Kiroŭca «žyviemabila» źjechaŭ ź Biełarusi, kali zastavacca jamu stała niebiaśpiečna. Ciapier jon žyvie ŭ Varšavie, a paśla napadu Rasii na Ukrainu addaŭ uvieś čas na ratavańnie ŭkrainskich uciekačoŭ. Niadaŭna Andrej daviedaŭsia, što suprać jaho pačali kryminalnuju spravu i aryštavali jaho majomaść. Praŭda, mužčyna dakładna nie viedaje, pavodle jakoha artykuła raspačataja sprava — miarkuje, što pa «narodnym» 342-m (arhanizacyja i padrychtoŭka dziejańniaŭ, jakija hruba parušajuć hramadski paradak).
«Paśla taho, jak daviedaŭsia pra kryminalnuju spravu, zachaciełasia ažyćciavić niejkaje dziejańnie ŭ adkaz.
Ja zaŭsiody da hetaha staviŭsia troški z humaram, kali jašče ŭ Biełarusi nada mnoj prachodzili sudy, usie jany byli viasiołymi, — adznačaje biełarus. — Tut pryjšła dumka: kali zaviali kryminalnuju spravu, značyć, treba rabić i videa. Našy ž milicyjanty nie mohuć jaho źniać, tamu ja vyrašyŭ zrabić heta sam».
Andrej raspaviadaje, što videa razam ź siabram jany stvaryli chutka: na zdymki patracili kala hadziny, a za tydzień siabar usio zmantavaŭ.
U roliku biełarus «pryznajecca», što ŭ 2020 hodzie vaziŭ na svaim «žyviemabili» ludziej, u suviazi z čym u zaniapad pryjšoŭ hramadski transpart u Viciebsku. A kali vypuściŭ futbołki z «žyviemabilem», to zbankrutavaŭ «Biellehpram». «Vioz z saboj srodki dla źviaržeńnia režymu ŭ vyhladzie dychłafosu», — začytvaje svajo «abvinavačvańnie» na kamieru, pieraapranuŭšysia ŭ milicyjanta pad imiem Hienierałaŭ S.S.
«Infarmacyja nakont kryminalnaj spravy da mianie dajšła jašče prykładna ŭ kancy kastryčnika, ale ž u mianie brakavała času, i ja doŭha nie moh trapić u Varšavu, kab zapisać rolik, tamu apublikavaŭ jaho tolki ciapier», — adznačaje Andrej.
Ciapier jon nie hladzić videa biełaruskich siłavikoŭ — bačyŭ ich tady, kali heta praktyka tolki pačynałasia.
«Ničoha, akramia fejspałmu, heta ni ŭ koha nie vyklikała. Milicyjanty, jakija pavinny nas abaraniać, zapisvajuć na kamieru svaje złačynstvy, za jakija im samim treba siadzieć», — havoryć mužčyna.
Andrej — kiroŭca mikraaŭtobusa Volkswagen Transporter T3 ź bieł-čyrvona-biełaj simvolikaj, jaki žychary Viciebska nazvali «žyviemabilem».
Paśla pačatku vajny va Ukrainie biełarus staŭ vałancioryć na polska-ŭkrainskaj miažy i dapamahać uciekačam.
Pavodle słoŭ Andreja, z pačatku vajny na svaim aŭtamabili jon pieravioz bolš jak 50 tysiač ukraincaŭ.
Ciapier, kaža jon, na miažy z Polščaj užo niamnoha ludziej, ale ž i vałancioraŭ amal nie zastałosia. U ciapierašni čas u asnoŭnym Andrej pieravozić ludziej ź invalidnaściu. Kali vy chočacie padtrymać dobruju spravu, napišycie vałancioru ŭ Instagram.
Čytajcie taksama:
«Jak tolki bambiać — uzrastaje płyń uciekačoŭ». Uładalnik bieła-čyrvona-biełaha «Žyviemabila» pieravioz kala 15 tysiač ukraincaŭ
