U Viciebsku žanich i niaviesta raśpisalisia ŭ zahsie prosta ŭ pižamach 8

A akazałasia, što jany zahadzia ničoha nie płanavali. Ščaślivyja maładyja Anastasija i Ściapan Karniłovičy padzialilisia z «Vićbičami» historyjaj ich kreatyŭnaj rehistracyi.

— Fotasiesiju ŭ pižamach my źbiralisia pravieści doma. Ale pakolki źbiracca skončyli kala 11 hadzin, a na 11:15 užo była pryznačanaja rehistracyja, my adpravilisia ŭ zahs u tym, u čym byli, — z uśmieškaj uspaminaje Anastasija. — Ale zusim nie pieražyvali z hetaj nahody, pakolki asnoŭnaja ŭračystaść z haściami i vyjaznoj rehistracyjaj była zapłanavana na viečar. Nas papiaredzili, što rośpis u zahsie nie zojmie i piaci chvilin. A apranacca my ŭ lubym vypadku nie źbiralisia.

Ale, ubačyŭšy maładych u pryhožych pižamach, fatohraf i videohraf vyrašyli nie hublać taki kaštoŭny materyjał i prapanavali zrabić u zahsie paŭnavartasnyja videa— i fotazdymku. Anastasija i Ściapan krychu dapłacili za ŭračystaść i atrymali sapraŭdnuju cyrymoniju z maršam Miendelsona, viasielnym tancam i pažadańniami doŭhaha płavańnia ich siamiejnamu karablu ad supracoŭnikaŭ Pałaca šlubu.

Potym byli jašče fotasiesii, vyjaznaja rehistracyja ŭ tradycyjnych viasielnych uborach, viasiołaje šumnaje śviata, ale ŭspaminajuć usie mienavita «pižamny» rośpis u zahsie. U hetym bačycca svojeasablivy abiareh budučaha siamiejnaha žyćcia maładych ad dyskamfortu i pafasu. Ideju padtrymali ŭ kamientarach pad videa ŭ sacyjalnaj sietcy. Ale byli i tyja, chto ŭpeŭnieny, što bieź viasielnaj sukienki ŭ zahs nielha. Adny dumali, što maładym na kaściumy prosta hrošaj nie chapiła, inšyja asudžali za zališniuju kreatyŭnaść. Maładych nikolki nie źbiantežyli takija kamientary. Jany viedajuć, što ščaślivyja, i vierać, što zdolejuć pranieści heta ščaście praz usio žyćcio.

Ściapan i Anastasija paznajomilisia jašče padletkami, niekalki hadoŭ siabravali. Potym ich darohi razyšlisia na 15 hadoŭ. Ale ŭvieś hety čas jany nie vypuskali adno adnaho z vačej. Los čas ad času sutykaŭ budučych muža i žonku i, u rešcie rešt, źvioŭ ich.

18

9

8

1

0

0

Nashaniva.com