Fota: kadr z trejlera
Być fanatam režysiora Hiljerma del Tora nasamreč duža biaśpiečna, bo što b jon ni stvaraŭ, jaho tvorčaść — nibyta biaskoncaja krynica asałody. Paru tydniaŭ tamu del Tora paradavaŭ hledačoŭ čarhovaj pierlinaj — «Kabinietam redkaściaŭ» (Cabinet of Curiosities) ad Netflix, sieryjałam z vaśmi častak, jaki nastolki ž elehantny, nakolki i hrateskny, piša Guardian.
Vidavočna, u lubym sieryjale byvajuć svaje chiby, ale ž u «Kabiniecie redkaściaŭ» usie častki vartyja ŭvahi. Del Tora napisaŭ scenaryj dla dźviuch sieryj, ale kuryravaŭ stvareńnie ŭsich vaśmi i sabraŭ vosiem režysioraŭ, kab źniać samadastatkovyja sieryi-kašmary. Jon źjaŭlajecca ŭ pačatku kožnaj ź ich — złaviesnaja postać ź ćviordym vyrazam tvaru biez uśmieški. La jaho staić sapraŭdnaja šafa-kabiniet — pryhožaja draŭlanaja kanstrukcyja, jakaja nahadvaje šmatpaviarchovy asabniak, jaho źmiest varjirujecca ad klučoŭ da kostak i rahoŭ adzinaroha. Kabiniet del Tora — miesca, dzie hanarystaść viadzie ŭ piekła, a žorstkaść viartajecca ŭ dziesiacirazovym pamiery.
Usio pačynajecca z «Łota 36», sieryi, jakuju źniaŭ Hiljerma Navara — niekali jon atrymaŭ «Oskara» jak apieratar najlepšaj stužki del Tora, «Łabirynta Pana». Padobnyja elemienty fašyzmu i fantazii jość i ŭ «Łocie 36», dzie nam raskazvajuć pra vajennaha vieterana, jakoha pavolna prahłynajuć razmovy ŭltrapravych. Uvieś čas jon chavajecca ad pieraśledu inkasataraŭ i pradaje źmieściva zakinutych składoŭ, a ŭ jaho dušy sumiaščajucca horyč i ehaizm fašysckaha pramyvańnia mazhoŭ i niekalki drabničak čałaviečnaści.
Potym idzie samaja napružanaja historyja ŭ sieryjale — «Mohiłkavyja pacuki» ad režysiora Vinčenca Natali, aŭtara kultavaha kłasičnaha kašmaru ŭ styli Kafki «Kub». Siužet, uziaty z apaviadańnia Hienry Katnera, prosty: rabaŭnik mahił vykopvaje trup bahacieja, a potym bačyć, jak jaho ciahnie zhraja pacukoŭ. Rabaŭnik nie pałochajecca i pieraśleduje škodnikaŭ pa ciomnych i zabłytanych tunelach, dzie vyjaŭlaje niešta značna bolš horšaje.
Ale, napeŭna, samaja fantastyčnaja z usich sieryj — «Prahlad» ad Panasa Kasmatasa, režysiora filma žachaŭ «Mendzi» ź Nikałasam Kiejdžam. Heta historyja pra pajezdku pad narkotykami, jakaja pajšła nie pa płanie, i abapirajecca jana na demaničnuju fihuru, nibyta vyrvanuju z kłuba prychilnikaŭ del Tora.
Na praciahu ŭsiaho sieryjała jaho ton źmianiajecca, ale jon zaŭsiody zastajecca źviazany sa stylem del Tora. Mahčyma, samaje značnaje adchileńnie ad jaho my bačym u najmienš strašnaj, ale najbolš zapaminalnaj sieryi. U «Šepcie» nam pradstaŭlajuć smutny apovied pra paru arnitołahaŭ, što źjechali ŭ adasobleny dom, kab vyvučać mihracyju ptušak i akryjać ad žudasnaj straty.
«Šept» dobra ŭvasablaje ŭ sabie toje, što robić «Kabiniet redkaściaŭ» takim vydatnym. Hety sieryjał dazvalaje kiniematahrafistam čerpać natchnieńnie ŭ majstra i nie pryhniatać ułasny duch, što ŭ vyniku daje del Tora mnostva cudoŭna niepryjemnych historyj, jakija jon moža pradstavić hledačam.
Rejtynh na vialikich suśvietnych resursach:
IMDB — 7,5/10
Rotten Tomatoes — 92% (krytyki), 75% (hledačy)
Čytajcie taksama:
Pra skandynaŭskija filmy, połackija syrki, dom i paśladoŭnaść. Hutarka z dyrektarkaj najbujniejšaha biełaruskaha niezaležnaha kinafiestyvalu
10 «strašnych» filmaŭ dla ludziej, jakija nie lubiać žachi
Što pahladzieć. «Alaska Dejli» (Alaska Daily) — tajamničaja historyja z łaŭreatkaj «Oskara»
