Fota: Tut.by
Pavodle jaho słoŭ, častka abvinavačanych pa spravie Tut.by prachodzić pa ekstremisckich artykułach, ale naohuł sprava pačynałasia z abvinavačvańnia ŭ niavypłacie padatkaŭ, i mienavita hety artykuł źjaŭlajecca asnoŭnym.
«Ciapier rasśledavańnie zavieršana. Usim fihurantam vystaŭlenyja abvinavačvańni, i jany ŭžo aznajomilisia z materyjałami kryminalnaj spravy. U najbližejšy čas kryminalnaja sprava budzie pieradadziena prakuroru. Jak ja ŭžo skazaŭ, bolšaść fihurantaŭ abvinavačvajecca ŭ niavypłacie padatkaŭ. Amal usie jany zajavili chadajnictva kiraŭniku dziaržavy ab pamiłavańni, pakryli škodu ŭ poŭnym abjomie i ŭnieśli kryminalna-pravavuju kampiensacyju. Bolšaść abvinavačanych supracoŭničali sa śledstvam, tamu im źmianili mieru strymańnia. Ciapier pad vartaj znachodziacca tolki dvoje fihurantaŭ», — zajaviŭ Šandarovič.
Dvoje fihurantaŭ, jakija dahetul znachodziacca ŭ SIZA, — heta hienieralny dyrektar «Tut baj miedyja» Ludmiła Čekina i redaktar Tut.by Maryna Zołatava.
Paśla taho, jak ich ŭklučyli ŭ śpis «asob, jakija majuć dačynieńnie da terarystyčnaj dziejnaści», stała viadoma, što jany źjaŭlajucca abvinavačanymi pa dvuch «ekstremisckim» artykułach: art. 130 (Raspalvańnie sacyjalnaj varožaści) i art. 361 (Zakliki da sankcyj i inšych dziejańniaŭ, nakiravanych na pryčynieńnie škody nacbiaśpiecy) KK Biełarusi.
Pahrom Tut.by adbyŭsia roŭna paŭtara hoda tamu, 18 maja 2021 hoda. Tady byli aryštavanyja 15 čałaviek.
