Pa słovach Zinina, jon pryjšoŭ 26 vieraśnia ŭ vajenkamat z upeŭnienaściu, što ŭ jaho siłach budzie nie dapuścić mabilizacyi małodšaha brata, jakomu napiaredadni pryjšła pozva.
«Ja taksama da apošniaha momantu byŭ upeŭnieny, što nie pryčyniu nikomu jakoj-niebudź škody. Ja kateharyčna suprać hvałtu z małych hadoŭ, usie, chto mianie blizka viedaje, mohuć heta paćvierdzić», — padkreśliŭ Zinin.
Mužčyna raspavioŭ, što jaho «pa hety dzień mučać kašmary» paśla taho, jak jon ubačyŭ paśmiarotnyja fota svajho 18-hadovaha školnaha pryjaciela, jaki byŭ pryzvany na terminovuju słužbu ŭ listapadzie 2021 hoda i zahinuŭ u pieršyja dni vajny va Ukrainie.
«Pradstaviŭšy na imhnieńnie, što mnie kali-niebudź, nie daj boh, pryjdziecca ŭbačyć takim svajho rodnaha čałavieka, ja zrazumieŭ, što nie zmahu žyć dalej, viedajučy, što ničoha nie raspačaŭ, kab hetaha nie dapuścić i hatovy byŭ z hołymi rukami kinucca pad tank za luboha sa svaich bratoŭ», — adznačyŭ Zinin.
Pa słovach mužčyny, brat, jakomu pryjšła pozva, mieŭ, jak i sam Zinin, prafiesiju vajennaha kiroŭcy, jakaja va ŭmovach vajny faktyčna rabiła jaho «śmiarotnikam».
«Moj pratest siamja rašuča adprečyła, zajaviŭšy, što alternatyvaj źjaŭlajecca turma, jany byli zapałochanyja. Tady ja zrazumieŭ, što raźličvać možna tolki na siabie. Usio adbyłosia zanadta chutka, tamu ja liču, što nie zdoleŭ zaścierahčy siabie i ludziej ad niepradbačanych abstavinaŭ. Usio toje, što adbyłosia dalej u budynku vajenkamata liču śledstvam svaich fatalnych pamyłak i trahičnym źbieham abstavinaŭ», — napisaŭ jon.
U liście Zinin padkreśliŭ, što nie sutykaŭsia z katavańniami z boku siłavikoŭ, ale adznačyŭ, što maje patrebu ŭ dapamozie cyvilnych daktaroŭ, bo ŭ SIZA niama nieabchodnaha dyjahnastyčnaha abstalavańnia. Jon taksama paprasiŭ «danieści spačuvańni» da paranienaha im vajenkama i jaho svajakoŭ.
***
Zinin adkryŭ stralbu ŭ vajenkamacie Uść-Ilimska 26 vieraśnia nieŭzabavie paśla pačatku mabilizacyi ŭ Irkuckaj vobłaści. U vyniku incydentu vajskovy kamisar rajona Alaksandr Jelisiejeŭ byŭ ciažka paranieny i trapiŭ u reanimacyju, 14 listapada jaho vypisali.
