Pavodle źviestak Biełstata, za 9 miesiacaŭ 2022 hoda z budaŭničaha siektara syšło 8 800 čałaviek, jakija nie byli zamienienyja naniatymi. Miarkujecca, što pa vynikach hoda skaračeńnie zaniatych u budaŭnictvie składzie kala 10 tysiač čałaviek.
Pačynajučy sa žniŭnia 2020 hoda, kolkaść zaniatych u budaŭničaj śfiery skaračajecca štomiesiac.
Hrafik: «Košt urada»
Ekśpiert BEROC Nastaśsia Łuzhina adznačaje, što padobnyja tendencyi nazirajucca i ŭ inšych siektarach ekanomiki. Adnak najbolš prykmietna heta adbyvajecca mienavita ŭ budaŭnictvie i IT. Naprykład, u IT-siektary za pieršyja 9 miesiacaŭ hoda čysty adtok skłaŭ kala 13 tysiač čałaviek.
Paralelna sa skaračeńniem kolkaści zaniatych u budaŭničaj halinie, skaračajucca abjomy ŭviedzienaha ŭ ekspłuatacyju žylla. Hetaja tendencyja nazirajecca pa ŭsioj krainie, u tym liku ŭ stalicy.
Na zarobki nie ŭ Rasiju, a ŭ Jeŭropu
Pavodle acenak ekanamista, źnižeńniu tempaŭ budaŭnictva spryjaje jak abstanoŭka ŭ krainie ŭ cełym, tak i dosyć vysoki ŭzrovień mihracyi.
«Akramia taho, z-za sankcyj źjavilisia surjoznyja ciažkaści ź impartam budmateryjałaŭ, što taksama adbivajecca na mahčymaści ŭ budaŭničaj śfiery. Taksama svoj upłyŭ na śfieru akazvaje abmiežavańnie handlovych nadbavak na budmateryjały», — adznačaje ekśpiert.
Niehatyŭnyja tendencyi ŭ svaju čarhu adbivajucca na zarobkach.
Kali zarobki padajuć, budaŭniki aktyŭna źjazdžajuć u inšyja krainy, bo praca ŭ hetaj halinie čaściakom nie patrabuje viedańnia movy i najaŭnaści adukacyi. Da 2018 hoda biełaruskija hastarbajtary čaściej adpraŭlalisia ŭ Rasiju. Adnak u apošnija hady tendencyja pastupova mianiajecca ŭ bok krain Jeŭropy.
Kolkaść ludziej, jakija źjazdžajuć na zarobki, raście. Sioleta za 9 miesiacaŭ kolkaść tych, chto źjechaŭ pa pracy mienš, čym na hod, pavialičyłasia na 10%.
Admoŭny ŭkład budaŭnictva ŭ rost VUP skłaŭ −0,6%.
Budaŭnictva mocna zaležyć ad kredytavańnia
Adnak na skaračeńnie tempaŭ budaŭnictva ŭpłyvajuć nie tolki sankcyi, ekanamičnaja niestabilnaść i adtok nasielnictva za miažu, ale i palityka Nacyjanalnaha banka i rašeńni samich bankaŭ.
Kali pahladzieć na statystyku, to pikavym pieryjadam pa kolkaści mietraŭ žylla, uviedzienaha ŭ ekspłuatacyju, źjaŭlajucca 2013-2015 hady. Paśla čaho nazirałasia źnižeńnie tempaŭ budaŭnictva. Ekśpiert tłumačyć heta tym, što Nacbank źmianiŭ padychody ŭ realizacyi manietarnaj palityki.
Abjomy ŭvodu ŭ ekspłuatacyja žylla ŭ Minsku za 2012-2022 hody. Hrafik: realt.by
«Paśla 2015 hoda Nacbank staŭ pravodzić davoli strohuju hrašova-kredytnuju palityku, što dazvoliła stabilizavać valutny rynak i pryvieści da źnižeńnia inflacyi. U 2018 hodzie zrabili bolš strohimi padychody da kredytavańnia.
U pryvatnaści byŭ uviedzieny pakazčyk pazykovaj nahruzki i pakazčyk zabiaśpiečanaści kredytu. Pieršy indykatar vyznačaje suadnosiny sukupnych štomiesiačnych płaciažoŭ pa kredytach da dachodu i nie pavinien pieravyšać 40%. A druhi pakazčyk aznačaje, što vydadzieny žyllovy kredyt nie moža pieravyšać 90% koštu nabytaha žylla», — tłumačyć Łuzhina.
Hetyja rašeńni, z adnaho boku, dazvolili źnizić ryzyki dla bankaŭ i hramadzian, ale ź inšaha — źjaŭlalisia strymlivajučym faktaram kredytavańnia.
«Akramia taho, kali pahladzieć na situacyju za apošnija 10 hadoŭ, to ŭ Biełarusi pastupova źnižałasia dola lhotnaha budaŭnictva žylla, što taksama adbiłasia na mahčymaści kupli nieruchomaści nasielnictvam.
Što tyčycca bolš śviežaha pieryjadu, to pačynajučy z 2020 hoda banki sami pieryjadyčna ŭvodzili abmiežavańni pa kredytavańni. Kredyty stali bolš darahimi i mienš dastupnymi. Heta ŭ značnaj stupieni paŭpłyvała na budaŭnictva, pakolki heta mienavita taja halina, jakaja mocna zaležyć ad kredytavańnia.
Vyšej pieraličanyja faktary pryviali da taho, što ŭ biahučym hodzie idzie skaračeńnie rynku. Sioleta na zapłanavanyja pakazčyki vychodzić tolki budaŭnictva žylla ź dziaržpadtrymkaj. Kamiercyjnyja zabudoŭščyki nie ŭpisvajucca ŭ płany», — kaža ekanamist.
U najbližejšaj budučyni kolkaść zaniatych u budaŭničaj halinie, jak i abjomy budaŭnictva, mohuć praciahvać skaračacca.
Čytajcie taksama:
VUP praciahvaje padać. Jak heta adabjecca na žyćci prostaha biełarusa?
Dziaržkantrol pahražaje kramam surovymi mierami za adsutnaść tavaraŭ
Biełstat nazvaŭ pamier siaredniaha zarobku za kastryčnik
