«Vielmi chacieŭ pabačyć śviet»
Da taho, jak sieści za rul vialikahruza, Alaksiej pracavaŭ na drevaapracoŭčym pradpryjemstvie, piša «Śvietły šlach». Na dalokuju darohu jaho padšturchnuŭ muž siastry, jaki na toj čas aktyŭna kalasiŭ pa kazachskich stepach.
— Mnie było 27 hadoŭ, i ja vielmi chacieŭ śviet pabačyć: ramantyka, daroha. Plus materyjalnaje pytańnie mnohija vyrašajuć dalnabojem. Amal dziesiać hadoŭ pravy ŭ mianie byli, ja davoli ŭpeŭniena vadziŭ lehkavy aŭtamabil. Sumniavaŭsia, ale vyrašyŭ pasprabavać. Žonka padtrymała, — uspaminaje Alaksiej Rukojć.
Pieršy «marš-kidok» u jakaści stažora mužčyna ździejśniŭ na «Volva» ŭ Ispaniju, adtul — u Nižni Noŭharad. Nastupny rejs — užo samastojnaje płavańnie. Spraviŭsia.
— Z taho času abjechaŭ usiu Jeŭropu, mnohaje pabačyŭ, vyvučyŭ. Šviejcarskija pali, Ejfieleva vieža, mnohaje ŭ pamiaci zastajecca, — uśmichajecca dalnabojnik.
«Minusy» pracy: bytavyja ŭmovy — nie samyja kamfortnyja, praciahłyja, pa 2—3 miesiacy, kamandziroŭki. Mienavita doŭhija rasstańni z žonkaj, «šlub pa vajbiery» padšturchnuli Alaksieja da dumki: «A što kali Lenu ŭziać da siabie ŭ naparniki? Siamiejnych ekipažaŭ u Jeŭropie niamała. Možna i nam pasprabavać».
«Siadziš vysoka — daroha bačnaja jak na dałoni»
Alena nazyvaje muža «viečnym ruchavikom».
— Kaliści jon pierakanaŭ mianie pajści ŭ aŭtaškołu, atrymać pravy na kiravańnie lehkavym aŭtamabilem. Ja krychu ŭpirałasia, a ciapier — ni kropli nie škaduju. Darohu lublu. Ni ad koha nie zaležu, kudy treba — sama padjedu. Žyćcio biez aŭto naohuł nie ŭjaŭlaju. Kali muž ramantuje aŭtamabil, zaŭsiody jamu dapamahaju. Technika mnie padabajecca.
A adnojčy muž prapanavaŭ Alenie «asvoić» vialikahruz.
— Viadoma, ja napružyłasia. Ale jon znoŭ uziaŭ mianie za ruku i pryvioŭ u aŭtaškołu. Spačatku ja atrymała pravy na kiravańnie transpartnym srodkam katehoryi «S» (hruzavoha aŭtamabila), a potym — katehoryi «Je». U hrupie — adny mužčyny, viadoma, chvalujuča. Katehoryju «S» atrymlivała na MAZie. Kali sieła za rul ZIŁa — emocyi pierapaŭniali. Ale potym zdałosia, što niejak navat lahčej, čym lehkavym aŭtamabilem kiravać: siadziš vysoka — daroha bačnaja jak na dałoni, — raspaviadaje žančyna.
U hetym hodzie dačka siamiejnaj pary zakančvaje škołu.
— Kali dačka pastupić kudy-niebudź vučycca, ja ŭžo vyrašyła: pajdu da muža ŭ naparniki. Žyćcio prachodzić — a my tak mała byvajem razam. Kožny raz, kali Alaksiej adjazdžaje, składana rasstavacca. A tut źjaviłasia nahoda być bližejšymi, — havoryć Alena.
