Fota: AP

Fota: AP

U publikacyi, aŭtary jakoj spasyłajucca na šerah amierykanskich i ŭkrainskich krynic, skazana, što prośby ab kasietnych bojezaradach — adna z samych nieadnaznačnych za ŭvieś čas poŭnamaštabnaha rasijskaha ŭvarvańnia.

Supracoŭniki amierykanskaj administracyi atrymlivajuć takija prośby Kijeva ŭžo niekalki miesiacaŭ, paviedamlaje CNN. Pavodle jaje danych, Vašynhton całkam nie vyklučaje, što pastaŭki mohuć adbycca ŭ budučyni, ale ličyć ich krajniaj mieraj, nieabchodnaj tolki ŭ vypadku niebiaśpiečnaha źmianšeńnia ŭkrainskich zapasaŭ.

Adna z hałoŭnych pieraškod atrymańnia Ukrainaj kasietnych bojeprypasaŭ — abmiežavańni na ich pieradaču za miažu, ustanoŭlenyja amierykanskim Kanhresam.

Kasietnaja zbroja zabaroniena Mižnarodnaj kanviencyjaj, pryniataj u 2010 hodzie, adnak ni Ukraina, ni ZŠA, ni Rasija da jaje nie dałučylisia.

Hałoŭnaja niebiaśpieka takich bojehałovak u tym, što abstalavanyja imi snarady abo rakiety niasuć mnostva samastojnych bolš drobnych askiepkavych vybuchovych pryład, jakija paražajuć značnyja płoščy. Pry hetym niekatoraja kolkaść takich zaradaŭ nie razryvajecca i jašče mnohija hady moža pradstaŭlać niebiaśpieku dla mirnaha nasielnictva.

Jak piša CNN, prezident Džo Bajden moža admianić ustanoŭlenyja kanhresmienami barjery na ekspart kasietnych bojeprypasaŭ, ale ŭ Biełym domie dajuć zrazumieć, što ŭ bližejšy čas heta naŭrad ci adbudziecca. «Zdolnaść Ukrainy dasiahać pośpiechu ŭ ciapierašniaj i nastupnych fazach kanfliktu nijakim čynam nie zaležyć ad atrymańnia hetych bojeprypasaŭ i z hetym nie źviazanaja», — skazaŭ telekampanii nienazvany supracoŭnik Kanhresa ZŠA.

Pa danych amierykanskich žurnalistaŭ i pravaabarončych arhanizacyj, rasijskaja armija nieadnarazova vykarystoŭvała kasietnyja bojeprypasy ŭ chodzie napadu na Ukrainu, što pryvodziła da značnych achviar, u tym liku siarod cyvilnaha nasielnictva.

Dla Ukrainy, jak ličać aŭtary publikacyi, kasietnyja bojehałoŭki mohuć vyrašyć dźvie najvažniejšyja zadačy: papoŭnić niedachop bojeprypasaŭ dla pieradadzienych ZŠA reaktyŭnych sistem załpavaha ahniu i artyleryi, a taksama damahčysia parytetu z armijaj RF pa artyleryjskaj mocy.

U pryvatnaści, pa danych telekampanii, Kijeŭ prosić dać jamu kasietnyja bojehałoŭki dla amierykanskich RSZA HIMARS i 155-milimietrovych haŭbic. U ZŠA jość niemałyja zapasy takich bojeprypasaŭ — i z 2016 hoda jany zdymajucca z uzbrajeńnia, pakolki «ŭtrymlivajuć sotni bolš drobnych zaradaŭ kasietnaha typu, jakija časta zastajucca nierazarvanymi na poli boju i ŭjaŭlajuć pahrozu dla cyvilnaha nasielnictva», paviedamlała amierykanskaje kamandavańnie.

U adkaz na pytańnie ab niebiaśpiecy takich uzbrajeńniaŭ nienazvany ŭkrainski čynoŭnik skazaŭ: «Rasijanie vykarystoŭvajuć hetyja kasietnyja bojeprypasy — i im usio roŭna. My budziem imi zmahacca z rasijskimi vojskami, a rasijanie ich užyvajuć suprać našych mirnych žycharoŭ».

Клас
3
Панылы сорам
0
Ха-ха
1
Ого
1
Сумна
1
Абуральна
0