.
«Alfa Radon». Bal z maskami i sakretnaja prahrama
Śviatočnaja prahrama ŭ hetym sanatoryi premium-kłasa jašče bolš tajamničaja, čym u papiarednim. Na sajcie zdraŭnicy paviedamlajuć, što tam projdzie navahodni bal-maskarad i abiacajuć niezabyŭnuju prahramu, a taksama vydatnaje charčavańnie, SPA i miedycynskija pasłuhi.
Zabraniravać numar u Dziatłaŭskim rajonie na śviatočny pieryjad mahčyma ad 3 sutak. Cana dla biełarusaŭ na hety pieryjad za dvaich — ad 1776 rubloŭ, dla rasijan daražej — ad 1858. Niekatoryja numary na pieryjad ad 31 śniežnia pa 3 studzienia ŭžo zabraniravanyja.
«Lasnoje»
Sanatoryja znachodzicca na pamiežžy Viciebskaj i Minskaj abłaściej. Ustanova, jakuju kuryruje KDB, prapanuje tydniovy navahodni tur pa sustrečy Novaha hoda (na 8 dzion i 7 načej). Minimalnaja cana na adnaho biełarusa za sutki — 195 rubloŭ, za ŭvieś pieryjad — 1365. Dla rasijan — 215 i 1507 adpaviedna.
Adzin z numaroŭ sanatoryja KDB. Fota: sanlesnoe.by.
Kali kuplać poŭny tur, to ŭ canu ŭvachodzić pražyvańnie, charčavańnie, navahodni bankiet z zabaŭlalnaj prahramaj, kansultacyja kaśmietołaha i terapieŭta, pitnoje lačeńnie minieralnaj vadoj, štodzionnaje karystańnie basiejnam, spartyŭnaj i trenažornaj załami, dva sieansy finskaj saŭny i dźvie pracedury kryja— abo infračyrvonaj sauny.
«Lasnyja aziory». Ruskaje kino i dyskateka SSSR
Nieadnaznačnuju navahodniuju prahramu prapanuje sanatoryj, što znachodzicca va Ušackim rajonie: padajecca, što takija zabavy bolš pryvabiać savieckich ludziej, a nie sučasnych.
Navahodnija zajezdy adkrytyja, ale abmiažoŭvajucca datami: 25-30 śniežnia, 3-7 studzienia. Minimalnaja praciahłaść pa azdaraŭlenčym tury — 4 nočy. Sanatorna-kurortnyja pucioŭki — ad 6 načej.
«31 śniežnia — 2 studzienia zasialeńnie/vysialeńnie niemahčymaje», — adrazu paznačajecca na sajcie arhanizacyi.
Tak vyhladajuć mierapryjemstvy ŭ «Lasnych aziorach». Fota: lesnyeozera.com.
U navahodniuju noč tut projdzie bankiet z hulniami, konkursami, tancami i fiejervierkami. U inšyja dni — ekskursija na miemaryjalny kompleks «Praryŭ», kinaprahlady (u asnoŭnym ruskich navahodnich filmaŭ), kancert artystaŭ biełaruskaj estrady i dyskateka SSSR.
Paśla ŭdakładnieńnia vyśvietliłasia, što na kancertach zapłanavanyja vystupleńni Ihara Zadarožnaha, Vadzima Paŭroza, ansambla «Hulaj, kazak», narodnaha ansambla «Charoški», Viačasłava Statkieviča i inšych.
Padčas zimovych śviataŭ sutki ŭ «Lasnych aziorach» kaštujuć minimum 90 rubloŭ za adnaho. Za navahodni bankiet pryjdziecca płacić asobna — 130 rubloŭ.
«Biełarusačka». Juška i cyhanskija tancy
Hety sanatoryj znachodzicca ŭsiaho za čatyry kiłamietry ad Minska, pobač z vadaschoviščam Drazdy, ale ž vyhladaje jon zusim nie pa-staličnamu. Kab trapić siudy na Novy hod, treba zabraniravać minimum 7 načej.
Pucioŭki, u jakija ŭklučana i lačeńnie, kaštujuć ad 924 rubloŭ za dvaich, azdaraŭlenčyja — ad 812. Takija ceny za daty ad 30 śniežnia pa 7 studzienia. Členam prafsajuzaŭ źnižki, ale ž za bankiet treba budzie dapłacić usim: pa 224 rubli z čałavieka.
Tak vyhladajuć biudžetnyja numary ŭ «Biełarusačcy». Fota: belorusochka.com.
A što pa prahramie? Jana vielmi raznastajnaja i strakataja. Karaokie, dyskateki dla dziaciej i darosłych, hulni, kancerty zorak biełaruskaj estrady (Novy hod bieź ich nie śviata).
A tak vyhladajuć afišy sanatoryja. Fota: belorusochka.com.
U sanatoryi adkazali, što pakul nie vałodajuć infarmacyjaj pra imiony artystaŭ, akramia adnoj — Hanny Błahavaj, vystup jakoj zajaŭleny pierad samym Novym hodam.
A ŭ pieršy dzień 2023 hoda haściej «Biełarusački» pačastujuć rybnaj poliŭkaj i pakažuć im cyhanskija tancy, a na pravasłaŭnaje Rastvo aščaśliviać demanstracyjaj dakumientalnych filmaŭ «Chramy Biełarusi».
