Što na miažy ciapier?

Pa stanie na 14 hadzin 8 listapada čerhaŭ ź lehkavikoŭ na vyjezd ź Biełarusi amal niama. U «Pryvałkach» na vyjezd ź Biełarusi čakajuć bolš za 10 mašyn, a ŭ «Babroŭnikach» — bolš za 60. 

Fota: skrynšot z sajta gpk.gov.by pa stanie na 14:00

Fota: skrynšot z sajta gpk.gov.by pa stanie na 14:00

Polšča

Adnak ciaham vychodnych situacyja vyhladała inakš. Čytač sa Słonima raspaviadaje, što daroha z rajcentra da Biełastoka (kala 150 km) zaniała ŭ jaho kala 16 hadzin. I heta pry tym, što mužčyna jechaŭ na rejsavym aŭtobusie.

«Ab 11-j ranicy my vyjechali sa Słonima, praz paŭtary hadziny patrapili na terminał ź biełaruskaha boku, chvilin praz dvaccać pačali prachodzić pašpartny kantrol, jaki ciahnuŭsia mienš za hadzinu. Prajšli kantrol u biełarusaŭ, prajechali šłahbaum — i dalej pačaŭsia treš. Na ŭjeździe da palakaŭ my prastajali 12 hadzin», — zhadvaje čytač. 

Pa słovach padarožnika, pierad ich aŭtobusam było jašče 12 busikaŭ i aŭtobusaŭ, na afarmleńnie kožnaha ź ich sychodziła pa hadzinie. U vyniku rejsavy aŭtobus spaźniŭsia na 12 hadzin u paraŭnańni z tym, jak musiŭ pryjechać pa raskładzie.

Jak vynikaje, šmathadzinnyja zatrymki na miažy adbyvajucca nie tolki pa vychodnych. Biełarusy, jakija 1 listapada jechali na aŭtobusie ź Minska ŭ Biełastok, raspaviadajuć, što tolki na samo pierasiačeńnie miažy ŭ ich syšło 10 hadzin.

Pierasiačeńnie miažy na ŭłasnym aŭto taksama zajmała niamała času. Naprykład, u hety paniadziełak, kab patrapić u Biełastok praz punkt propusku «Bierastavica», ludziam davodziłasia stajać u čarzie pa 10-14 hadzin u kožny bok. 

PP «Varšaŭski most». Fota: telehram-kanał «Warshawka» 

PP «Varšaŭski most». Fota: telehram-kanał «Warshawka» 

U punkcie propusku «Brest» taksama naziralisia davoli vialikija čerhi. Čytačy, jakija ŭ piatnicu jechali praź jaho ŭ Polšču, raspaviadajuć, što na pierasiačeńnie miažy ŭ ich syšło kala 8 hadzin. «Nazad viartalisia ŭ paniadziełak praz «Bierastavicu», prajezd zaniaŭ kala 3,5 hadzin», — dzielacca čytačy.

Litva

Niekatoryja, kab nie stajać u čarzie ŭ punkcie propusku «Bierastavica-Babroŭniki», vyrašajuć jechać u Polšču praź Litvu. Časam, zrabiŭšy kruk, možna sekanomić šmat času, ale tak byvaje nie zaŭždy. 

Čytačy, jakija takim čynam vyrašyli patrapić u Polšču, dla prajezdu miažy abrali punkt propusku «Pryvałka». Staŭšy ŭ čarhu ŭ niadzielu viečaram, u Litvie jany apynulisia tolki ŭ paniadziełak dniom. Prajezd miažy ŭ adzin bok zaniaŭ kala 21 hadziny.

Na litoŭskim kirunku, aproč «Pryvałak», davoli napružanaj vyhladała situacyja ŭ punkcie propusku «Kamienny łoh». Ludzi, jakija stali ŭ čarhu ŭ subotu ranicaj, u Litvu patrapili tolki viečaram.

«Prajezd praz hranicu zaniaŭ kala 12 hadzin. Nazad viartalisia ŭ paniadziełak praz «Katłoŭku», na miažu pryjechali paśla abiedu. Prachodžańnie hranicy zaniało bolš za 6 hadzin», — kaža čytač.

Łatvija

Łatvijski kirunak tradycyjna źjaŭlajecca najmienš zahružanym, ale i tam na minułych vychodnych było nie ŭsio tak prosta. 

Čytačy raspaviadajuć, što ŭ noč ź piatnicy na subotu prajezd praź miažu ŭ punkcie propusku «Urbany» zaniaŭ 5 hadzin.

«Vielmi pavolna pracavaŭ łatvijski bok. U Biełaruś viartalisia ŭ niadzielu ŭžo praź Litvu. Prajezd miažy praz «Katłoŭku» zaniaŭ usiaho paŭtary hadziny», — dzielacca čytačy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?